Malika 7

1Pwu vakabiha upwu ale avapalisai navamańakalata avange avahumile mu-Jelusalemu. 2Pwu vakavona avange avakongi va mwene isinu vilila amavoko agalamile. Mańa vwu galamile avene, ungave nupugwihi mmavoko. 3Ulwakuva avapalisai nava-Juta voni vwu navilya isinge isinu vwu navapugwihi mmavoko kavilikavili tango. Vwu vigaha vuvule-vule ukukonga ulwiho ulwu vavalekye avakoṅona va vene. 4Nisyu vangave vahumile pakugula isinu, pwu navilya vuvule, bako tango vipuguha. Natsene ińiho tsa vene ńongosu itsu vita umunu upita akongage vuvule-vule, itsa kuhutsuga nisińwelo nimbale nindelema tsa kimanga. 5Pwu vakambutsa avapalisai navamańakalata vakata: Avakongi vako navikonga kiki ińiho itsu vatulekye avakoṅona vitu? Isinu vilya kiki kitapuguha mmavoko? 6Umwene akanda akata: Agolwise jilweli UJesaja upwu atsovelage ṅani ńi vanwasi uńe upwu atsovaga itsili pakalata itsita: Avanu ava vikuńimikila gu ndomo gwene, inumbula tsa vene vwu tsiva pavutale vuvule. 7Ulwimiko ulwu vikuńimikila nalukuvavumbulila kinu, mańa ulumańiso ulwu vimańisa lwiho vuvule lwa vanu. 8Mańa indagilo tsa Nguluve tsu mutsilekile, itsene ińiho tsa vanu tsu mukonga. 9Akavavula akata: O, munotsitse pange upwu mulimbwe indagilo tsa Nguluve vwu mwita tukongage itsińo ińiho. 10Mańa umwene UMose alagye ṅani ilyakuta: Umwimikage udadajo nuvańoko nilyakuta: Uvi ikunduka udadaje nuvańina vi upita abudwagwe. 11Uńe mwita: Angave umunu atsovile kwa dadaje nakuvańina atye “Kolibani”, kwu kuta ndili ndikukupa isyu usumbilwe, lweli ulwakuva sya kulaha mwa Tempeli–pwu uńe mwita vwu vuvule vwu avelye vuvule-vule. 12Mańa kwu kuva mudindile mutye alampetsaga nisinge udadaje nuvańina. 13Pwu nińiho tsińo mukulilimbula ilimeńu lya Nguluve. Nitsinge itsili nditsi tsu ndi natso ńongosu. 14Pwu akavalundamanya avanu ikipuga kyoni akavavula akata: Mupulihitsage kwane ńivoni, mutsimańage itsu ndikuvavula. 15Nisinge isya panzi nasikundamya umunu upwu sikwingila mwitumbu mmwene. Bako tsitsu tsihuma mmwene, tsu tsikundamya umunu lweli. 16Uvi ali natso imbulukutu vi apulihitsage. 17Vavwene itsile ukwu ale navanu ingye nńumba, pwu vakambutsa avakongi ikihwanihitso iki. 18Umwene akata: Nuńe humbe vwu ngahile, nandi nuluhala? Tsu mukanale nuńe ukutsivona ukuta syoni isya panzi singave sikwingila mmunu, syu nasikundamya napange? 19Mańa nasikwingila munumbula, bako sibiha mbutumbu vuvule, sivuja sitagwa kulińasi. Vwu sivalatsivwa vuvule-vule syoni isinu. 20Akata: Lola itsihuma mmunu tsu tsikundamya lweli. 21Mańa munumbula tsa munu ngati, mwu tsihuma ińisagilo imbivi tsoni, nitsa kuńila nundala va munu, nitsa vuhitsi, nitsa vubudi, 22nitsa vuligu, nitsa kunogwatwoni, nitsa vuvivi, nitsa luhala uluvivi, nitsa vupumu, nitsa kavini, nitsa madusi, nitsa lwiginyo, nitsa vutsimu. 23Tsoni imbivi itsi tsu tsihuma mwitumbu mmunu, tsu tsikundamya umunu.

24Pwu akabiha nkilunga kya mu-Tili namu-Sitoni, Mwu akatsikwingila nńumba akata pange navikumbonaga avanu. Mańa akapulikika. 25Mańa ujyunge undala uvi ale nakalive akale nimepo imbivi apulike ukuta mwale. Pwu akabiha upwu ale akambilukila mmalunde. 26Umwene undala ale n-Giliki, ahumile mu-Silopeniki ikivumbuko. Vi akatekelesa kumwene akata: Ungamumyaga imepo imbivi mumwalivango. 27Umwene UJesu akata: Leka tango vigutage va vana, mańa mwiko ukutola isinu sya vana ukutulahila utubwa. 28Umwene undala akanda akata: Kwu jilweli nkuludeva, lola nditye ulwakuva nutubwa twihola utulagalila utusigala vwu vilya avana. 29Umwene UJesu akanda akata: Ulwakuva utsovile ilimeńu ili, pwu bihaga vutsivonaga imepo imbivi jihumile mumwalivo. 30Pwu akabiha kuvutsenge, akatsivona imepo imbivi jihumile jilweli, akatsivona umwana agonile vuvule pavugono.

31Akavuja akahuma nkilunga kya mu-Tili akagenda ija mu-Sitoni akatsisika pańanza jya mu-Galilai pagati pakilunga kya mu-Ndekapoli. 32Pwu vakagega kumwene uvatsivye uvi ale kinunu, vakatekelesa kumwene vakata: Umbike ikivoko. 33Umwene akigava nave kuvanu, akavika iṅonze mumbulukutu akabehela namati akamwabasa ululimi lwa mwene 34akalola kukyańa akidakula pwu akata: Hepata, kwu kuta dinduka, 35Pwu imbulukutu tsa mwene tsikadinduka, nululimi lwa mwene umwu lwakungilwe lukavopoka akatsova vuvule akagolosa. 36Umwene akatanila akata: Ndambulaga nujyunge umunu. Avene vakavona antanye pwu vakongeletsa vunnonu ukutsova. 37Pwu vakadega vakalutilila vuvule vakata: Anotsitse tsoni, avatsivye ikuvapelela ukupulika, avali kinunu ikuvapelela ukutsova vuvule.

Currently Selected:

Malika 7: Kinga

Highlight

Copy