ISAIAH 45
45
Bawipa In Cyrus Naṭuan Pe I
1Cyrus tu Bawipa ai rilmi kumpibawi i!
Bawipa in ram tampui nehtu tuhin ṭuanvo pe i.
Kumpibawi tampui amahte huham sut tuhin hlat i.
Bawipa in amah caah khuapui kotkate
hong sah tuh i.
Bawipa in Cyrus hnenah.
2“Kaimah rori in na fehhnak lampui sel tuh ing;
Tlang sang le mualte zawllairuai tuh ing.
Dar ai bawnhnak kotkate tan tuhai
Thir kotkalhte khiah tan tuh sek ing.
3A thimhnak le a thuphnak hmunai
sumsawte na pe tuh ing;
Ciatihin kaimah heh Bawipa ing ti khiah
ling tuh isi. Israel ai Pathian in na ril i,
ti ling tuh isi.
4I cengfa Israel bawmtu tuhin ṭuanvo na pe ing;
I rilhnak minungte bawmtu tuhin.
Kaimah khiah i ling lo napui,
Upathnak tampui na pe ing.
5“Kaimah ian Bawipa ing.
Pathian dang aisu khai um lo i.
Nang in i ling lo napui,
Na kulhnak thazang na pe tuh ing.
6Khatlam vanhamtong in khat lam vanhamtong tian,
Mi zongzong in kaimah heh
Bawipa ing tihnak le
Pathian dang akonah khai a um lo zia,
A lingthilhnak tuhin he bangin bawn ing.
7Tleuhnak le thimhnak bawntu ing.
Hmuifuhnak le thihhnak suakruaitu khai ing.
Hemi hmuahhmuah a bawntu heh Bawipa kaimah ing.
8Nehhnak tu van in ruah bangin siruai tuh ing.
Laivum in ciami khiah pom tuhai,
Dikcang le luathnak thawn mawm tuhai par tuh i.
Bawipa kaimah in ciatih bangin cangruai tuh ing,”
tiin ti i.
Semsuahtu Le laivum Tluanthu Uktu Bawipa
9Bel dang bang menma
lai bel pakhat in bel bawntu heh thu el ngam ni im?
Lai bel bawntu heh, Ziang bawn hnelhno isi?”
ti awng aw im?
Bel in bel bawntu ai kut ma mawi lohnak heh
sawi awng aw im?#Rom 9:20
10Aisu tal in a nu le a pa hnenah,
“Zaiman hetih bangin i bawn i si?”
ti ngam awng aw im?
11Israel ai Pathian thianghlim,
Hmai lam thil umdan a semsuahtu Bawipa in,
“I fate thula ahcen i sawithilhnak thu nai lo i si;
I kut ai bawnhnak ahkhai thu i pe thil lo i si.
12Laivum pumpuhluk a bawntu heh kaimah ing ai
a vumai umtu tuh minung semruai ing.
I hathnak in van khai pharh ai,
Ni le hlapui le arsite khiah uk ing.
13Cyrus a forhtu heh kaimah ing;
A pha lomi remm tuhin i tumtekhnak bawntu tuhin!
A fehhnak lampui tu cangruai tuh ing.
I khuapui Jerusalem tungdingruai leh tuhai
Saltanghnak i minungte luatruai tuh i.
Hemi bang bawn tuhin aisu inkhai a hlawhman pe lo i.
Nawhthuh khai pe lo i,” tiin ti i.
Cungnungber Bawipa in rel zo i.
14 Bawipa in Israel hnenah,
“Egypt le Ethiopia lianhnak tu nangmah ai tuh i.
Seba mi dungsang mite tu na sal cang tuhai
Thir cikcin thawn na hlun tuh i.
Na hmaiah lu ut tuhai,
‘Pathian in na umpui i amah ian Pathian i.
15Israel ai Pathian, a minungte a otu heh
A thupduntu Pathian i,’ tiin phuang tuh i,” ti i.
16Milim a bawntu hmuahhmuah zakthi tuh i;
Amahte veksen in mualpho tuh i.
17Ikhalselai Israel tu Bawipa in o zo i;
A mi nehhnak tu kumzangza hrang i;
A minungte tu mualpho tuh awng lo i.
18 Bawipa in van khai bawn i!
Ani tu Pathian i.
Amah in lailung heh semsuah ai lailung ah bawn i!
Raipui rai tuhin le kho ngai in bawn i.
Ramkhing le nelrawn ciang in bawn lo i;
Ikhalselai minung um tlak lairam in bawn i.
Amah in, “Kai tu Bawipa ing;
Pathian dang akonah khai um lo i.
19A thupruk in rel lo ing,
I tumtekhnak khai hmu thai lo hmunah thup lo ing.
‘Ramkhing le nelrawn ah i si tu ih,’ tiin
Israel mite ti awng lo ing.
Kai tu Bawipa ing ai thutak rel ing.
Thudik phuang ing,” tiin ti i.
Laivum Bawipa Le Babylon Milimte
20 Bawipa in, “Kawi tucuk ih, Laivum miphunte,
Ram ukhnak a bo hnua ai a tangtute,
Hmunkhat ah kawi tu ih.
Ning thukhamhnak hmunah suak tu ih.
Thing ai bawnhnak milimte a vakpui hnelhnotu,
Amahte o ben lotu khuavang hnenah sawngentute,
Hemite in zaikhai linghnak nai lo i!
21Ning thukhanhnak hmunah ning thu khiah rel tucuk ih!
Thunaitute tu pakhat le pakhat zawt dun tuseh.
Hlanlaipui in hemi thilte cang tuh i,
tiin a relciatu aisu i?
A minungte otu Pathian, Bawipa kaimah ilo ing maw?
Pathian dang aisu khai um lo i!
22“Laivum minung hmuahhmuah khai,
Kaimah lam hoi leh tu ilai ohnak ngah tuh i si.
Kaimah lek Pathian um ing.
23I relhnak heh thudik i ai, thleng tuh awng lo i.
I hming sal in thukham ing;
Mi zongzong kawi tuhai
I hmaiah khukhlep tlang tuh i.
I hmaiah thukham dun tuh i.#Rom 14:11; Filp 2:10-11
24“Kaimah hnen lek ah nehhnak le hathnak um i,
ti khiah phuang tuh ṭen i.
Ikhalselai i huatute in zakthihnak tuar tuh i.
25 Bawipa Kaimah in Jacob ai tesinfa tu hum tuhai
thangphathnak i pe tlang tuh i.
Currently Selected:
ISAIAH 45: RZB
Highlight
Share
Copy
Want to have your highlights saved across all your devices? Sign up or sign in
Zanniat Bible © Bible Society of Myanmar, 2018.