Seemthawhnak 43

A Ule cu Benjamin Hruaita in an Pha Ṭhan

1Ram sungah mangṭaam cu a rauhkau. 2Culeh Izipt in an leimi caw an philh ngah tikah an pa ni, “Tat sei u la, kan ca’h caw tlawmlio lei tu uh,” a ti hngai. 3Ihmansela Judah ni, “Ramuktu ni, ‘Nan naupa nan hemih a tel lo a’cun ka hmel a ma hmuhngah hngai hrimhrim thok lo henakhawh’ tiah ngekngeihin ralrin a man pia hekhawh. 4Kan naupa kan hemih na thlah a’cun zong tatin caw kan tan lei kau thok; 5na thlah lo zong a’cun kan zong tat lei lo, icatile Ramuktu ni, ‘Nan naupa nan hemih a tel lo a’cun ka hmel nan hmuhngah thok lo henakhawh’ tiah a man ti,” tiah a ti. 6Israel ni, “Mipa hemah nau pace nan ngeih tiang simin ituruangah ka parah siavangai cun a ma ti hngai a he?” tiah a ti. 7Anmimi ni, “Mipa ni kanmah leh kan sungkhat thuhla cemmehngai a man dil ih, ‘Nan pa teh a nung rih maw? Unau pace teh nan ngei maw?’ man ti hluan in. Amah kan simmi cu ahi thudilnakpawl lehnak ah a ii hekhawh. ‘Nan naupa zon hruai uh’ a man ti thok cu khawti’n hmen kan tiah cia khawh lei?” tiah an ti. 8Cuhnukah Judah ni a pa Israel cu, “Tepangpa cu kamah rum thlah kau la kan lam cu kan tat kau lei, cuticun nang leh keimi leh kan tiale tete cu thi lo’n a nung taw ung,” tiah a ti. 9Kamah rori hi amah ca’h aamahkhan ikau lang; amah ca-ih ṭuanvongei ah ma tlaihtia. Na hemah hruai ṭhan lo leh na hmaiah ka phatpi lo a’cun mawhthluk tuar tlaitluan tia lang. 10Nolnawk ta hlah ung la atu cu voi hnih theih kan kir rom thok na’n,” tiah a ti.

11Cutikah an pa Israel ni an hemah, “Acuti a ik thok a’cun ti u la he: ram sungih thingvuang ṭhatleng nan dip sungah sangta u la, mipa ca-ih laksawng ah—pazuksi tlawmte, khuailuati tlawmte, kaw tlawmte, myrrh rimhmui, sabit car tlawmte, meete vuang tlawmte—zon keng uh. 12Tangka cu a lethnih in kengta uh. Nan dip cungtatleng ih nan hmuhmi tangka khaw kengta ṭhan uh; tisual i pang le sela. 13Nan naupa cu hruaita u la, mipa hema’cun tat ṭhan kau uh; 14Pathian Zongzatikho ni mipa hmai a’cun tan thluasuah hngai hram seh, cuticun nan nau pace leh Benjamin cu a thlah taw. Kei sawh hi cu tiale ih hmattaakmi ka ik thok a’cun ikau sawh lei tu ung,” tiah a ti hngai. 15Curuangah laksawng an keng, cun tangka khaw a lethnih an kentia, Benjamin khaw an hruaita. Cuhnukah Izipt tiang an lam cu an zong tat, culeh Josef hmala ahcun an suak.

16Josef ni Benjamin an hemih a tel a hmuh tikah a innsang kiltupa hemah, “Hile hi ka inn sungah luhpi hngai la, sumhnam pakhat that in tuahtiim, icatile sun ah kei rum caw an aw thok,” tiah a ti. 17Mipa ni Josef ih ti mangcun a tiih acule cu Josef ih inn sungah a luhpi hngai. 18Josef ih inn sungah luhpi an ik ruangah an thin a phangih, “A peita a’khin kan dip sungah tangka san ṭhan a ik ruangah man puh ih man doh nakding caanṭha ngah dingah, sal ah man vuaktia’n kan laakpawl lattiak dawt ah inn sungih a man luhpi nak a ikau cu,” tiah an ti. 19Curuangah Josef ih innsang kiltu hemah tatin inn sung luhnak sangka hram ahcun thu an sim. 20“Maw bawipa, peita ṭum ah caw lei dingin kan zong; 21culeh kan caamnak hmun kan phat tikah kan dip kan kaau ih kan dip vek a cungtatleng ah kan tangka cu kimte’n a omkau. Curuangah kan kengta ṭhan hi. 22Cuhleiah caw lei nakding tangka hlei khaw kan ken beeng. Ahu ni kan dippawl sungah tangka a sang ti tiah hlah hu ee,” tiah an ti. 23Ani ni, “Thindaite’n om kau uh, nan thin phang hlah uh; nan Pathian leh nan Pa ih Pathian ni nan dippawl sungah hlawnthil an tan san a i kau thok; nan tangka cu ka cosang,” tiah a let hngai. Cuhnukah Simeon cu an hemah a hei suah. 24Inn zokhentu ni Josef ih inn sungah a luhpi hngai, ti a pia hngai ih, an ke an ṭawltiak hnuk leh an laakpawl caw a barh hngai hnukah, 25sunla ih Josef a phat thok caah an laksawng cu an tiari, icatile acunangah caw an aw thok ti an tiah.

26Josef inn a tlun tikah inn sungih an kenmi laksawng cu a hemah an puta ih a hmaiah khur sanla ah an kuum. 27An thuhla a dil hngai ih, “Nan pa, pahraam nan ti cu teh a damkau maw? A nung rih kau maw?” tiah a ti hngai. 28Anmimi ni, “Kan pa, na tungsau cu a damkau, a nung rih,” tiah an ti. Culeh an kuum ih a hmaiah khuk an bil. 29Cutikah khua a zoh ih, a nu ih tiapa, a u Benjamin cu a hmu, culeh “Hihi nan nauhniang tiah a ma sim hngai mipa cu a ii maw? Pathian na parah velngei hram se law, ka tiapa!” tiah a ti. 30Acu cun Josef cu a u a dawtnak ni a hret leh a ṭah samte ruangah a suah caal. Amah bul khaan ah a lutin acunang ahcun a ṭap. 31Cuhnukah a hmai a phiahtia ih a va suak; cun suptia tingtengin, “Caw zaal uh,” tiah a ti hngai. 32Ani cu a bulin, anmimi cu an bulin, cun Izipt mi amah rum caw aw tu mile khaw an bulin caw an bar hngai. Icatile Izipt mipawl cu Hebru mipawl rum caw an aw khat thiam lo; Izipt mi caah hnomtamnak a ii. 33A hmai ih an to tikah an suahdan zulin upatleng in nautatleng a sontia rianro in an to ti an hmuh tikah pakhat leh pakhat donharin an zoh tia. 34Josef ih cabuai in caw cu an beeng hngai, a i nain Benjamin cu anmimi ih co vanin let nga a tamsawn. Cuticun an ding ih amah rum cu an nuamtia.

Currently Selected:

Seemthawhnak 43: KHBF

Highlight

Copy