ROME 12

Pathian Naperhnak Caah

1Ciatih ilekhaw u le naute Pathian ai ninghiohnak manin ning ruang pumpui tu a thiangmi le a cotlak hibawlhnak hnahpha bangin Pathian hnenah pe tu ih, tiin ning ngen ing. Ciami tu Pathian hnenah na pe tuhhnak biahnak taktak ihang. 2Hemi laivumdan ah kop nawn mah ih; ciatah in ning thinlung khiah a thar in thleng tu sawn ih. Ciatihin Pathian ai daihhnak heh ling tuhai Pathian ai hmaiah ziang pha i, ziang heh a anghnak i ti le ziang heh a semkhim i ti ling tuh i si.

3Pathian in a ninghiohnak lehsawng i pehnak manin pumpak ṭen ning hnenah hetihin rel ing: Ning ruat dun tuhhnak tahin sang deuh in ruat dun mah ih. Zaibang ing ti khiah ling dun tu sawn ih lai Pathian in sanghnak ning pehnak bang ṭen in ning ruatdunhnak i tu sawn seh. 4Kin ruangpui heh pakhat inapui taksasem tampui um ai cia taksasemte ai naperhnak tu bang dun lo i.#1Cor 12:12 5Cia bangin kin khai mi tampui inapui sing ai Khrih thawn pehzomdunhnak ah pumkhat ising. Kin ruangpui ai taksasemte a peh dun sio bangin peh dun ve sio ising. 6Ciamanin lehsawng phun dangdang kin ngahhnak tu Pathian ninghiohnak kin co zah ṭen in hmang tuh ising. Kin ngahhnak lehsawng heh Pathian thu phuang tuh ilesingkhaw sanghnak kin cohnak zah in phuang ngasing;#1Cor 12:4-11 7ciabang pah in midang na ruaihtu tuh ilesingkhaw ruaih ngasing; zirhtu tuh ilesingkhaw zirh ngasing; 8midang thapetu tuh ilesingkhaw tha pe ngasing. Kin naihnak thilri heh midang hlawm tuh ilesingkhaw siang ngai in hlawm ngasing. Hotu tuh ilesingkhaw kol ngai in per ngasing; midang hnenah ninghiohnak larruaitu tuh ilesingkhaw ang ngai in larruai ngasing.

9Ithnak kin tifangin thinlung taktak in it tuhhnak i. Thil siava heh hua tu ilai thil pha heh kho ngai in awh tu ih. 10Khristian unau tlang ning imanin pakhat le pakhat it dun tu ih. Pakhat le pakhat hmaizah dun thiam tu ih. 11Thazawng mah ih, zuam ngai in naper tu ih. Ning thinlung veksen pe in Bawipa ruaih tu ih. 12Ning umlamhnak in ning angruai tuseh; harsahnak ning tawk fangin thin sau in um tu ih, catloin sawngen tu ih. 13A farahmi Khristian unaute thawn ning naihnak hlawm dun tu ih. Cen mikhualte caah ning dawngkham hong tu ih.

14Ning reemtute caah awrsiathnak ilo in hmuifu heh Pathian hnenah ngen sah tu sawn ih.#Mat 5:44; Luk 6:28 15A angtute thawn ang tlang tu ilai a kap mite thawn kap tu ih. 16Ningmah ca ning ruat bangin midang ca ahkhai ruat tu ve ih. Kaimah ber panpan ing, tiin ruat dun mah ih; naper ṭukṭak niuniu per zuamhnak thinlung nai tu ih. I fim i tiin ruat dun mah ih.#12:16 Naper ṭukṭak niuniu per zuamhnak thinlung nai tu ih ti khiah Greek pong umdan ah “farah harsate thawn pawlkomhnak bawn tu ih” ti khai i thai i.#Thuf 3:7

17Mi pakhatkhat in ning vumah phatlohnak bawn fangin a vumah phatlohnak thawn rulthun mah ih. Aisusu inkhai a pha a mawi tihnak bawn zuam tu ih. 18Mi zongzong thawn rem niu in um tuh heh a cang thil tawp in zuam tu ih. 19I rualte, zaikom inkhai phuzul tum mah ih; Pathian thinrawhnak sawn in ciami heh bawn tuseh. Zaimantifangin Lai Thianghlim songah, “Kaimah in phuzul tuh ing; Kaimah in rulthun tuh ing, tiin Bawipa in ti i,” tiin um i.#Danp 32:35 20Cen Lai Thianghlim in, “Na ral a rikam lekhaw rong pe tu; ti hal lekhaw ti pe tu, ciatihin bawn le i sikhaw a lu vumah mailing dah bang i tuh i.#Thuf 25:21-22 21Phat lohnak in ning neh maseh, phatlohnak heh phathnak in neh tu sawn seh.

Currently Selected:

ROME 12: RZB

Highlight

Copy