THUKHANTUTE 12
12
Jephthah Le Epharaim Mite
1Epharaim mite taikhawm ai Jordan runpui tan hnuaah Zaphon hleng tlang ai Jephthah hnenah, “Zaimanin Ammon mite tawng tuhin na feh fangin kinmah khai kin sawm lo isi? Na inn mai in tai tuhai na lu vumah mai tla tuh i,” tiin ti tlang i.
2Ikhalselai Jephthah in, “Kaimah le i minungte tu Ammon mite thawn thu eldunhnak a rohpui in nai i ta ing. Ciafangin kin o tuhin ningmahte ning ko napui aisu khai kawi lo i si. 3I o tuhin aisu khai kawi lo i si ti i hmu fangin i nunhnak khai ruat loin feh ai Ammon mite khiah tawng ing. Bawipa in ning i hio manin neh ing. Zaimanin tunah kaimah lehlam i tawng tum in kawi tlang i si? tiin ti i. 4Cen Jephthah in Gilead mite hmuahhmuah hmunkhat ah kokhawm ai Epharaim mite heh tawng ai neh i. Zaimantifangin Epharaim mite in, “Epharaim le Manasseh ramai a umtu Gilead mite khiah Epharaim in mi ralrelh pawl ngawn i si,” ti ṭiode manin i. 5Gilead mite in Epharaim mite tlan ngah tuh sek loin Jordan runpui a tan thil hmun hmuah in kham sio i. Epharaim mite luat nuam in khat lam runral ah feh a ngen fangin Gilead ralkapte in, “Epharaim mi isim? tiin zawt i. “Epharaim mi ilo ing,” ti lekhaw, 6‘Shibboleth tiin sal tucuk,” ti ai, felniu in sal thiam loin “Sibboleth,” ti ai a sal fangin Gilead ralkapte in pom ai ciata Jordan runpui tanhnak ah pakhat hnua pakhat rek betbo i. Ciata ah Epharaim ralkap thawng sawmli le thawng hnih thi i.
7Gilead mi Jephthah in kumruk song Israel thukhantu i. A thi fangin Gilead ram amah khua ah phum i.
Ibzan, Elon, Le Abdon
8Jephthah thi hnua Israel khiah Bethlehem khuami Ibzan in ho i. 9Ibzan in fapate sawmthum le fanute sawmthum nai i. A fanute sawmthum tu hin dang pasal nairuai ai, a fapate sawmthum khai hin dang nupui hoiruai i. Ibzan in Israel tu kum sarih song uk i. 10A thi fangin Bethlehem khua ah phum i.
11Ibzan thi hnuaah Zebulun mi Elon in Israel khiah kum hra song ho i. 12Elon tu thi ai Zebulun ram song Aijalon khua ah phum i.
13Elon thi hnuaah Pirathon khuami Hillel ai fapa Abdon in Israel khiah ho i. 14Abdon in fapate sawmli le tupate sawmthum nai ai laakte sawmsarih a totu de i. Abdon in Israel khiah kum riat song ho i. 15A thi fangin Amalech mite in tlang vum ram, Epharaim ram song Pirathon ah phum i.
Currently Selected:
THUKHANTUTE 12: RZB
Highlight
Share
Copy
Want to have your highlights saved across all your devices? Sign up or sign in
Zanniat Bible © Bible Society of Myanmar, 2018.
