SUANGBAWI LAIBU 25
25
Kum Sarihhnak
(Danp 15:1-11)
1A hnia lamai dante tu Israel mite hnenah pe tuhin, #Luat 23:10-11 2Bawipa in Moses hnenah Sinai Mual vumah rel i. Bawipa ai ning pe tuhhnak ram ning hleng fangin kum sarihhnak kum tu lo vai tuh lo i si; ciatihin Bawipa ning upathnak larruai tuh i si. 3Kumruk song ning lo ah hlaici cing tu ilai, ning cabit vuandum selciang in a kakte khai tan tuhai lo rongte khawm tuh i si. 4Ikhalselai a kum sarihhnak tu ning lairam cawlum kum, sabbath kum, Bawipa hnenah ning pe kum i tuh i. Ning lo ah hlaici cing tuh lo i si. Ning cabit vuandum khai selciang tuh lo i si. 5Ning cing lohnak ning lolai ai a pohnak rong lang tuh lo i si. Ning selciang lohnak cabit kakte ai a thaite khai loih tuh lo i si. Ning lairam a cawlum kum i tuhai a tok in tok tuh lo i si. 6Cia kum ahhen ning lo vai tuh lo i si; ikhalselai ningmah le ning salte, naper ning ruaihnakte le ningmah lakai a um ramdang mite tu ning lo in ning cawm tuh i. 7Inn ai zuahnak sumhnam le hampalak ai ramsate khai cawm tuh i. Vai lohnak ramai a suakhnak hmuahhmuah ai thil tuh i.
Jubilee Kum
8Kum sarih ai vel sarih khim ai, a veksen in kum sawmli le kum kua a khim tianin siar tu ih. 9Cia hnuaah hla sarih hla ni hra nia, sualhlat hibawlhnak nia ah mi pakhat ning ram pumpuhluk songah thirhlung tum ruai tuh i si. 10Ciatihin kum sawmnga khim kum heh Jubilee#25:10Jubilee tihnak tu Hebrew in yobhel in kawihnak i ai tuucangki tihnak i. Ciami puai can ah tuucangki tum de manin ciatihin hmingpehnak i. kum Pathian songlawi pehnak kum i tuhai ram songai a ummi minung hmuahhmuah hnenah, zalenhnak thuthan kum i tuh i. Hemi kum ah amahte naihnak lairam le, inn le lo a laihnak hmuahhmuah heh a hmasa ai a naitu hnenah, ihlahle a rocotu tesinfa hnenah, khirh tuh sio i si. Sal ai a zuar zo mite khai a laitu in amahte songkhat hnenah pe leh tuseh. 11Ning lo ah hlaici cing tuh lo i si; amah thu ai pohnak rong khai lang tuh lo i si; ning sel lohnak cabit vuandum ai cabit thai khai loih tuh lo i si. 12Cia kum tu Jubilee kum imanin ning ca kum cianghlim i. Ning vai lohnak ramai rong lek ai tuh i si.
13Hemi kum ahcen zuar cia zo lairam hmuahhmuah a hlanai a naitu hnenah khirh tuh sio i si. 14Ciamanin na miphunpui Israel mite pakhatkhat hnenah lairam zuar, ihlahle a hnenin na lai fangin a dik loin lai le zuar tuh lo i si. 15A man heh hmai Jubilee kum a khim leh hlanah he lairam in kum zai songah rong zaizah suak tuh i, ti sik in tan tuh i si. 16Kum tampui sam lai lekhaw a man tam tuhai kum tlawmniu lek sam lekhaw a man tlawm thun tuh ve i; zaimantifangin amahte zuarhnak tu lairam ai a suakhnak rong sawn i. 17Israel mite na suahpui zawl mah; na Pathian kihzah tu. Kai tu Bawipa ning Pathian ing.
Kum Sarih Kum Ai Harsahnak
18Hemi ram songah lungmuang in ning um thil tuhin Bawipa ai dan le a thupeciahnak hlun tu ih. 19Loram in rong suak tuhai, ning ai tuhhnak ngah tuh sio i si; cen lungmuang in um tlang tuh i si.
20Ikhalselai mi pakhatkhat in he kum sarih kum, lo vai lo kum le rong khawm lo kum ah ai tuhin ziang um tuh i, tiin zawt tuh i. 21Bawipa in kum rukhnak kum ah loram heh hmuifu burh tuhai ciamanin kum thum hrang a tham thai in rong suak tuh i. 22Kum riathnak kum ah hlaici ning cing fangin kum rukhnak kum ai rong ning khawmhnak ai tuh thotho lai ai ciami kum riathnak kum ai ning cinghnak rong ning khawm hlan song hmuahhmuah ah rong ai tuh catloin nai tuh hlen i si.
Thilri Khirhlehhnak
23Ning loram le inn le lo tu a zomzet in zuar tuh lo i si; zaimantifangin ningmah ai ilo i. Pathian ai i ai ning tu mikhual a langniu ai hmangruaihnak i si.
24Loram le inn le lo ning zuar fangin a zuartu pa in tlan leh thilhnak um tuseh. 25Israel mite pakhatkhat a farah manin a loram zuar lekhaw, a nong ber a songkhat in tlan thil leh tuh i. 26A tlan leh thaitu songkhat a nai lomi in lehhnua ah a tlanhnak tuh sumsaw nai leh lekhaw, 27a tlan leh ben nia in jubilee kum tian hrang ṭuat in a zuarh mi pa hnenah a man pe tuhai ciatihin a lairam heh lang leh tuh i. 28Ikhalselai a tlanhnak sumsaw nai thotho hlah lekhaw Jubilee kum a khim hlan song a laitu pa in nai rih tuh i. Jubilee kum ah a hnenah khirh leh tuh i.
