MIPUM SIARHNAK 4
4
Levi Miphun Kohath Hinte ṭuanvo
1 Bawipa in Moses tu, 2“Levi mi Kohath hinte khiah amahte songkhat le innsang ṭen in mipum siar tulai, 3Thukham dahhnak Ponhlam songah naper thaitute, kum sawmthum le kum sawmnga karlak pasal hmuahhmuah hmingkhum tu. 4Amahte ruaih tuhhnak tu a thianghlim ber i,” tiin ruai i.
5 Bawipa in a hnia lamai dante tu Moses hnenah pe i; Ning riahbuk ning thawn tuh fangin Aaron le a fapate tu Ponhlam songah lut tuhai Thutiam Kuang hmai ai umhnak ponzar lang tu selai ciami in Thutiam Kuang khuk tuseh. 6Ciami vumah saphaw a pha ber in khuk tu selai pon a mepian in khuk bet tuseh; cen a zawnghnak a laangte rolh tuseh.
7 Bawipa hnenai selhnak sang dahhnak cabuai heh pon a mepian in khuk tu selai a vumah pakante, rimhmui hlengte, hibawlhnak hlengte le cabit palangte dah tuseh. Cabuai vumah catloin sang dah tuseh. 8Ciamite vumah pon san in khuk tuhai saphaw pha ber in khuk bet tuseh; cia hnuaah a zawnghnak laangte rolh tuseh.
9Maivarhnak khuam heh maivarhnakte, caicepte, maitaihnak thir belpaite, le olive siti dahhnak dawngte thawn pon a mepian in khuk tuh i si. 10Ciami thilrite thawn maivarhnak khuam heh saphaw a pha ber in tuam tu selai a zawnghnak lang vumah dah tuseh.
11Cen sui puleng heh pon a mepian in khuk tuhai saphaw pha ber in khuk bet tuseh; cia hnuaah a zawnghnak lang rolh tuseh. 12Hmun Thianghlim ai hmanghnak khokhengte hmuahhmuah heh pon a mepian in tuam tu selai saphaw pha ber in khuk ai a zawnghnak lang vumah dah tuseh. 13Sathau thawn roihhnak vutkuang heh puleng in lawk tuhai pon sannum in khuk tuseh. 14Cen a vumah puleng ai hmanghnak thilri hmuahhmuah: maitaihnak hlengte, sa thurhnak darkeute a kak nai, vutkuang lawkhnak hlawhpekte le maihumte dah tuh i si. Cen saphaw pha ber in khuk tuhai a zawnghnak laangte rolh tuh i si.
15Cam hmun ning thawn fangin Aaron le a fapate in thilri cianghlim a daizarh hmuahhmuah a khuk ben sek fang ian in Kohath hinte tu a phurtu tuhin kawi tlang tuseh. Ikhalselai a phur tlang fangin dai hrimhrim maseh; dai ngah pang lekhaw thi tuh i.
Ponhlam thawn fangin na ruaih kulhnak tepawl tu Kohath hinte ṭuanvo i.
16Suangbawi Aaron ai fapa Eleazar in Ponhlam pumpalah le mai hrang siti, rimhmui, rong hibawlhnak, pawh tuh thau, le Ponhlam songai umhnak Bawipa thil hmuahhmuah sik tuseh.
17 Bawipa in Moses le Aaron hnenah, 18“Kohath hinte tu thil cianghlim hiangah kawi maseh. 19Thihnak tawk pang tuh i. Thihhnak tawk lohnak tuhin Aaron le a fapate lut tu selai amahte bawn tuhhnak thiah dun tuseh. 20Ikhalselai suangbawite in thil cianghlim pawl thawn tuhin a ruat lakah Kohath hinte Ponhlam song lut in sik lekhaw thi tuh rori i,” tiin ti i.
