Seemthawhnak 15

Pathian leh Abram ih Thukam

1Ahi thilpawl hnukahhin Pathian ih aanka cu Abram hemah lansaknak sungin a pha, “Abram hrul hlah law, kei cu na lum ka ii; na ngahvo cu a pipa vuai thok,” tiah a ti. 2Ihmansela Abram ni, “Maw Bawipa Pathian, itu i lei maw a ma piak? Icatile kei cu tianaulo ik ka pehzulh ih ka innsang ih rocotu cu Damaskas ih Eliezer khi a ii hekhawh. 3Cun ciitlangle ma pia hlah ci khawh ka inn ih suak mi sal pakhat cu ka rocotu a i lei tang,” tiah a ti. 4Ihmansela Bawipa ih aanka cu a hemah a pha ih, “Hi pa hi cu na rocotu a i thok lo; namah sung rori in a suakmi simlo ahuhman na rocotu a i thok lo,” tiah a ti. 5Pawnla ah hei suahpi in, “Vancungla han cuan hnik la, arsipawl cu na siar hngai khawh a’cun siar hngai hnik. Na hrinsarle khaw acu zet cu an i thok,” tiah a ti. 6Culeh Bawipa cu a zum; cun Bawipa ni acu cu dingnak ah a siar piak.

7Cuhnukah Bawipa ni Abram cu, “Hi ram hi na ngeihtiak dingah tan pia dingin Khaldea mipawl ram Ur khua in a tan suahpi tu cu Bawipa kei ka ii,” tiah a ti. 8Ihmansela Abram ni, “Maw Bawipa Pathian, acu cu ka ngeihtia thok ti khawti’n ka tiahthiam thok hmen?” tiah a ti. 9Pathian ni, “Kum thum kim cawpe numi, kum thum kim mee numi, kum thum kim tuu pami, thunu lu khat leh laileeng lu khat ka hemah ma kenta,” tiah a ti. 10Hipawl hi a kengta hngai ih an sa cu kawm hnih ah kawm hngai in, van khat leh van khat hmaitontia-in a sia hngai; vatele cu acuticun a kawm hngai lo. 11Langtale ni sa cu an tem khaai nain Abram ni a ṭhawlla hngai.

12Ni a pil vel tikah Abram cu a met ni a thlim thliahthlo ih a parah khuamaw sahpi leh ṭihṭha ngaipi a tlung. 13Cutikah Bawipa ni Abram cu, “Na ciitlangle cu an ram a i lomi ah tluangmi an i thok, cun acunangah salpawl an i thok ih kum 400 sung namneh an i thok ti hi tiah law. 14Ihmansela an ren mi miphun parah thuṭhennak ka phatsak thok, cun acuhnukah ngeihsiah tampi rum an va suak leh thok. 15Nang tu cu na pupale hemah daite’n na tat thok; nuamngaiin na hraamkha laah vui na i leh thok. 16Cun san linak ah hina’hin an kirṭhan thok; icatile Amor mile ih ṭhatlonak cu a kimngah rih lo,” tiah a ti.

17Ni a pil hnuk khua a mawt tikah, a khumi mei am pakhat leh a alhmi meitung cu acui canmi sapawl lakkarah an vak. 18Acui ni ah Bawipa ni Abram rum thukam vua in, “Hi ram hi Izipt tipi in tipi hnempi, Zufrates tipi tiang, 19Ken mile, Keniz mile, Kadmon mile, 20Hit mile; Periz mile, Refaim mile, 21Amor mile, Kanaan mile, Girgash mile, cun Jebush mile ih ram hi na hrinsarle ka ṭhen hngai thok,” tiah a ti.

Currently Selected:

Seemthawhnak 15: KHBF

Highlight

Copy