LUKA 10

Sawmsarih Le Pahnih Hlat I

1Cia hnuaah Bawipa in midang sawmsarih le pahnih#10:1 Kut ngan laibu hrekkhat ah sawmsarih tiin um i. ril ai amah a feh tuhhnak khua le hmun cangcang ah pahnih pahnih in hlat cia i. 2Anite hnenah, “Rong khawm tuh tampui napui a khawmtu tuh mi tlawmniu i. Ciamanin rong kawmtu tam amam hlathnak tuhin lo naitu hnenah sawngen tu ih.#Mat 9:37-38 3Feh tu ih! Mehleng rual lakah tuu faniu hlathnak bangin ning hlat ing.#Mat 10:16 4Ciatihin ning feh fangin paisa bawm ituseh, dip ituseh, kedawl ituseh keng mah ih; lamlak ah ning tawkhnak mite pon tuhin com lawk mah ih.#Mat 10:7-14; Mar 6:8-11; Luk 9:3-5 5Inn pakhatkhat songah ning lut fangin a hmasaber ah, ‘Hemi inn songah daphnak um tu hram seh,’ tiin ti tu ih. 6Daphnak a daihtu ilekhaw daphnak ning vumah um tuseh, ti ai hnuk ning sathnak heh amahte vumah um tuh tata i; ciatih ihlah lekhaw ning hnenah daphnak let tuseh. 7Cia inn ah um tu ilai amahte pehnak hmuah khiah ai tu ih; zaimantifangin napertu in a hlawhman ngah kul i. Inn pakhat in inn dang ah thawn duldo mah ih.#1Cor 9:14; 1Tim 5:18 8Khua pakhat ah hleng ai tlun inn ning hon lekhaw amahte pehnak hmuahhmuah ai tu ih; 9cia khua songai miurte khai cakruai tu ilai cia khua mite khiah, ‘Pathian Ukhnak nong zo i,’ tiin rel tu ih. 10Ikhalselai khua pakhat ah hleng tlang ai ning lut siang hlah lekhaw khuasong lampui ah feh tu ilai, 11“Kin ke ai a bekhnak ning khua ai laivut khai ningmah engsanhnak ah keborh ning thin i ing. Ikhalselai Pathian Ukhnak tu ning hiangah hleng zo ihang, ti hih tu ngio ih,’ ti tu ih.#Nal 13:51 12Thutak ning rel ing: Thukhanhnak Nia ah cia khua mite tahin Sodom khua mite vumah Pathian in ninghiohnak nai tuh sawn i,” tiin ti i.#Sem 19:24-28; Mat 11:24; 10:15

A Sanglotu Khuate

(Mat 11:20-24)

13“Aw Chorazin khua, na hmai lam a pit ze i! Aw Bethsaida khua, na hmai lam a pit ze i! Na songah ngaihsunurkul i bawnhnak tepawl heh Tyre le Sidon khua ah bawn awng ta iselai, cia khua mite in sualsirhnak larruai tuhin buri hnikpon sil in vutkuang a phulhdunhnak raipui tuh zo ihang!#Isa 23:1-18; Ezk 26:1—28:26; Joel 3:4-8; Amos 1:9-10; Zec 9:2-4 14Thukhanhnak Nia ah Pathian in ning tahin Tyre le Sidon khua mite vumah ninghiohnak tam sawn nai tuh i. 15Cen nang Capernaum khua! Van tianin mi ai cuanhnak na daih im? Hell songah na lon tuh i!” tiin ti i.#Isa 14:13-15

16Cen Jesuh in a hnuahlunte hnenah, “Ning thu a ngaitute tu i thu a ngaitute i. Ning hnawltute tu i hnawltute i. Cen kaimah i hnawltute tu i hlattu khai hnawl i,” tiin ti i.#Mat 10:40; Mar 9:37; Luk 9:48; Joh 13:20

Sawmsarih Le Pahnih Let I

17Sawmsarih le pahnih a hlathnak mite tu ang ngai in tlung tlang leh ai, “Bawipa, na hming in ramhuaite kin hnawt fangin kin thu ngai i,” tiin ti tlang i.

18Ciafangin Jesuh in, “Vantlingtleleuh bangin vancung in Satan a tlok khiah hmu ing. 19Ngai tu ih! Huham naihnak ning pe ing: rulte le kaikuamte vumah vak thil tuh i si; ning ral nehthilhnak huham khai ning pe ai zai inkhai ning tuahmawh thil tuh lo i. 20Ikhalselai rauhla pha lo pawl in ning thu ngai manin lungawi mah ih; ning hming vancung ah ngan cia in a um manin lungawi tu sawn ih,” tiin ti i.

