Seemthawhnak 11

Babel Lungdawl

1Voi khat lioahcun vulei punpuhluk aan phun khat leh aanta sakhat an hmang ta. 2Nisuahnakla ih an vaih tikah Shinar timi ram ih hmunrawn an pha ih acunangah omhmun an khuar. 3Culeh pakhat leh pakhat, “Suak u law. Phalei vua le hu khawh ṭhate’n ro le hu,” tiah an ti tia. Culeh lung caah phalei, a sorhnak kattaza caah thun an ngei. 4Cuhnukah, “Suak u law, khuapi pakhat vuak tia le hu, a zim van han tongin, lungdawl pakhat rum, cun kan minthannak vua le hu; culocu vulei cung punpuhluk ah man ṭhehzarsak lei-a,” tiah an ti. 5Minungpawl ih vuakmi khuapi leh lungdawl zoh dingah Bawipa cu a zong ṭum. 6Culeh Bawipa ni, “Zoh hnik uh, anmimi hi miphun phun khat an ii, cun aan phun khat ceu an ngei; culeh hihi an thil vuak thokmi ih a thawhnak ceu a ii; vuak ding an timi ituhman an ca’h a cangkholomi a om thok lo. 7Suak uh, zong ṭum le hu khawh an aan hnokcincen in vua le hu; cuticun pakhat leh pakhat an aan a ciingtia hlah taw uh,” tiah a ti. 8Curuangah Bawipa ni vulei cung hmunzakip ah a ṭheekzar hngai, culeh khuapi vuak cu an awl. 9Curuangah khuapi cu a min ah Babel tiih kawh a ii, icatile vulei cung zate ih aan cu hnokcincen in a vua; cun acunang cun Bawipa ni vulei cung hmunzakip ah a ṭhehzar hngai ruangah a ii.

Shem ih Hrinsarle

10Hile hi Shem ih hrinsarle an ii. Shem cu kum 100 a kim tik, tinik hnuk kum hnih ah, Arpakshad ih pa ah a cang; 11culeh Shem cu Arpakshad a suah hnukah kum 500 a nung ih tiapale pace leh tianule a ngei hngai.

12Arpakshad cu sawmthum kum nga a ti tikah Shelah ih pa ah a cang; 13cun Arpakshad cu Shelah suah hnukah kum 403 a nung, cun tiapale pace leh tianule a ngei hngai.

14Shelah cu kum sawmthum a ti tikah Eber ih pa ah a cang; 15culeh Shelah cu Eber suah hnukah kum 403 a nung, cun tiapale pace leh tianule a ngei hngai.

16Eber cu sawmthum kum li a ti tikah Peleg ih pa ah a cang; 17culeh Peleg suah hnukah Eber cun kum 430 a nung, cun tiapale pace leh tianule a ngei hngai.

18Peleg cu kum sawmthum a ti tikah Reu ih pa ah a cang; 19cun Peleg suah hnukah Reu cu kum 209 a nung ih tiapapawl pace leh tianupawl a ngei hngai.

20Reu cu sawmthum kum hnih a ti tikah Serug ih pa ah a cang; 21cun Serug suah hnukah Reu cu kum 207 a nung, cun tiapale pace leh tianule a ngei hngai.

22Serug cu kum sawmthum a ti tikah Nahor ih pa ah a cang; 23Nahor suah hnukah Serug cu kum 200 a nung, cun tiapale pace leh tianule a ngei hngai.

24Nahor cu kum kul hluankua a ti tikah Terah ih pa ah a cang; 25cun Terah suah hnukah Nahor cu kum 119 a nung ih tiapale pace leh tianule a ngei hngai.

26Terah cu kum sawmsarih a ti tikah Abram, Nahor leh Haran ih pa ah a cang.

Terah ih Hrinsarle

27Hile hi Terah ih hrinsarle an ii. Terah cu Abram, Nahor leh Haran ih pa ah a cang; cun Haran cu Lot ih pa ah a cang. 28Haran cu a pa Terah hlanah, a suahnak ram, Khaldia mipawl omnak Ur ah a thi. 29Abram leh Nahor cu nupi an la; Abram ih nupi cu Sarai a ii, cun Nahor ih nupi cu Haran ih tianu Milkah a ii. Haran cu Milkah leh Iskah ih pa a ii. 30Sarai cu a cing; tianau a ngei lo.

31Terah ni a tiapa Abram leh a tupa Lot, Haran ih tiapa, cun a vah-nu Sarai—a tiapa Abram ih nupi—kota hngai in, Khaldia mipawl ih ram Ur khua in Kanaan ram ah an tat khat; ihmansela Haran an phat tikah acunangah omhmun an khuar. 32Terah ih san sung cu kum 205 a ii; culeh Terah cu Haran ah a thi.

Currently Selected:

Seemthawhnak 11: KHBF

Highlight

Copy