Seemthawhnak 47

1Curuangah Josef cu a tat ih Faraoh hemah, “Ka pa leh ka ulepawl cu an tuu leh merunpawl leh cawpe runpawl, cun an ngeihmi zate rum Kanaan ram in an pha rom ih atu hi Goshen ram ah an om,” tiah a sim. 2A ule lakin mi panga a ril hngai ih Faraoh hemah a suahpi hngai. 3Faraoh ni a ule cu, “Nan rianṭuan itu ii maw?” tiah a ti hngai. 4Culeh anmimi ni, “Na salle cu kan pupale mangin tukhalle kan ii. Hi ram a’hin tluangmi diinhmun in om dingah kan pha rom; icatile Kanaan ram ih mangṭaam a rauh ruangah na salle ih sumhnam runpawl caah sumpil a om lo. Atu-ah kan tan dil, na salle hi Goshen ram ah man omsak hram,” tiah an ti. 5Cutikah Faraoh ni Josef cu, “Na pa leh na ule an tan pha rom. 6Izipt ram cu na hmaikaah a omkau; na pa leh na ule hi ram sungih a ṭhatleng nang ah omhmun khuarsak hngai; Goshen ram ah om u seh; cun anmah lakah a tikhomi an om a’cun ka sumhnam zokhentu ah sia hngai,” tiah a ti.

7Cutikah Josef ni a pa Jakob cu a pita ih Faraoh hemah a suahpi, culeh Jokob ni Faraoh cu a thluasuah. 8Faraoh ni Jakob cu, “Na kum hi ii zet ii maw? tiah a ti. 9Jakob ni Faraoh cu, “Vulei parih ka khualtlon cu kum 130 a ii; ka nun caan cu tawi leh har a ii. Kan pupale an khualtlon kum hla pi rum cu tahṭhim awk an i lo,” tiah a ti. 10Cuhnukah Jakob ni Faraoh cu a thluasuah ih a hmaika cun a suakta. 11Josef ni a pa leh a ule cu Izipt ram sungahcun omhmun a khuarsak hngai ih, Faraoh ih thupiak mangin Izipt ram sungih a ṭhattleng nak Rameses ih ram ah hmunram a pia hngai. 12Culeh Josef ni a pa, a ule, cun a pa ih innsang cu anmah a hngatsantupawl mipun zulin awkdin ding a thlak hngai.

Izipt ram ih Mangṭaam

13Ram sung hmawh ah caw a om lo, icatile mangṭaam cu a rauh vuai. Izipt ram leh Kanaan ram cu mangṭaam ruangah an vuaiseen. 14Josef ni Izipt ram leh Kanaan ram ih hmuhkhawhmi tangka zate—an caw leinak cu a khawlkhawm hngai; cun tangka cu Faraoh ih inn ah a sia. 15Izipt ram leh Kanaan ram ih tangka an hman remro tikah, Izipt mipawl an zate ni Josef phain, “Caw man pia law. Ituruangah na hmaikaah cu kan thih lei? Kan tangka le a deng rom ah,” tiah an ti. 16Culeh Josef ni, “Nan tangka a deng a’cun nan sumhnam ma pia u la, nan sumhnam thlengnak ah caw ka tan pia hngai man lei,” tiah a ti hngai. 17Curuangah an sumhnampawl Josef hemah an pita; culeh Josef ni saile, tuu leh merunpawl, cawpe runpawl leh laakpawl thlengnak ah caw a pia hngai. Acui kum ah an sumhnam zate thlengnak ah caw a pia hngai. 18Acui kum a deng tikah, a hmai kum ah amah phain a hemah, “Kan tangka zate hman a ik rom cu kan bawipa na hemin kan thup kho lo, kan sumhnam runpawl khaw kan bawipa, namah ih an ikau. Kan bawipa, na hmuhhngan ah kan ruangpun leh kan hmunram ceu hi an taang. 19Na hmuhhngan ahhin kanmah leh kan ram hi kan thi sawh lei maw? Kanmah leh kan ram hi caw thlengnak ah man lei tia lawlaw tu. Kanmah cu kan khurram rum Faraoh ih salle kan cang kau lei; cawcii man pia men kau, cuticun thi loin a nung taw ung, cun ram khaw ramcar a cang hlah taw,” tiah an ti.

20Curuangah Josef ni Izipt ram zate cu Faraoh caah a lei Izipt rammi an zate ni an parah mangṭaam a rauh tuk ruangah an lopawl an zuar; culeh ram cu Faraoh ih ta ah a cang. 21Izipt ram khatla ne in khatla ne tiang minungpawl cu sal ah a vua hngai. 22Tlangbawile ih lopawl ceu a lei hngai lo; icatile tlangbawile cu Faraoh hemin riteek bonnak an ngah; Faraoh ih piak hngaimi bonnak in an nun ruangah an ram cu zuar an ṭul lo. 23Cutikah Josef ni mipi cu, “Atu hi nanmah leh nan khurram cu Faraoh ca-ih ka lei ruangah nan ca’h thlaici a om; khurram a’hin thlai thla uh. 24Culeh thlaikhawm caan ah ṭhen nga ṭhen khat cu Faraoh nan pia thok, cun ṭhen nga ṭhen li la cu nanmah ih a i thok—nan lo ca-ih thlaici leh nanmah leh nan innsang leh nan tiale notete ca’h caw a i thok,” tiah a ti hngai. 25Anmimi ni, “Nang ni kan nunnak a man rung rom; bawipa na lung awi kau seh, Faraoh ih salpawl kan i kau thok,” tiah an ti. 26Curuangah Izipt ram rum pehtlaitia in: Faraoh ni hmun nga ṭhen hmun khat a co thok timi daan pakhat Josef ni a vua, culeh atu tiangin a hmunkau. Tlangbawile ih hmunram ceu Faraoh ih ta ah a cang lo.

Jakob ih Netatleng Rocah

27Cuticun Israel cu Izipt ram sung Goshen khurram ahcun omhmun a khuar; culeh a sungahcun ngeihsiah an ngah ih tianau tam ngei in an pungzai vuai. 28Jakob cu Izipt ram ah kum hleisarih a om; curuangah Jakob a san sungih a kumpawl cu 147 a ii.

29Israel cu a thihnak caan a nai tikah a tiapa Josef koin a hemah, “Na mithmaiṭha ka co i taw ah, na kut ka phei tangah sia la, felte leh hmaante-ih ma ti dingah thu khaamtia. Izipt ram sungahcun ma vui hlah. 30Ka pupale hemih ka thih-met tikah Izipt ram hin ma thiarta la anmah vuinak hmun ah ma vui lei ci,” tiah a ti. Josef ni, “Na sim mangin ka ti kau thok,” tiah a ti. 31A pa ni, “Thu ma khaam,” tiah a ti; culeh Josef ni thu a khaam. Cuhnukah Israel cu a metnak lula ah a lu kuum in Pathian a bia.

Currently Selected:

Seemthawhnak 47: KHBF

Highlight

Copy