SUANGBAWI LAIBU 26
26
Dan Hluntu Ca Hmuifu
(Danp 7:12-24; 28:1-14)
1 Bawipa in, “Bia tuhin milim ituseh, khanlung ituseh, lungto mizuk ituseh, lungto a coihhnak ituseh, bawn mah ih. Kai tu Bawipa ning Pathian ing.#Luat 20:4; Sua 19:4; Danp 5:8; 16:21-22; 27:15 2I Sabbath niate tu ul tuhai kaimah i biahnak hmun thianghlim heh upat tu ih. Kai tu Bawipa ing.
3“I dan le i thupeciahnak bangin hlun le i sikhaw, #Danp 11:13-15; 28:1-4 4ning ram an rong suak thil tuhin le ning thingkungte in a thai thaithilhnak tuhin van ruah a can hman in siruai tuh ing. 5Ning lo rong tam tuh ze ai cabit thai loih cu fang inkhai lo rong khawm tuhlai i si; cen ning cabit thai tu tam tuh ze ai ning lo hlaici cing cu fang inkhai cabit thai loih tuhlai i si. Ning duhhnak aih pha hmuahhmuah heh ngah tuh sio ai ning ram songah himniu in um tlang tuh i si.
6“Ning ramah daphnak lengruai tuhai aisu khai lau tuh um loin zan ah mitmu thil tuh i si. Ning ram songin a laukul sahrangte kaimah in hnawt tuh sio ai raldunhnak le ralvang khai um tuh nawn lo i. 7Ning ralte vumah nehtu i tuh i si; ralvang in ning hmaiah thi tuh i. 8Ningmah minung panga in ning ral zakhat neh tuhai ningmah zakhat in ning ral thawng hra neh tuh i si. 9Hmuifu ning pe tuhai tefa tampui ning pe tuh ing. Ningmah thawn thutiam i bawnhnak khiah khimruai tuh ing. 10Ning lo in a suakhnak rong tam tuh ze ai kum a bo fangin rong thar dah nuam manin rong a hlunte lon kul tuh i si. 11Ningmah lakah i ponhlam cianghlim songah um tuhai zaikom inkhai ning zam tuh lo ing. 12Ning hnenah um tuh ing, kaimah heh ning Pathian cang tuhai ning tu i minung ning cang tuh i.#2Cor 6:16 13Sal ning cang leh tuh nawn loin Egypt ram an Bawipa ning Pathian kaimah rori in ning suah zo ing. Ning hentu hrengte tu hawk tuh sio zo ai dikcang le hmaihngal in ning fehruai ing,” tiin ti i.
Thungailo Mite Cawhhnak
(Danp 28:15-68)
14 Bawipa in, “I thupehnakte hlun hlah le i sikhaw cawhhnak tuar tuh i si. 15I dante le i thupehnakte hlun nuam loin ningmah thawn i thutiam bawnhnak bal le i sikhaw, 16ning cawh tuh ing. Harsahnak ning vumah hlengruai tuh ing, a cak thil leh lo urhnak a phunphun, hlawng ur tuar tuhai ning mit ning caw tuhai ruh lek ning tang tuh i. Hlaici ning cing inkhai ning ca phathnem tuh lo i; zaimantifangin a aitu heh ning ram a nehtu ning ralte i tuh i. 17Kaimah in ning hnawl tuhai ralte in ning neh tuh i; ning huatute in ning uk tuh i. Thin ning lau tuh ze ai aisu inkhai ning hnawh lo napui inkhai tlan tuh thliahthlo i si.
18“Ciatluk ai tuar hnua ahkhai i thu ngai thotho hlah le i sikhaw ning tuarhnak tu, ning sualhnak manin, a let sarih in luarruai tuh ing. 19Ning hngalhnak ṭiode ning bal sah tuh sek ing. Ning vumai van heh thir bangin hakruai tuhai ning hnia ai laipua khiah darkap bangin ruhruai tuh ing. 20Harsa ngai in naper ning perhnak tu a lovang cang tuh sio i; zaimantifangin ning laipua in rong suak tuh lo ai ning thingkungte inkhai thai tuh lo i.
21“I el thotho in i thu i ngai hlahle i sikhaw, ning i cawhhnak heh, ning sual manin, a let sarih in khangruai tuh lala ing. 22Ning lakah sahrang hlat tuhai ning fate le ning sumhnamte dawp tuh i; mi tlawmniu lek ning tang tuhai ning lampuite khing tuh sukso i.
