Malika 6

1Pwu akahuma baho akabiha mbutsenge umwu akulye. Avakongi va mwene vakankonga. 2Vwu itsile usabati pwu akavavula inongwa nńumba jya kwisajilamwo. Avene avapulikaga vakadega vakata: Tsu atsivwene ndaku tsitsitsi? Lwu luhala luki ulu ali nalwo? Syu sipelwa siki isyu ipela mmavoko ga mwene? 3Nda vi vi mpunza sibiki ulya, nda vi vi nswambe va Malija, vi vi mamajavo va va-Jakobu nu-Jose nu-Juta nu-Simoni? Avahatsave nda natwiva navo voni apa? Pwu tsikavapelela ukuvambutsa tsitsitsi. 4Umwene UJesu akavavula akata: Mwoni mbunge uńamalago vikumwimika avanu, mumyave lweli umwu akulye nambalukololwe nanńumba jya mwene vwu vikungilila. 5Akabela nukupela ikinge ikipelwa kya maka mumwa. Kene akakuvavika amavoko avange avatamu aka kuvaponya, kwu akapela aka kene. 6Akadega ulubedo lwa vene. Pwu akatsungutila mbutsenge vwoni vwa pambale, akavavula inongwa. 7Akavilanga avakitsigo navavili akavasuṅa inzila uku vavili uku vavili. Akavapa amaka ga kuhumihitsa imepo imbivi. 8Akavavula akata: Ndavetsaga nisinge munzila. Lu lukongotsa lwene, lwu muve nalwo. Kwu bako ukuva nakapako ka mbopo nisinu nindalama mungwamba. 9Isikato syu muswalage, kwu bako ukuva nigyańingilitsa givili. 10Akavavula akata: Nińumba ijyu mukwingilamwo mwu mukagone mumwa mukasikage lulwa mwiluta. 11Avatye vabelile ukuvupilila, vatye vabelile ukupulihitsa itsu mwitsova, vwu nkahumage mmyavavo, nkavatovelage nulusumbe kumalunde, tsu tsive tsa kumańilamwo avene. 12Pwu vakabiha vakasimilitsa lilyakuta nkilivukage. 13Vakatsihumya imepo imbivi ńongosu, navatamu vakavabaka nimono, pwu vakapona.

14Tsitsitsi tsu tsikapulikika nakunkuludeva UHeloti, ulwakuva ilitavwa lya Jesu lyapulikike. Umwene UHeloti akata vi Johani umwotsi, atsukile umwu aswe pwu ipela isipelwa isi. 15Avange vakata vi vi Elija, avange vakata namalago, ali ndavańamalago va katale. 16Umwene UHeloti vwu apulike pwu akata: Vi vi Johani uvi ndantemile untwe, atsukile umwu aswe. 17Ulwakuva UHeloti ansuṅye avanu UJohani avatsikumwibata, andindye nńumba jya vańololo panongwa tsa Helotya undala va lukololwe UPilipo. Ulwakuva ańilile nave. 18Mańa UJohani ambulile atye: Mwiko ukuva nundala va lukololwo. 19Tsu itsi UHelotya asingile atye ndikumbudaga, mańa akalemwa ukutsivona itsa kumbudila. 20Umwene UHeloti vi andwadaga UJohani ulwakuva ambwene ukuva ngolosu, ambwene ukuva munu ungolosu. Sikutsoni akampoka. Angave ahumile pakupulika itsu ambulaga UJohani, pwu atsikongaga ńongosu. Akata manonu amameńu ga mwene. 21Ulunge pwu likitsa ilitsuva ilinnonu umwene. Mańa UHeloti avilangile avańivaha va mwene navalongotsi va ligoha navatwa va mu-Galilai kwilya isinu sya pamwaka gwa kukumbuhitsa ukuholwa umwene. 22Vwu avwene vali pakulya isinu, pwu akalive ka Helotya kakingila umwu vale kakanema. Pwu kakanoga nakwa Heloti nakuvoni avatamile nave pakulya isinu. Pwu unkuludeva akakavula akahinza akata: Dovaga akange kwane isyu ungave unogilwe ukudova ndikukupetsaga. 23Akajigila nulujigo akata: Isyu vudova ndikukupetsaga syoni. Ungave utye ndigavilage pagati napagati ikilunga kyango ndikupetsage uluvasu ulunge ndikukupetsaga. 24Umwene uminza akahuma akatsikumbutsa uvańina akata: Ndidove kiki? Umwene uvańina akata: Dovaga untwe gwa Johani umwotsi. 25Akanila umwu ale unkuludeva akatsita: Ndidova ukuta umetsage lino vuvule-vule untwe gwa Johani gwa mwotsi pandelema. 26Pwu unkuludeva akasusuvala sitso. Lola ulwakuva ajiganikye ṅani nupwu vapulike avalitsaga nave isinu pwu akadwada ukubela. 27Pwu unkuludeva akansuṅa ujyunge uva ndudeva akata: Bihaga utole untwe gwa Johani. 28Vi akabiha akatsikuntema untwe nńumba jya vańololo. Akagega untwe gwa mwene pandelema akampa uminza. Umwene uminza akatsikumpa uvańina. 29Vwu vapulike avakongi va mwene, pwu vakatsikugupimba ummana gwa mwene vakatsikuguvika mbuguli.