Levi Miphun Gershon Hinte Ai ṭuanvo
21 Bawipa in Moses hnenah, 22“Levi phun, Gershon hinte tu amahte songkhat le innsang ṭen in mipum siar tulai, 23Bawipa umhnak Ponhlam songai naperthaitu kum sawmthum le kum sawmnga karlak pasal hmuahhmuah hmingkhum tu. 24Cen amahte phur tuhhnak thilrite tu, 25Ponhlam, a song khuh le a pua khuh thawn, a vum khuh saphaw pha ber le a song luthnak dawngkham ponzar, 26Ponhlam le puleng kulh ai hmanghnak ponzar le rihualte, dawngkham khuh ponzarte le he thilrite hrang a kulhnak thil terek hmuahhmuah i. Hemi thilrite hrang ai a kulhnak hmuahhmuah bawn tuseh. 27Aaron le a fapate phur tuhhnak le ṭuanvo pehnak hmuahhmuah bawnthilhnak tuhin Moses le Aaron ningmah rori in felniu in sik tu ih. 28A vum lamai bangin Ponhlam songai ṭuanvo heh Gershon hinte in lang tu selai suangbawi Aaron ai fapa Ithamar ho in bawn tlang tuseh.
Levi Miphun Merari Hinte Ai ṭuanvo
29 Bawipa in Moses hnenah, “Levi phun Merari hinte tu amahte songkhat le innsang ṭen in mipum siar tulai, 30Bawipa umhnak Ponhlam songai naperthaitu tuh kum sawmthum le sawmnga karlak pasal hmuahhmuah a hming hmingkhum tu. 31Amahte in ponhlam ai ruhkuangte, bangphaite, khuamte, khuam kedote, 32Ponhlam kulhhnak khuamte, khuam tohdante, risihhnak khenfete, rihualte le he thilrite hrang a kulhnak thil terek hmuahhmuah a phurtu tuh i. Amahte hming sal fekfek in phur tuhhnak ṭen pe i tuh i. 33Ponhlam songai Merari hinte ṭuanvo tu a vum lamai bangin i. Suangbawi Aaron ai fapa Ithamar ho in bawn tuseh,” tiin ti i.
Levi Phunte Mipum Siarhnak
34 Bawipa ai thupeciahnak hlun in Moses, Aaron le Israel miphun konghoitute in Levi nam Kohath hinte tu amahte songkhat le innsang ṭen in mipum siar ai, 35Ponhlam songai naper tlak mi kum sawmthum le kum sawmnga karlak pasal hmuahhmuah hmingkhum sio i. 36Hmingkhum mi minung thawng hnih za sarih le sawmnga um i. 37Bawipa in Moses hnenah thupeciahnak bangin Kohath hinte tu Moses le Aaron in mipum siar kawm ai Ponhlam song na ruaih tlak mi minung hezah i.
38Gershon hinte tu amahte songkhat le innsang ṭen in mipum siar ai, 39Ponhlam songai na ruaih tlak mi kum sawmthum le kum sawmnga karlak pasal hmuahhmuah hmingkhum i. 40Hming a langhnak minung tu thawng hnih zaruk le sawmthum um i. 41Bawipa in Moses hnenah thupeciahnak bangin Gershon hinte tu Moses le Aaron in mipum siar kawm ai ponhlam song na ruaih tlak mi minung hezah um i.
42Merari hinte tu amahte songkhat le innsang ṭen in mipum siar ai, 43Ponhlam song na ruaih tlak mi kum sawmthum le kum sawmnga karlak pasal hmuahhmuah hming hmingkhum i. 44Hming langhnak minung tu thawng thum le zahnih um i. 45Bawipa in Moses hnenah thupeciahnak bangin Merari hinte tu Moses le Aaron in mipum siar kawm ai Ponhlam song na ruaih tlak mi minung hezah um i.
46Levi hinte tu amahte songkhat le innsang ṭen in mipum siar ai, 47Ponhlam song na ruaih tlak mi kum sawmthum le kum sawmnga karlak pasal hmuahhmuah hming hmingkhum sio i. 48Hming khummi minung amahte veksen in thawng riat za nga le sawmriat um i. 49Bawipa in Moses hnenah a thupeciahnak bangin amahte bawn tuhhnak le phurh tuhhnak ṭuanvo heh pakhat ṭen in pe i. Moses hnenah Bawipa ai thupeciahnak bangin pakhat pakhat in laibu ah khum tlang i.
Currently Selected:
MIPUM SIARHNAK 4: RZB
Highlight
Share
Copy
Want to have your highlights saved across all your devices? Sign up or sign in
Zanniat Bible © Bible Society of Myanmar, 2018.