23“Hemi bang cawhhnak ning tuar hnuaah i hnenah let cuang loin i engsan thotho le i sikhaw, 24kaimah rori inkhai ning engsan tuh ve ai a hlan tahin a let sarih har in ning cawh tuh ing. 25I thukhamhnak ning bal manin phuzulhnak ral ning vumah i hlengruai fangin khuapui songah him nuam in ning relh inkhai ning vumah ursia tlungruai tuhai ning ralte ai kut songah ning tlok tuh sek i. 26Aih tuh rong ning pe tuh lo ai, nupang pahra ai cohnak sang heh sang emhnak pakhat ah em khop fangfang i tuh i. Bangran in co tuhin zem dun tuh i si; ikhalselai ning cohnak hmuahhmuah ning ai hnuaah ril ning kam tuhlai i.
27“Hebang cawhhnak hmuahhmuah hnua ahkhai i thu ngai nuam loin i engsan thotho le i sikhaw, 28i thinraw in a rohpui in ning bawn thun tuh ve ai ning vumai cawhhnak heh ning sualhnak manin, a let sarih in rohruai tuh ing. 29Ning rikam ze manin ning songsuak ning fanu le ning fapa rori khai ai tuh i si. 30Mual vumai ning sahnak biakinnte tu siatsuah tuh sek ing; rimhmui maitaihnak pulengte khai bal tuh sek ai ning milim tluhnak vumah ning luangte lon tuh ing. Kaimah ca ningdulkul i tuhai, 31Ning khuapuite heh hnawmcan tuh sio ing; ning biakinnte bal tuh sek ai ning hibawlhnak khai ning sang sah tuh lo ing. 32Ning ram i hnawmcan zia heh roh ruh ze ai ning ram a longtu ning ralte inrin ngaihsunur tlang tuh i. 33Raltawnghnak hlengruai tuhai ram dangdang ah ning piakruai tuh sek ing. Ning khuapuite tu khuarop cang tuh sio ai ning ram heh khing tuh sukso i. 34Ning ram a khing song le ning ralte ramah ning tang song hmuahhmuah ning ram an sabbath cawlum kum ngah tuh ve i. 35Ciatihin cawlumhnak ning pe awng kel lo ning ram an cawlumhnak can ngah tuh i. A zamhnak ramkhing ah cang tuhai ral ramai ralpom mi ning cang songah ning ram heh cawlum tuh i.
36“Ramdang ah hoihnak ning mi vakvai pawl heh thinlau thai thliahthlo in ning bawn tuhai hli in thinghnah hmuthnak thawmvang ning za inrin tlan tuh hnelhno i si. Raltawnghnak ai ralhnawh mi bangin tlan tuhai ning hiangah ral um lo napui ning bah tuh lianglo i. 37Aisu inkhai ning hnawh lo puipa in pakhat le pakhat vumah ning tlu tuhai ral zaibang khai tawng ben tuh lo i si. 38Ral ramai ning um songah ning thi tuh i; ning ralte ai laipua in ning thon tuh sek i. 39A tangsun mi pakhat pahnih ning um inkhai ningmah ai sualhnak le ning pupa ai sualhnak manin ning bo tuh thotho i.
40“Ikhalselai ning tesinfate in amahte sualhnak phuang tuh i; amahte ai sualhnak lek zolo in i thu i ngai lotu le i engsantu a pupate sualhnakte khai phuang tuh i. 41Ciatihin a pupate sualhnak manin hnawl ai a ralte ramah ralpom mi cangruai ing. A hnuataber ah a tesinfate sualhnak manin cawhhnak a tuar tlang hnua, amahte thinlung nem fangin, 42i miphunte Canaan ram pe tuhin Jacob, Isaac le Abraham hnenai i thukham heh hih tuhai khimruai leh tuh ing.#Sem 28:13-14; 26:3-4; 17:7-8 43Ikhalselai a hmasaber ah he ram an cawlum a ngah thil tuhin ramsong minungte tu he ram an suak kul tuh i. Cen i thupeciahnak le i dante hnawl manin harsahnak phunkhim tuar kul tuh hrimhrim i. 44Ikhalselai, ral ram songah anite um song ahkhai hlum tuh sio lo ai siatsuah tuh sek lo ing. Ciatihin siatsuah sek ngaingai fangin amahte thawn thutiam i bawnhnak heh bo tuh rori hehin; Kai tu amahte Bawipa Pathian ing. 45Kai tu Bawipa amahte Pathian ngaingai cang tuhin miphun dangdang ai mithmuh ah i huham suah in Egypt ram an i suakruai laiah amahte pupate thawn i thukhamhnak tharthawh leh tuh ing,” tiin ti i.
46Hemi dante le u thupehnakte tu Israel miphun caah Sinai Mual vumah Bawipa in Moses hnenah a pehnak i.
Currently Selected:
SUANGBAWI LAIBU 26: RZB
Highlight
Share
Copy
Want to have your highlights saved across all your devices? Sign up or sign in
Zanniat Bible © Bible Society of Myanmar, 2018.