30Pwu avapositili vakatsikwitsa ukwu avasuṅile vakalundamana upwu ale UJesu, vakambula tsoni itsu vavombile nitsu vatsovile. 31Umwene akavavula akata: Tsukwi tuvuke tukijekelage ndukungu mwu tugatalukage padebe. Mańa valemilwe ukulya ulwakuva avanu avansumbilwe umwene vale vongosu. 32Pwu vakalovoka mwiboti vakabiha ndukungu, mwu vakatsikijekela. 33Avene avanu va vongosu vakavavona vwu vikipaka vakavamańa ukwu vibiha, pwu vakahuma mbutsenge vwoni, vakagenda ija pamwambo ukubiha ukwu abihaga umwene. Vakatsisika vwu akanale ukusika umwene. 34Pwu UJesu vwu itoga pwu akavavona ikipuga ikivaha vuvule. Pwu ikisa kikambona mwitumbu ulwakuva vale ndiṅolo inzilandimi. Pwu akavavula inongwa ńongosu. 35Vavwene vwu vuhwe avakongi va mwene, pwu vakahegelela kwa Jesu vakata: Mwu mundukungu umu, vuhwe lino, 36uvatavulage avanu vabihage nduvanza mwoni mumbale nambutsenge mwoni vagulage isya kulya, mańa navagegili isinu. 37Umwene akanda akata: Muvapetsage uńe isya kulya. Avene vakata: Pange tubihage kukuvagulila isinu sya pandalama vamia vavili (200) pwu tuvapetsage isya kulya? 38Umwene akavavutsa akata: Ndi nisivanda silingi? Mbihage nkalole. Pwu vakatsilola vakata: Tuli nisivanda sihano nisomba ivili. 39Akata: Mbavule voni vatame pasi mbulilo mbulilo palińasi iligu. 40Pwu vakatama vakava ndukindi ndukindi. Uku imilevulu kitsigo ukwu imilevulu gihano. 41Pwu UJesu akatola isivanda sihano isi nisomba ivili akalola kukyańa akasana. Pwu akameńulanya isivanda akavapa avakongi va mwene, vwu vakavapa avanu. Natsene isomba akavagavanya voni. 42Vakalya vakiguta voni. 43Vakalundamanya nutumeńukila utwu vasigitse, tukadiga isiswiswi kitsigo nasivili natwene nutusomba utusigye. 44Avene avalitsaga isivanda vale pavaelipu vahano (5000) ukuvala va vagosi vene.

45Pwu UJesu akavakujisa avakongi va mwene akata: Mwipakilage ṅani mwiboti, mulongolage uńe ukulovoka ukubiha mu-Betisaita umwambo gulya. Ndivatavulage tango avanu. 46Vwu valekeṅine pwu akatoga pakidugala pakwisaja. 47Vwu vuhwe pwu iliboti lya vene likava pagati pańanza, Umwene akava mwene pamwambo. 48Akavalola akavona vilwa vikijumilitsa ukugendetsa iliboti, ulwakuva imepo jyahumile ukwu valotsitse. Umwene akavona pakavalilo kani umwu vivalila avilonda pakilo, akavakonga akakada vuvule pakyańa pańanza ukugenda. Akata ndilutile vuvule. 49Avene vwu vambwene ukugenda vuvule pakyańa pańanza, pwu vakata pange mwitsitsi gugenda, vakakuta. 50Mańa vambwene voni, vakadwada. Pwu umwene akatsovela ṅani akata: Mwidulusage vuvule mańa nene, kwu bako ukudwada. 51Akipaka mwiboti lya vene. Pwu imepo jikanunala. Pwu vakagangaluka vakadega jilweli. 52Mańa navaluvweni uluhala munsivanda silya ulwakuva inumbula tsa vene tsumile. 53Vwu valovwike pwu vakatsisika nkilunga kya mu-Genesaleti, mwu vakatsikikunda pakilovoko. 54Vwu vahumile mwiboti pwu avanu vakammańila ṅani umwene ukuta vi jujwa. 55Vakahamba mwoni umwu kitsungutye ikya mumwa, vakatsikuvapimba pavusaga voni avatamu vakavagega ukwu vapulike ukuta kwalikwo. 56Mwoni umwu agendaga mbutsenge nammaboma numwu vatsengile vuvule, mwoni vakavavika pambanza avatamu, vakantekelesa vakata: Twibatage ikilundwa kya mwene kumalunde. Voni avamwibataga vwu vakapona vuvule.

Currently Selected:

Malika 6: Kinga

Highlight

Copy