Seemthawhnak 37

Josef ni Nasatnak Mang a Man

1Josef cu a pa ni tluangmi in a om taak nak Kanaan ram ahcun omhmun a khuar. 2Hihi Jakob ih innsang thuanthu cu a ii.

Josef cu kum hleisarih a kim vel ih, a ule rum tuu leh merun an khaal; ani cu a pa ih nusunle Bilhah leh Zilpah ih tiapale bawn hngai tu a ii ih an thuhla sia cu a pa hemah a tiahsak bil. 3Israel ni Josef cu a hraam vel la ih a ngeihmi tiapa a ik ruangah a tiale pace vanin a dawdeuh; culeh angkitual bansau a ṭhit piak. 4Ihmansela an pa ni a ule vanin amah a dawdeuh ti a ule ni an hmuh tikah amah cu an hua ih remdaitein an bia kho lo.

5Voi khat cu Josef ni mang a man ih a ule a sim hngai tikah an hua hlehhlo. 6An hemah, “Ahi ka mang manmi hi ma ngai hnik uh. 7Lo sungah cawthlang kan ṭawn ciamco. A voikhatte ah ka cawthlang cu a hang tung ih dingte’n a diing; nan cawthlangpawl cu a velkim ah an von tumtia ih ka cawthlang hmaiah an kuum,” tiah a ti hngai. 8A ule ni a hemah, “Nang hi kan cungah siangphahrang in a man uk taktak thok a he maw? Kan cungah bawi na ṭuan ngaingai thok hetuhmen?” tiah an ti. Cuticun a mang leh a aanka ruangah amah cu an hua hlehhlo.

9Mang pace a ngei ih a ule sim hngai in, “Ngai hnik uh, mang pace ka ngei: ni, thlapa, leh arsi hleikhat cu ka hmaiah an kuum,” tiah a ti hngai. 10Ihmansela a pa leh a ule a sim hngai tikah a pa ni hriingṭon in, “Acui na manmi mang cu itu a i zetzo? Kei leh na nu leh na ule cu na hmaiah, suakin khur ah kan kuum taktak lei maw?” tiah a ti. 11Curuangah a ule ni an iksik, a pa ni zong cu ahi thuhla hi a thinlung sungah a cingkeng reuhro.

Josef cu a Ule ni an Zuar

12Josef ih ule cu an pa ih tuu leh merun khaal dingin Shekhem hrialah an tat. 13Culeh Israel ni Josef cu, “Na ule Shekhem ah tuu leh merun an khaal a i lo hmen maw? Ma pha la, an hemah ka tan thlah thok,” tiah a ti. Josef ni, “Awi law, ka omkau ee,” tiah a ti. 14Curuangah a pa ni a hemah, “Atu tat lei ci khawh na ulepawl leh tuu leh merun an damṭha maw ti zoh ta hngai; cun thu ma phurh ṭhan,” tiah a ti. Curuangah a pa ni Hebron horrawn in a thlah.

Shekhem ah a pha ih 15pakhat pa ni lo sungah vak luala in a hmu; mipa cu ni, “Itu ii maw na hrawl rero?” tiah a dil. 16“Ka ule ka hrawl hngai hepangkhaw, khawnangah tuu leh merun an khaal ti naktiahte’n ma sim hram law,” tiah a ti. 17Mipa cu ni, “An vak mianmi rom kovawh, icatile, ‘Dothan ah tat le hu an ti tiak ka za hngai’ ” tiah a ti. Curuangah Josef cu a ule dung cun a tat ih Dothan ah a hmu hngai. 18Lam hla in an hmu ih an hrial a phat hlanah amah thah ding thu an phiarthup. 19Pakhat leh pakhat, “Mangmanpa a pha hi tang. 20Suak u la that he lu khawh khur awng pakhat ah zam le hu; cuhnukah sahraang ni a aw remro tiah kan ti thok, cun a mangpawl itu an can kan zoh hnik thok,” tiah an ti tia. 21Ihmansela Reuben ni acu cu a zak tikah an kut in runsuah khaaitia hratin, “A nunnak cu la meeng hlah le hu,” tiah a ti. 22Cun, “Thisan cu luang hlah seh; hi hramlak ih khur awng sungah thla uh, a parah kut zong thlah hla’ uh,” tiah a ti hngai—an kut in rungsuak ih a pa hemah phatpi ṭhan dingah a ii. 23Curuangah Josef cu a ule hem a phat tikah a khawhtiakmi angkitual bansau cu an phoihla; 24cun an pon ih khur awng sungah an thla. A khur awng cu a kawlawngpi a ii, a sungah ti a om lo.

25Cuhnukah caw aw dingin an to; culeh khua an zoh tikah Gilead la in an kalaukpawl rum kaw, pazuksi leh thingthling phur in Izipt la ih a tat tu Ishmael mi sumlet buur khat an hmu. 26Cutikah Judah ni a ule cu, “Kan naupa that in a thisan thup hu la itu a ṭhahnem thok hmen? 27Ishmael mipawl hemahhin zuar le hu khawh a parah kan kut cu thlaktia hlah le hu, icatile kan naupa, kan thi leh sa a ii henaah,” tiah a ti hngai. Culeh a ule cu an naa a tla. 28Midian mi sumlet hrekkhat an omnak palpah in an phat tikah Josef cu khur awng cun an han dawksuak ih Ishmael mile hemah ngun tangka kul ah an zuar.

29Reuben cu khur awng ah a kirṭhan Josef cu khur awng ah a om lo ti a hmuh tikah a partlaipawl a thleek hngai. 30A naule hemah kir in, “Tepangpa a om ti lo hi, khaw’h hi lei maw ka zuan?” tiah a ti. 31Cutikah Josef ih angkitual cu an la, mee lu khat an tal ih a angkitual cu mee thisan sungah an hnim. 32Angkitual bansau cu an pa hemah an phatpi ih, “Hihi kan hmu; na tiapa ih angkitual a ik leh iklo zoh hnik law,” tiah an ti. 33A tiahthiam ih, “Ahi hmawh ka tiapa ih angkitual a ii, sahraang ni a sa a aw remro rom a ik tu; Josef cu thlehbauh remro a ik cu,” tiah a ti. 34Cutikah Jakob ni a partlaipawl a thleek hngai ih a tai ah bawri ngerhtiain ni tlungpi sung a tiapa zuun tuarin a om. 35A tiapapawl leh a tianupawl an zate ni a thinhnem an zuamtia, ihmansela hnem ik ding cu a al ih, “Ma hnem hla’ uh. Mithikhua, ka tiapa hemah zuun tuarin tat kau lang,” tiah a ti. Cuticun a pa ni a ṭah kau. 36Culioah Midian mipawl ni Josef cu Izipt ram Faraoh Siangphahrang innkiltu ralbawipa Potifar hemah an zuar.

Currently Selected:

Seemthawhnak 37: KHBF

Highlight

Copy