Zakaria 9
9
FIZARANA FAHAROA
Fitsarana sy famonjena ho an’ireo firenena akaiky ny Israely
1Teny faminaniana.
Tonga any amin’ny faritanin’i Hadraka ny tenin’NY TOMPO
ary miato any Damaskosy izany.
Fa ny mason’NY TOMPO mandinika ny olombelona
mbamin’ny foko rehetra amin’ny Israely
2sy i Hamata koa, izay mifanolotra aminy,
i Tiro sy i Sidona koa, izay manana fahendrena be.
3I Tiro dia nanao manda mafy ho an’ny tenany
ka nanangona volafotsy ohatra ny vovoka
sy volamena tsara ohatra ny fotaka eny an-dalambe.
4Indro, hofoanan’ny Tompo ny fananany
sady harodany any an-dranomasina ny mandany
ary ho levon’ny afo izy.
5I Askelona dia hahita izany ka ho raiki-tahotra,
i Gaza koa, ka ho toran-kovitra indrindra,
ary i Ekrona, fa ho tonga henatra ny fanantenany;
tsy hisy mpanjaka intsony ao Gaza
ary i Askelona tsy honenana.
6Zazasary no honina ao Asdoda
ary hopotehiko ny reharehan’ny Filistina.
7Hesoriko eny am-bavany ny rany#9.7 ny rany: ny Filistina dia nihinana hena niaraka tamin’ny rany fa tsy mba araka ny lalàna teo amin’ny Israely (Gen 6.4; Lev 3.17).
ary tsy ho eny anelanelan’ny nifiny ny fahavetavetany#9.7 fahavetavetana: mety hilazana hanina maloto araka ny lalàna izany (Lev 11.10 snm), na ny sampy (Eze 5.11), na koa ny hena naterina tamin’ny sampy (Isa 66.3).;
ary izy koa dia ho sisa ho an’Andriamanitsika
sy ho toy ny lohany amin’i Joda,
ary i Ekrona dia ho toy ny Jebosita.
8Manangana toby hiaro ny tranoko Aho
noho ny miaramila betsaka,
dia izay mandroso sy miverina;
mba tsy hisy mpampahory handeha hamakivaky eo aminy intsony;
fa ankehitriny dia ny masoko no miambina azy.
Ilay mpanjaka hitondra fiadanana
9Mifalia indrindra, ry Ziona zanakavavy!
Manaova feo fifaliana, ry Jerosalema zanakavavy;
Indro, ny Mpanjakanao avy ho anao.
Marina Izy sady mpandresy,
manetry tena sady mitaingina boriky,
boriky tanora, zanaky ny borikivavy.
10Hofoanako tsy hisy kalesy fitondra miady intsony any Efraima,
na soavaly any Jerosalema;
hotapahiko koa ny tsipìka fiadiana.
Hanambara fiadanana amin’ny Jentilisa Izy;
ny fanapahany dia ho hatramin’ny ranomasina iray ka hatramin’ny ranomasina iray
ary hatramin’ny ony Eofrata ka hatramin’ny faran’ny tany.
Ny fanafahana ny mpifatotra
11Ny aminao koa, noho ny ran’ny fanekena taminao
no efa namoahako ny mpifatotra ao aminao avy tao an-davaka tsy misy rano.
12Miverena ho amin’ny fiarovana mafy,
ianareo mpifatotra manana ny fanantenana!
Anio koa no hanambarako hoe:
Hanonitra avo roa heny ho anao Aho.
13Fa nohenjaniko ny tsipìkako, dia i Joda,
ary i Efraima no nataoko zana-tsipìka;
ary hotairiko ny zanakao, ry Ziona,
hiady amin’ny zanakao, ry Gresy!
Hataoko toy ny sabatry ny lehilahy mahery ianao.
14Ary NY TOMPO hiseho eo amboniny
ka handeha toy ny tselatra ny zana-tsipìkany;
NY TOMPO Andriamanitra hitsoka anjomara
ka handroso amin’ny tafio-drivotra any atsimo.
15Andriamanitra, Tompon’izao rehetra izao, no hiaro ireny;
dia hihinana ireny ka hanitsakitsaka vaton’antsamotady;
ary hisotro ireny ka hihorakoraka tahaka ny azon’ny divay
ary ho feno tahaka ny lovia famafazana ireny,
tahaka ny zoron’ny alitara.
16Amin’izany andro izany NY TOMPO Andriamaniny
dia hamonjy ny olony toy ny famonjy andian’ondry;
fa ireny no vato eo amin’ny satroboninahitra,
mamirapiratra eny amin’ny taniny.
17Akory ny hasoany! Ary akory ny hatsaran-tarehiny!
Vary no hampaharoroka ny zatovo,
ary ranom-boaloboka kosa no hampaharoroka ny zazavavy.
Currently Selected:
Zakaria 9: BPFF
Highlight
Share
Copy
Want to have your highlights saved across all your devices? Sign up or sign in
Baiboly Protestanta Malagasy © Malagasy Bible Society, 2011.
