THUKHANTUTE 14

Samson Le Timnah Fenu

1Samson tu Timnah khua ah leng ai ciata ah Filistin fenu pakhat hmu i. 2Inn a tlung fangin a nu le a pa hnenah, “Timnah khua ah fenu pakhat hmu ing. I dong sah tu ih. Hoi i nuam i,” tiin ti i.

3Ikhalselai, a nu le a pa in, “Zaimanin zarhtan lomi Filistin nupang heh nupui tuhin na daih ngelcel i? Kin songkhat le kin miphunte lakah na daihhnak fenu pakhat tal um lo im? tiin ti i.

Ikhalselai Samson in, “I hoi sah tuhin i daihhnak tu amah pakhat lek i. Amah lek i daih i,” tiin a pa hnenah ti i.

4Filistin mite tawng tuhin Bawipa in can pha si manin Bawipa in Samson khiah hetihin thil bawnruai i, ti khiah a nu le a pa in ling kawm lo i. Cialai ah Israel mite uktu heh Filistin i.

5Samson tu a nu le a pa thawn Timnah khua ah feh tlang i. Ciata cabit lo songah a feh laitak ah Samson tu chintit niu pakhat in lo nger i. 6Ciafangin Bawipa ai rauhla tu Samson vumah a rohpui in hleng ai me niu pakhat hlai sek selai ciatih bangin chintit ciah a kut lek rori in hlai sek i. Ciatihin a bawnhnak tu a nu le a pa hnenah rel lo i.

7Cen a fenu hnenah leng ai thu rel kawm in lungkhim ngai i. 8Can tlawmniu a rai hnuaah cia fenu hoi tuhin Samson ciah feh lala i. A feh kongin a rekhnak awng chintit sik tuhin lampui in tlawmniu pial zut ai a sik fangin khoi bukhat a tilu thawn hmu i. 9Khoitizu ciah lang ai a vak kongin ai betbo i. A nu le a pa hnenah hleng ai khoitizu pe ve i. Anite inkhai ai kawm i; ikhalselai chintit songin a langhnak thu a nu le a pa rel lo i.

10Samson pa tu fenu nu inn ah feh ai, cialai tlangvalte bawndehnak bangin Samson in puai bawn i. 11Filistin mite in Samson a hmu fangin a hnenah um tuhin tlangvalte sawmthum pe i. 12Cen Samson in anite hnenah, “Thu ning polh tuh ing. Nu hoipuai ni sarih songah i thu polhhnak sullam i rel ben le i sikhaw songruk pon nemniu lam sawmthum le hnikpon thlenghnak korfual zun sawmthum ning pe tuh ing. 13Ikhalselai rel ben hlah le i sikhaw songruk pon nemniu lam sawmthum le hnikpon thlenghnak korfual zun sawmthum i pe tuh i si,” tiin ti i.

Anite in, “Na thu polhhnak tu kin rel tucuk. Ngai cuk nga ing,” tiin ti i.

14Ciafangin Samson in;

“Sa aitu songin aipha suak i,

A thahat songin a hlum suak i,”

ti i.

Ni thum song ruat tlang napui ling thil tlang lo i.

15A ni lihnak ah Samson nupui hnenah, “A thu polhhnak tu na hnenah phuang tuhin na pasal heh zawl tu. Ciatihin zawl hlahle sikhaw na pa inn mai in tai tuhai nangmah khai na tai tuh lio i ing. Hemi puai kin sawm heh farah tusek seh kin ti isim?” tiin ti i.

16Ciamanin Samson nupui in a kap kongin a hnenah kawi ai, “I daih ngaingai lo isi; i hua i bang si! I rualpuite hnenah thu polh ai a sullam tu kaimah rori khai i rel na nuam lo i!” tiin ti i.

Samson in a nupui hnenah, “Ruat tucuk! I cawitu i nu le i pa rin rel lo ing. Akontih in nang na rel thil tuh ing?” tiin sawn i. 17Ciamanin ni sarih song puai a ben hlanlo nisiar in a pasal ciah hnocen in kap hnelhno de i. Ciatihin hlat loin hnocen ngio manin a ni sarihhnak ah a thupolhhnak a sullam heh a nupui hnenah rel i. 18Ciamanin a ni sarihhnak nia, a ithmun khan songah Samson a lut hlanah, khuasong mite in,

“Khoitizu tahin a hlum sawn

ziang um tuh i?

Chintit tahin a hat sawn

ziang um tuh i? tiin

a thupolhhnak heh let tlang i.

Ciafangin Samson in,

I kawlpawla niu thawn

lorawi hlah i silai,

I thupolhhnak ling tuh lo i si,”

tiin ti i.

19Cen Bawipa rauhla in Samson tu a rohpui in umpui i. Ashkelon ah feh ai ciata ah minung sawmthum rek ai a hnikpon lang sah sio ai a thupolhhnak a let bentute pe i. Cen a thinraw bik in a pa inn ah tlung i. 20A nupui tu Samson ai rualpui pha ber, a nuhoi lai ai a dingpuitu pe i.

Currently Selected:

THUKHANTUTE 14: RZB

Highlight

Copy