Jesuh A Lungawi I

(Mat 11:25-27; 13:16-17)

21Ciafangin Jesuh tu Rauhla Thianghlim in anghnak thawn dimruai ai, “Aw i Pa, lai le van ai Bawipa, mifim le mithiamte hnenin rel awng lohnak thil tu fimthiamhnak a nai lotu hnenah na larruai manin na vumah i ang ze i. I pa hetih bang ai a canghnak heh na daihdan ai a canghnak i.

22“I Pa in zaizongza i hnenah i pe zo i. Fapa heh aisu i ti Pa siar lo aisu inkhai ling lo i; cen Pa heh aisu i, ti khai Fapa le, Pa ai thu Fapa in amahte hnenah a phuangciahnak mite siar lo aisu inkhai ling lo i,” tiin ti i.#Joh 3:35; 10:15

23Cen Jesuh tu hnuahlunte lamah her ai anite ian in za tuhin, “Ning hmuhnak thilte ning hmu heh zaitluk bawng ning pha i! 24Fiang ngai in ning rel ing: prophet tampui le kumpibawi tampui in ning hmuhnak heh hmu nuam ve napui hmu thil lo i; ling nuam ve napui ling thil lo i,” tiin ti i.

Samaria Mipha Santehhnak

25Danthiam saya pakhat kawi ai a sual si tuhin Jesuh hnenah, “Sayapa, kumkhua nunhnak i ngah thil tuhin ziang bawn kul ing?” tiin zawt i.#Mat 22:35-40; Mar 12:28-34

26Jesuh in, “Lai Thianghlim in akontih in ti i? A tihnak tu na pomdan akontih in i?” tiin ti i.

27Ciapa in, “Bawipa na Pathian tu na thinlung veksen, na nunhnak veksen, na hathnak veksen le na ruathnak veksen in it tulai na innhnen tu nangmah na it dun bangin it tu,” ti i,” tiin ti i.#Sua 19:18; Danp 6:5

28Ciafangin Jesuh in, “Na relhnak tu dik i; ciatih bangin bawn tulai na nung tuh i,” tiin sawn i.#Sua 18:5

29Ikhalselai Danthiam pa in amah veve thiamco dun a nuam manin Jesuh tu, “I innhnen tu aisu i?” tiin zawt i.

30Ciafangin Jesuh in, “Vaikhat ah mi pakhat tu Jerusalem an Jericho ah feh i. Ciatihin a feh laitak ah damiahte in pom ai a hnikpon hawk sah ai thi dawn in vit ai hlum i. 31Cialak ah suangbawi pakhat tu cia lampui in vak ngelcel i; ikhalselai ciami pa a hmu fangin khat lam nak in hel ai fehsan i. 32Ciabang thotho in Levi mi pakhat khai feh ve ai miur pa heh kian ai khat lam nak in hel ai fehsan ve i. 33Ikhalselai Samaria mi pakhat tu cia lampui in khualtlawng ve ai cia miur pa hnen hleng ai a hmu fangin ninghio ngai i.#2San 28:15 34A hnenah kawi ai a hmaihma heh sathau le cabitti noih sah ai phatak niu in tuam sah i. Cen a kenghnak sumhnam vumah toruai ai khualbuk ah fehpui in ciata ah phatak ngai in tuamhlawm i. 35A thangha fangin ngun tangka fanghnih suah ai khualbuk kiltu pa pe ai, ‘Hemi pa heh phatak niu in tuamhlawm tulai helam in i let fangin he pa na tuamhlawmhnak hrangah na bohnak hmuahhmuah na rul leh tuh ing,’ ti i,” tiin rel i.

36Cia hnuaah Jesuh in, “Damiahte pommi pa ai innhnen heh hemite pathum lakah aisu ber ini, tiin ruat isi?” tiin zawt i.

37Dan zirhtu sayapa in, “Amah a ninghiotu pa i,” tiin sawn i.

Jesuh in, “Feh tulai ciatih bangin bawn tu ve,” tiin ti i.

Martha Le Mary Hnenah Jesuh Leng I

38Jesuh le a hnuahlunte tu khualtlawng betbo ai khua pakhat ah hleng tlang i. Martha tihnak nu in Jesuh tu a inn ah tlungruai i.#Joh 11:1 39Martha ai naunu tu Mary i. Mary tu Jesuh keham ah to ai a thurelhnak ngai i. 40Martha tu naper tampui nai in buai ai a thinraw manin Jesuh hnenah, “Bawipa, i naunu in naper hmuahhmuah i hlip sio heh poi ti lo isim? Rel tu, i bawm tuseh!” tiin ti i.

41Ciafangin Jesuh in, “Martha, Martha! Nang tu thil tampui vumah thincawl le multing in um isi; 42a kulhnak ngaingai tu pakhat lek um i. Ciami tu Mary in ril ngah zo ai aisu inkhai long thil tuh nawn lo i,” tiin ti i.

Currently Selected:

LUKA 10: RZB

Highlight

Copy