Лука 14

Со камэл тэ керэс андэ суббота

1Екхвар андэ суббота, кана о Исус ало тэ хал екхе барэ манушэстэ андар фарисея, одола лачес дикхенас пал Лэстэ. 2Мамуй ко Исус бэшло мануш, насвало вадянка.

3О Исус пхучляс э сикляримарен э Тхэдимаскерэн тай э фарисеен:

— Муклёл тэ аиндэрдиен андэ суббота?

4Он тэныкя сас. Озаман о Исус колисаило ко мануш, аиндэрды лэс тай мукляс. 5Дэчи Ов пхэнляс лэнги:

— Кастэ-то андар тумэндэ чяво я гурув кан пэрэл андэ ханинг, та со тумэ, на кан никалэн лэс чяльти, джи адава тэ овэла андэ суббота?

6Лэнги ништо на сас тэ пхэнэн адалэски.

Пхукаипэ катар намлыдэс тхана ко хабэ

7О Исус дикхелас, сар о мануша, савэн динэ икос, лэнас о зиядэ тхана пал конас, тай пхукавдяс лэнги пхукаипэ:

8— Кана тут дэн икос ки биявэско мисяфири, ма бэш зиядэ тханэстэ. Вай андар одолэндэ, кон диндило икос, кон-то кан овэл намлыс тутар, 9тай дэчи о сагбус, кай диняс икос ли тут, ли лэс, кан пашол тутэ тай кан пхэнэл: «Дэ о тхан акалэ манушэстэ». Тай туки кан камэл ладжяваса тэ лэс палуно тхан. 10Кана тут дэн икос, джя тай бэш палунэ тханэстэ, о сагбус тэ пашол тутэ тай тэ пхэнэл: «Амал, накх ко лачё тхан». Дэчи туки кан овэл дино нами ангал алаи ко джемэяти. 11Кажни, кон барярэлпэс, кан овэл тикнярдо, тай тикнярэлпэс кан овэл ваздино.

12Пал отхэ о Исус пхэнляс э сагбуски:

— Кана ту керэс хабэ десе я бэлвэле, ма дэ икос тэ амалэн, пхралэн, тухумен я барвалэ комшудэн, тай он тэ на дэн икос тут мамуй тай одолэса тэ на покинэн туки. 13Кана ту керэс хабэ, дэ икос лэстэ э чёрэн, болавдэн, банген, корэн. 14Аки дэчи ту кан овэс бахтало, вай он нащи тэ дэн палэ тут, тай ту кан диндёс палэ андэ дживиндипэ ки чяченго.

Пхукаипэ одолэндар, савэ сас динэ икос ко хабэ

15Кана екх андар савэндэ ханас шунляс адава, ов пхэнляс э Исусески:

— Бахтало одова, кон кан хал манро андэ Патишайлыки ки Дэвлэско.

16О Исус пхэнляс лэски:

— Екх мануш гортярдяс баро хабэ тай диняс икос бут дюняс. 17Кана ало вахыти э хабэско, ов бичялдяс пэ иргатес тэ пхэнэл кас динэ икос: «Элан, алаи газыри». 18Ай екх пал аврэстэ он алаи лилэ тэ апувикерэнпэс. О екх пхэнляс: «Мэ киндём пху, тай манги камэл тэ джяв тай тэ дикхав ла. Апувикер ман, мангав тут». 19Авэр пхэнляс: «Мэ киндём пандж парэс гурувэн тай джяв тэ галяв лэн. Апувикер ман, мангав тут». 20О трито пхэнляс: «Мэ прандосаилём тай оничин нащи авав».

21О иргати ало тай пхукавдяс алаи э сагбуски. Дэчи о сагбус э кхерэско холясаило тай пхэнляс э иргатески: «Джя чяльти ко улицэс тай ко танга дроморэ ки дизаки тай ан атхэ чёрэн, болавдэн, корэн тай банген». 22«Сагбуса, — пхэнляс о иргати, — одова, со ту пхэнлян, кердём, ай дага си тхан». 23Дэчи о сагбус пхэнляс э иргатески: «Джя ко дрома тай пашал баря тай манг алаен, кас кан дикхес, тэ авэн атхэ, о кхер минро тэ овэл пхэрдо джемэяти. 24Пхэнав тумэнги, кай андар ангалунэндэ, кас диням икос, никхон на кан хал мэ хабэстэ».

Со камэл тэ керэл о сиклярдо э Исусеско

25Э Исусеса джялас бут дюняс. Ов болдиняспэс лэндэ тай пхэнляс:

26— Кон авэл Мандэ тай дэхэл дадэс тай дэя, ромня тай пуен, пхралэн, пхэнен я джи по бэшыпэ бут, ниш Ман, ов нащи овэл Мо сиклярдо. 27Одова, кон на гелэл по хачи тай на джял пал Мандэ, нащи овэл Мо сиклярдо.

28Кон-то андар тумэндэ тэ мангела тэ тхэл башня, та со, ов на кан бэшэл ханик тай на кан гинэл алаи, со камэл, тэ джянэл, кан рэсэл лэски ловэ тэ бытэрдиел о тхэдипэ? 29Вай ов тэ тхэла фундамент тай нащи кан бытэрдиел о тхэдипэ, тай алаи, кай дикхен адава, кан овэн лэстар, кай асан: 30«Адава мануш лиляс тэ тхэл, ай нащи бытэрды». 31Я патишаи, саво кидэлпэс ко марипэ мамуй аврэ патишаестэ. Та со, ов на кан бэшэл ханик тай на кан тюшундиел, зорало ов дэшэ бине манушэнца кан тэрдярэл одолэс, кон кан авэл опэр лэстэ маримаса бишэ биненца? 32Тэ нащи, дэчи, бискай о душмани дага дур, ов кан бичялэл бичялдэн тэ манген лачимаса. 33Акана, одова андар тумэндэ, кон на кан ачявэл алаи, со си лэстэ, нащи овэл Мо сиклярдо.

34Лон — лачё шэи, ай тэ нашавэла о лон по дами, тай со генэ кан керэл лэс лондо? 35Нэ андэ пху ов на лачё, нэ андэ навози, лэс ачёл екх тэ чес. Кастэ си кана, тэ шунэл, мэ шунэл!

Currently Selected:

Лука 14: КРБ

Highlight

Copy

Want to have your highlights saved across all your devices? Sign up or sign in

This work is licensed under the Creative Commons Attribution Non-commercial No-Derivatives 4.0 license. http://creativecommons.org/licenses/by-nc-nd/4.0/

Learn More About Библия опэр крымски романи чиб