Seemthawhnak 13

Abram leh Lot an Ṭhentia

1Curuangah Abram cu a nupi, a ngeihmi zate, cun Lot rum, Izipt in Negeb laah a hang tat.

2Abram cu a lian vuai ih sumhnam, ngun leh sui tampi a ngei hngai. 3Negeb cun Bethel ban, a thawntia miarmo, Bethel leh Ai lakkar, a pek ih a puanthlaam om taak nak hmun, 4peitleng ih pakawh a don taak nak hmun, a pha; culeh acunangah Abram ni Bawipa ih min koin a bia. 5Amah rum a tat tu Lot khaw turunpawl, cawrunpawl leh milaipawl a ngei hngai ve, 6curuangah an pahnih omkhat cu khurram ni a tlum hngai lo; icatile an ngeihsiahpawl an tam tuk ih an omkhat kho lo, 7cun Abram ih sumhnamrun kiltupawl leh Lot ih sumhnamrun kiltupawl lakkarah bawhtiaknak a om. Acu lioah acui ram sungah Kanaan mipawl leh Periz mipawl an om.

8Cutikah Abram ni Lot cu, “Nang leh kei lakkarah, cun na sumhnam kiltupawl leh ka sumhnam kiltupawl lakkarah bawhtiaknak om hlah seh; icatile sungkhat kan ii. 9Hi ram zate hi na hmaikaah a om a i lo hmen maw? Ṭhektia sawn le he. Keh-lasan ah na tah a’cun kei vorhlasan ah ka tat thok; iklole vorhlasan ah na tah a’cun kei kehlasan ah ka tat thok,” tiah a ti. 10Lot cu a hrialkam a zoh ih, Jordan hmunrawn cu Bawipa ih duum mangin ṭhate-ih ti a ngahmi a ii; Zoar la ran cu Izipt ram mang a ii ti a hmu. Cucu Bawipa ni Sodom leh Gomorrah a siatsuah hlan mang khi a ii. 11Curuangah Lot ni Jordan hmunrawn zate a ril, cun vapinla ah a tat; cuticun pakhat leh pakhat an ṭhektia. 12Abram cu Kanaan ram sungah a om ih Lot cu Hmunrawn khuapipawl ah hmun a khuar ih Sodom tiang phain buuk a sa. 13Sodom khuamipawl cu midupdul, Bawipa parih misual vuai an ii.

14Lot ni a ṭhen taak hnukah Abram cu Bawipa ni, “Na omnak hmun cun sakla leh thlangla, vapinla leh vongpinla khua cuan hnik; 15icatile na hmuhmi ram a zate namah leh na ciitlang hemah ka tan ṭhen hngai tlaitluan thok. 16Na ciitlang cu vulei ih leivut zet ka iksak hngai thok; cuticun mi pakhat ni vulei parih leivut a siar khawh a’cun, na ciitlang khaw siar khawh an i thok. 17Tho lei ci khawh ram ih a sau leh a kauh zet in vak, icatile acu cu ka tan ṭhen thok,” tiah a ti. 18Curuangah Abram ni a buuk a thawn ih Hebron ih Mamre khukkhih kungpawl omnak ah omhmun a khuar; culeh acunangah Bawipa caah pakawh a don.

Currently Selected:

Seemthawhnak 13: KHBF

Highlight

Copy