Seemthawhnak 48

Jakob ni Josef ih Tiapale a Thluasuah hngai

1Ahi hnukah Josef cu, “Na pa a tiak” ti in an sim. Curuangah a tiapale pahnih Manasseh leh Efraim cu a pa veh ah a pita hngai. 2Jakob cu, “Na tiapa Josef a tan pha rom,” tiah an sim tikah a tha sangin a metnak ahcun a hang to. 3Culeh Jakob ni Josef hemah, “Kanaan ram ih Luz khua ah Pathian Zongzatikho cu ka hemah a lang ih ma thluasuah in, 4‘Tianau tampi ngei leh pungzai vuai in ka tan vua thok; cun hi ram hi na ciitlangle hemah namah hnukih an ngeihtiak pehzulh dingah ka ṭhen hngai thok’ tiah a ma ti. 5Curuangah Izipt ka phat hlanah na ca-ih Izipt ah hrin a imi na tiapale pahnih cu kamah ih an ii; Reuben leh Simeon cu kamah ih an ik mangin Manasseh leh Efraim cu kamah ih ta an ii. 6Anmah hnukih hrinmi ciitlangle zong cu namah ih an i kau thok. A rosarnak rum pehtlaitia in cu an ule ih min tangah ngankhumcih an i thok. 7Icatile Paddan-aram in ka kir lioa’khin, Efrath phat nakding lam hla nawn a om rih lio, lam lakah Rachel ni a ma thita; culeh Efrath#48:7 Efrath ti cu Bethlehem tican. tahnak lam, acunang a’cun amah cu ka vui ta,” tiah a ti.

8Israel ni Josef ih tiapale a hmuh hngai tikah, “Hile hi ahu ii u maw?” tiah a ti. 9Josef ni a pa cu, “Anmimi cu Pathian ni hina’hin a ma piak mi ka tiapale an ii,” tiah a ti. A pa ni, “Ka hemah phatpi hngai, a thluasuah hngai taw’ng,” tiah a ti. 10Israel cu a hraam, cun a mit an mal vel ih ṭhatein khua a hmu kho lo. Curuangah Josef ni a pa hemah a hruaita hngai; culeh a hnam hngai ih a bua hngai. 11Israel ni Josef cu, “Na hmel tan hmuh lei hman ka ringtia lo; atu cu Pathian ni na tiale khaw a ma hmuhsak hngai rom,” tiah a ti. 12Cutikah Josef ni a pa ih khuk parin a tiale cu a thawn hngai ih a hmai khur san ah a bok. 13Efraim cu a vorhlain tlaiin Israel ih kehlasan ah, cun Manasseh cu a kehlain tlaiin Israel ih vorhlasan ah ti in a pa hnaih ah a hruai hngai. 14Ihmansela Israel ni a kut kalhtiain a hei suah ih nauta a imi Efraim ih lu parah a vorhla kut, cun a kehla kut cu tia upa a imi Manasseh ih lu parah a suang. 15Josef cu thluasuah in:

“Ka pupale Abraham leh Isaak ni a hmaika ih

a rian an ṭuanmi Pathian,

nihinni tiang, ka san sung hmawh

a ma khaaltu a imi Pathian,

16harsatnak zate sungin a ma rungsuaktu vanmi,

tepangpale hi thluasuah hram uh;

an sungahhin ka min leh ka pulepa Abraham leh

Isaak ih min cu taan peh seh;

cun vulei cung a’hin mibuur pi ah cangin ṭhang u seh,” tiah a ti.

17A pa ni a vorhla kut cu Efraim ih lu parah a suang ti Josef ni a hmuh tikah a thin a nuam lo; curuangah a pa ih kut cu Efraim ih lu parin Manasseh ih lu parah thawn dingin a la. 18Josef ni a pa cu, “Ahitihin cu i hlah seh ka pa! Hi pa hi suak peita a ik ruangah na vorhla kut cu a lu parah suang sawn tu hmen,” tiah a ti. 19Ihmansela a pa ni a al ih, “Ka tiahkau, ka tia, ka tiahkau; ani khaw miphun a cang thok, ani khaw mipipa a cang thok. Ihmansela a naupa cu amah van a pipasawn thok ih a ciitlangpawl cu miphunpawl tampipi ah an cang thok,” tiah a ti. 20Curuangah acui ni ah thluasuah hngai in:

“Na min saalin Israel mi ni

thluasuah an pia tia thok ih,

‘Pathian ni Efraim mangin leh

Manasseh mangin

tan vua hram se law’ tiah

an ti tia thok,” tiah a ti.

Curuangah Efraim cu Manasseh hmalaah a sia. 21Cuhnukah Israel ni Josef cu, “Kei cu ka thi vel thok, a i na’n Pathian ni a tan ompi lei ih na pupale ih ram ah a tan phatpi ṭhan thok. 22Atu hi Amor mipawl hemin ka ralreen leh ka li rum ka latmi tlangzau (Shekhem) cu na ule van a hlei in ka tan pia,” tiah a ti.

Currently Selected:

Seemthawhnak 48: KHBF

Highlight

Copy