NALANGTE 19

Ephesa Khua Ah Paul Hleng Leh I

1Apollos Corinth khua ah a um laitak in Pual tu cia ram songah khual tlawng ai Ephesa khua ah hleng i. Ciata ah hnuahluntu hrekkhat tawk ai, 2Paul in, “Sangtu zo i si ai Rauhla Thianghlim ngah tlang aw i sim?” tiin zawt i.

Anite in, “Rauhla Thianghlim um i, ti rin ling bang hlah ing,” tiin sawn tlang i.

3“Ciatih ilekhaw zaibang baptisma lang tlang i si?” tiin Paul in zawt i.

Anite in, “John ai baptisma,” tiin ti tlang i.

4Ciafangin Paul in, “John ai baptisma tu sualsirtute caah i ai amah John in i hnua ai a hlengtu tuh pa tu Israel mite in sang tuhhnak mi i, cia mi tu Jesuh i” tiin ti i.#Mat 3:11; Mar 1:4, 7-8; Luk 3:4, 16; Joh 1:26-27

5Ciami za fangin Bawi Jesuh hming in baptisma lang tlang i. 6Paul in amahte vumah kut suan ai amahte vumah Rauhla Thianghlim hleng i; pong phun dangdang in pong tlang ai Pathian thu tu prophette bangin phuang tlang i. 7Anite tu pasalpui ciang hlaihnih dung khim i.

8Paul tu synagogue ah feh ai hla thum song ralpha ngai in misenpui hnenah thu rel i. Anite thawn thu el dun tlang de ai Pathian Ukhnak thu khiah amahte thinlung ah lut ngah tuhin zuam i. 9Ikhalselai mi hrekkhat tu lung ruh roh ai sang nuam tlang lo i; ciamanin miburpui hmaiah Bawipa ai lampui thu khiah relsiat tlang dekdo i. Ciamanin Paul in hlum ai sangtute khiah fehpui ai Tirannas tihnak thurelhnak innpui ah nisiar in thuzirh i. 10Ciatihin kum hnih song um ai Asia ram songai a umtu Judah mi ituseh, Gentile mi ituseh, amahte veksen in Bawipa ai thu tu za tlang i.

Sceva Ai Fapate

11Pathian in Paul khiah hmang ai a lamdang ngaihsunurkul pawl bawn i. 12A pavua le a elvelh ponniute rin miurte hnenah koih fangin amahte urhnak lawm tlang ai amahte songin khuasiate khai suak i. 13Nuamhmuncang ah vak ai khuasia a hnawttu Judah mi hrekkhat inkhai Bawi Jesuh hming in Paul bangin bawn tum tlang i. Anite in khuasiate hnenah, “Paul ai relhnak Jesuh hming in ning hnawt i ing,” tiin ti i. 14Judah mi Suangbawi Sang pakhat a hming Sceva tihnak pa ai fapate unau pasarih in ciatih bangin bawn i.

15Ikhalselai khuasia in anite hnenah, “Jesuh ling ing; Paul thula khai ling ing. Ikhalselai ning tu aisute i si?” tiin ti i.

16Khuasia molhmi pa in unaute pasarih khiah nem ai tawng dekdo ai neh sek i. Maliam tuar le hnikpon zik in inn in tlan tlang sek i. 17Ciami thula khiah Ephesa khua ai a ummi Judah mi le Gentile mi hmuahhmuah in za fangin lau tlang ngai ai Jesuh hming tu upathnak pe amam i. 18Sangtute songin mi tampui kawi ai zapui hmaiah amahte thilbawn tawnghnak tepawl khiah phuang dekdo i. 19Mitkher thiam tampui inkhai amahte mitkher laibute hmunkhat ah khawm tlang ai zapui mithmuh ah mai in tai i. Ciatih ai amahte taihnak mitkher laibute tu a man kom fangin ngun tangka #19:19 Ngun tangka fangkhat tu cialai mi pakhat in ni khat hlawh i. thawng sawmnga i. 20Ciatihin Bawipa ai thu tu a roh ngai in zai ai hat amam i.

Ephesa Ai Buaihnak

21Ciatih bangin thil a um hnuaah Paul in Macedonia ram le Achaia ram dung tlawng in Jerusalem ah lan tuh khiah a thinlung in ruat i. “Ciata i hleng hnuaah Rome khai hmu kul tuh ing,” tiin ti i. 22Ciamanin amah bawmtute lakai pahnih Timothy le Erastus khiah Macedonia ah hlat ai amah cenin Asia ram songah can tam deuh hmang i.

