JOHAN 15

Jesuh Tu Cabit Kuang Ngaingai I

1Jesuh in, “Kai tu cabit kuang ngaingai ing ai i Pa tu vuan naitu i. 2I songai thai a thai lotu a kakte heh tan sio ai a thai nai a kakte tu a thaihnak tuhin le thai tam amam a thaithilhnak tuhin a kak pha lo pawl tan sah i. 3Ningte tu i thuzirhhnak thawmin ning ciang zo i. 4Kaimah thawn pehzom dun tu ilai kaimah inkhai ning pehzom tuh ve ing. Cabit kak tu amah niu lekin thai thil lo i; cabit kuang thawn a pehzom fang ian in thai thil i. Ciatih bangin kaimah thawn pehzom hlahle i sikhaw thai thil tuh hrimhrim lo i si.

5Kai tu cabit kuang ing, ning tu a kakte i si. Aisu khai i songah um ai kai khai amah songah um lengkhaw thai tampui thai tuh i; zaimantifangin kaimah tel loin zaikhai bawn thil lo i si. 6Aisu khai kaimah songah a um lomi tu cabit kak lon ai a romi bang i tuh i. Ciabang a kakte tu khawm ai mai songah lon ai kang sek i. 7Ning heh kaimah songah um ai i thu heh ning songah um ve lekhaw ning daihhnak hmuahhmuah ning ngen fangin ngah tuh i si. 8Thai tampui ning thaihnak in i Pa ai songlawihnak larruai ai ciatihin i hnuahluntu ning cangthilhnak i. 9I Pa in i it bangin ning khai ning it ve ing; i ithnak songah um tu ngio ih. 10Kaimah in i Pa ai thukham hlun ai ciatihin amah ai ithnak songah i um bangin i thupehnak hlun le i sikhaw i ithnak songah um tuh ve i si.

11I anghnak tu ning songah um ai ning anghnak a semkhim tuhin he thu heh ning rel ing. 12I thupehnak tu hetihin i: Kaimah in ning it bangin ningmah khai pakhat le pakhat it dun tu ve ih! 13Mi pakhat in a rualpuite ca ithnak lianber a naihnak tu anite caah a nun liamhnak khiah i. 14Cen i thupehnak hlun le i sikhaw i rualpui i si. 15Ningte tu hnenum tiin ning ti nawn lo ing, zaimantifangin hnenum in a bawipa ai bawnhnak ling lo i. ‘Hnenum’ ti nawn loin ‘Rualpui’ tiin ning ko ing: zaimantifangin i Pa hnenin i linghnak hmuahhmuah ning rel zo sio ing. 16Ning in i ril lo i si; kaimah in ning ril ai kumzangza in a khomi thai ning thai thilhnak tuhin ning ruai ing. I hming in Pa hnenah ning ngenhnak hmuahhmuah ning pe tuh i. 17Cen i thupehnak tu hemi i: pakhat le pakhat it dun tu ih.

Lailung In Ning Cim Tuh I

18Ningte tu laivum in ning cim lekhaw kaimah i cim hmasa zo ti hih tu ngio ih. 19Lailung ai i silai lailung in kaimah ai tiin ning daih tuh ngai i. Ikhalselai lailung an ning ril zo ai amah ai i nawn lo i si; ciamanin lailung in ning hua i. 20“Sal tu a bawipa tahin lian sawn lo i,’ tiin i tihnak tu hih tu ngio ih. Kaimah i cawh tlang lekhaw ning khai ning cawh tuh ve i; i thu hlun tlang lekhaw ning thu khai hlun tuh ve i.#Mat 10:24; Luk 6:40; Joh 13:16 21Ikhalselai tun tu i minung ning imanin he thil hmuahhmuah heh ning vumah bawn tlang tuh i. Zaimantifangin kaimah i hlattu aisu i ti ling tlang lo i. 22Amahte hnenah kawi loin le thurelhnak nai loin um inglai amahte vumah sualhnak um tuh lo i; ikhalselai tunai bang lekhaw amahte sualhnak manin mawhhluk tuh dang zaikhai nai tlang lo i. 23Kaimah i cimtu in Pa khai cim ve i. 24Amahte lakah aisu inkhai bawn awng kel lohnak thilte bawn loin um inglai amahte vumah sualhnak um tuh lo i; ikhalselai tunai bang lekhaw i thil bawnhnak hmu tlang zo sio puipa in i Pa thawn kin cim kawm i. 25Hetihin cang kul i, zaimantifangin amahte Dan laibu songah ‘Ziang thula rin um loin i cim tlang i,’#Saam 35:19; 69:4 tiin ngan awnghnak um ai ciami a khimhnak tuhin i.

26I Pa hnenin Bawmtu Rauhla hleng tuhai ani tu Pathian thutak larruaitu tuh i. I Pa hnenin kaimah in hlat tuhai kaimah ai thula a reltu tuh i. 27Ningmah khai a hampan in kaimah hnenah um tlang zo manin i thula rel tlang tuh ve i si.

Currently Selected:

JOHAN 15: RZB

Highlight

Copy