29Ving kulhhnak khuapui songai inn tu a naitu pa in a zuar fangin kum khat songah tlan leh thilhnak nai tuseh. 30Ikhalselai kum khat songah tlan ben leh hlah lekhaw, tlan leh thilhnak nai tuh lo ai ciami inn heh a zomzet in a laitu le a tesinfate ai tuh ihang; Jubilee kum khim inkhai khirh mahang seh. 31Cen kulh lohnak khua songai innte tu khuapua inn bangin ruat tu ilai a naitu hmasa in tlan thil leh tuh i; Jubilee kum ahcen khirh tu sio seh. 32Ikhalselai Levi hinte in Levi khuapui songai innte tu a nuam cancan ah tlan thil leh tuh i. 33Ving kulhhnak khuapui ai inn tu Levi mite in zuar ai tlan leh hlah lekhaw Jubilee kum ah khirh tuseh; zaimantifangin khuapui songai Levi hinte ai inn heh a zomzet in amahte ai i. 34Ciahlaiah Levi miphunte ai khuapui hiang cingkim ai ramte tu zaikom inkhai zuardan lo i; kumzangza in amahte ai i.
Farah Hnenai Sumsaw Putdan
35Ning hiangai umtu ning phunpui Israel mite farah ai a nunhar lekhaw, ning hiangai a umthilhnak tuhin ning hnenum ihlahle mikhual ning cawm bangin cawm tu ve ih.#Danp 15:7-8 36Tangka put le i sikhaw a pung lang mah ih; Pathian kihzah tu ilai mifarah pa tu ning hiangah um tu ve seh. 37A pung thawn tangka put mah ih, a miat in rong khai zuarh mah ih.#Luat 22:25; Danp 23:19-20 38Hemi tu Bawipa ning Pathian ai thupeciahnak i. Ani tu Pathian tuhin le Canaan ram ning cothilhnak tuhin Egypt ram songin ning suahtu i.
Salte Luatruaihnak
39Ning hiangai a umtu ning phunpui Israel mite pakhat a farah in nung ben lo manin amah lala sal ah zuar dun lekhaw sal naper perruai tuh lo i si.#Luat 21:2-6; Danp 15:12-18 40Hlawhthamhnak hnenum bangin ning hnenah um tu selai hmai Jubilee tianin ning naper per tuseh. 41Jubilee kum a hleng fangin amah le a fate in ning hlum tuhai amahte songkhat le a pupa ai ramah tlung tuseh. 42Israel mite tu Bawipa ai salte i si ai amah in Egypt ram an ning suah zo imanin sal ai zuarhnak i nawn mahang ih. 43Ning Pathian kihzah tu ilai ciabang mifarah heh siatsuah mah ih. 44Sal nai ning nuam lekhaw ning hiangai umtu ramdang mite songin lai tu ih. 45Ningmah lakai ramdang mi songin a fate khai lai thil i si. Ning ram songai a suaktu a fate khiah ning thilri ah cang i. 46Ning fapate ca ro bangin co tuhai ning fapate a nun song a naper per sah tuh i. Ikhalselai ning unau Israel mite tu siatsuah mah ih.
47Ning lakai a umtu ramdang mi, ihlahle ning hnenum pakhatkhat milian cang ai ning unau Israel mite pakhatkhat a farah ze manin cia milianpa hnenah amah veve sal cang tuhin zuar dun lekhaw, 48a lai hnua ahkhai tlan thil leh tuh i. Amah unau pakhatkhat, 49ihlahle a pakhatta maw, a pakhatta ai fa maw, ihlahle a songkhat pakhatkhat in maw tlan thil leh tuh i. Ciahlahle amah in tangka nai lekhaw amah veve tlan thil tuseh. 50Amah a laitu pa ramdang mi ai lungkhimhnak in, amah a zuardunhnak in pan hmai jubilee kum tianin a kum siar tuhai a naper perruaihnak pa ai nihlawh tuat in a luathnak man heh tan sah tuh i. 51A luathnak tuh kum raipui tang lai lekhaw a laihnak man tuat in a luathnak man heh tan sah tuh i. 52Jubilee kum tian kum tlawmniu ian tang lekhaw a kum tuat in a luathnak man tan sah tuh i. 53Kum khat hnua kum khat naper ruaihnak minung bangin ruat in ramdang mi ai kuthnia ah um tuseh; ikhalselai a laitu pa in siatsuah hrimhrim maseh. 54A vumai luatthilhnak lampuite in luat thil cuang hlah lekhaw hmai Jubilee kum ah amah le a fate tu luatruai tuseh. 55Israel mite tu Bawipa ai sal ning imanin midang sal ah kumzangza in ning cang thil tuh lo i. Egypt ram an suahhnak i si. Ani tu Bawipa ning Pathian i.
Currently Selected:
SUANGBAWI LAIBU 25: RZB
Highlight
Share
Copy
Want to have your highlights saved across all your devices? Sign up or sign in
Zanniat Bible © Bible Society of Myanmar, 2018.