23Cia can dungah Ephesa khua ah Bawipa ai lampui thula thubuai lianpui pakhat um i. 24Ngun in pumsutu Demetrius tihnak pa in khuasia nu Artemis ai biakinn zuk khiah ngun in bawn ai a napertute caah paisa tampui ngah i. 25Ciamanin a napertute le anite bangin napertu dangdang khiah kokhawm ai anite hnenah, “U le naute, he kin naperhnak manin nainung tlang ising ti khiah ning linghnak i. 26Ikhalselai tunah Paul tihnak pa in zaibang in naper i, ti khiah ningmah rori in hmu ai ning linghnak i. ‘Minung ai bawn fawmhnak pathian tu pathian ilo i,’ tiin ti ai Ephesa khuasong le Asia ram veksen ti tuh tlak in mi tampui thinlung ah a relhnak heh lut ngah i. 27Ciatih imanin he kin naperhnak heh a hmingsia tuh ihang ti khiah laukulhnak um i. Ciahlaiah Asia ram le lailung vum pumpuhluk ah mi cangcang ai biahnak a thupui ngai Artemis ai biakinn heh mi in zaikhai siar tuh nawn lo ai a thupuihnak heh bo tuh i,” tiin ti i.

28Ciami heh misenpui in za fangin thinraw tlang roh ai, “Ephesa khua ah Artemis tu a lianber i,” tiin au tlang dekdo i. 29Ciatih ai auhnak aw in khua song dim sio i. Mizapui in, Macedonia mite pahnih Paul thawn khual a tlawngtu Gaius le Aristarchus khiah pom ai puai sik hmun bualrawn ah suahpui i. 30Mipui hmaiah Paul amah rori suak nuam napui sangtute in kham tlang i. 31Cia peng songah thunaitu a rualpuite hrekkhat in cia bualrawn ah feh tuh hrimhrim loin thucah tlang fawn i. 32Ciatihin bualrawn ah buai tlang hnelhno i; mihrek in pakhat thu au i, midang in thudang au tlang ve i; mi tam sawn incen ciata ah zaimanin suak ising ti rin ling tlang lo i. 33Judah mite in Alexander khiah hmaiah suakruai manin mi tampui in he thubuai a suakruaitu heh amah i vuah bang tiin ruat i. Cen Alexander in dap tu ih, tiin a kut in hmuh ai amah dinhmun ṭan in thurel tum i. 34Ikhalselai Judah mi a ilam khiah misenpui in ling fangin amahte au kel in au tlang leh hluahhlo ai, “Ephesa khua ah Artemis a thupui ber i,” tiin nazi pahnih song au tlang i.

35A tawphnak ah cia khua ai thunaitu lakah cazi pa in misenpui tu dapruai deuh ai amahte hnenah, “Ephesa khua mite, Ephesa khua tu a thupuimi Artemis ai biakinn le vancung in a hlahnak milim umhnak hmun i ti khiah mi zongzong ling siohnak i. 36A el bentu aisu um i si? Aisu inkhai el ben tuh lo i si. Ciamanin dap niu in um tu ilai ruat cialep loin zaikhai bawn mah ih. 37Hemite in biakinn song thilri ru tlang lo i, kin khuazingnu khai relsiat tlang lo napui heta ah suahpui i si. 38Demetrius le a hnuahlunte in aisu vum ahkhai sual mawhhluk tuh nai lekhaw tazacuai#19:38 ‘Tazacuai’ tihnak tu khuahlan deuh pon ahcen ‘tlangtai dun’ ti i. thilhnak zung nai hlen ising; thukhan nia le thukhantu upa khai nai hlen ising. Ciata ah tazacuai thil i. 39Ciahnak tahin thupui deuh ning daih lekhaw kin dan bangin khuasong mi veksen ai pumkhawmhnak ah relcat tuhhnak i. 40Zaimantifangin tunnia ai thil canghnak manin buaihnak suahpui i si tiin mawhhluk tuar pang tuh ti laukul i. Hetluk lawmlam in buaihnak thu ah hluk tuh cuang um lo i; cen zaimanin ning buai tlang i ti bang selai rel pha nai tuh lo ising,” tiin ti i. 41Ciatihin a ti hnuaah a taikhawmtute khiah piakruai sek i.

Currently Selected:

NALANGTE 19: RZB

Highlight

Copy