Malika 14

1Lola gasigye amatsuva gavili ukwitsa nu-Pasa namatsuva amavalatse ga sivanda isitsilansabe. Pwu avateketsi avavaha navamańakalata vakalonda itsa kumwibata nitsa kumbuda, vakata mańa uluhala luvekwo. 2Vakata: Mańa tulamwibataga pamatsuva amavalatse, mańa pwu vikutuhambukila avanu.

3Avwene vwu ali mu-Betanija nńumba jya Simoni uńabuba vwu ali pakulya isinu, pwu akahegelela kumwene undala ujyunge uvi agegile ikibake kya mono inalamu sitso inzilakuhanga nakanu akange, akabuda ikibake akandudilila pantwe. 4Pwu avange avale baho gukavipa, vakavulana vakata: Itaga tsiki imono vuvule-vule? 5Mańa vangave vagutsaga imono itsi pwu ndili vakavile indalama ndili tsilutile napavamia vadatu (300) uvwongosu, tsu ndili vavagavinye avagatsu. Pwu vakantanila undala. 6Umwene UJesu akata: Mundekage undala uju, mukumpelela kiki ulususuvalo. Mańa imbombo itsu ambombye une nnonu. 7Ulwakuva avagatsu vwu ndi navo sikutsoni. Ngave mwatetsaga tuvapetsage isinnonu, sikutsoni navijaga. Lola une nandiva mwańe umwu sikutsoni. 8Avombile anotsitse umwene. Atengulye ṅani ambakye ṅani imono tsa kunsilila une. 9Jilweli-lweli ndikuvavula ndita: Mwoni umwu inongwa innonu tsitsitsi tsilapulikika ikilunga kyoni, mwu tsilatsovelwa lunine natsene nitsu avombile undala uju, tsilava tsa kunkumbuhitsa jujwa.

10Pwu UJuta va mu-Kalyoti ujyunge uva mbakitsigo navavili akabiha kuvateketsi avavaha vakatsitsovana itsa kuvahilikila UJesu. 11Avene vwu vapulike tsitsitsi pwu vakahekela vakata: E tukukuhombaga indalama. Pwu umwene akalonda ukuvahilikila pavunnonu.

12Palitsuva ililongotsi lya sivanda isitsilansabe ilyu vihinzila akakolo ka Pasa pwu vakambutsa avakongi va mwene vakata: Vwatye tukagahage ndaku pavulilo uve akakolo ka Pasa? 13Pwu umwene akavasuṅa avakongi va mwene vavili akata: Mbihage mbutsenge mulya mwu mutsikwaganilaga numunu uvi apimbile inzilo jya magasi vi mukankongage. 14Mukingilage nave umwu ikwingila umwene. Mwu nkatsovage nave umwene ńumba nkatetsage: Umańisi atye: Ińumba jya kulilamwo akakolo ka Pasa nune navakongi vango jyu jiliku? 15Pwu ndavonaga umwene ikuvavonya ińumba imbaha jya kukano, vatandike nisitamilo vagahile. Mwu nkagahe isinu sya kulya uvwe. 16Pwu avakongi va mwene vakabiha vakatsisika mbutsenge vakatsivona nduvwu avavulile Pwa vakagaha isinu sya Pasa.

17Vwu vuhwe pakimihe pwu akatsikwingila mumwa navakongi va mwene kitsigo navavili. 18Vwu vatamile pakulya pwu UJesu akavavula akata: Jilweli-lweli ndikuvavula ndita: Umwu mbelye ńi twilya twivoni lino apa ujyunge alańendama, 19Pwu vakasusuvala sitso vakambutsa mpamato-mpamato vakata: Nda ndive une? 20Umwene akavavula akata: Umwu mbelye kitsigo navavili, vi uvi tutsabanya nave nune nkihava pakulya. 21Umwene Uńamunu vi viki, vi iluta vwu lilyo likuntsova mwa kalata. Uli viki lweli vi munu vi vukumendama. Pavetsaga pannonu kitaholwa lusiku vi munu uve! 22Vwu ali pakulya pwu UJesu akatola ikivanda akasana akameńulanya akavapa akata: Koti ugu gwu mańa gwango ugu. 23Akata nikinwelo akatola akasana nakyene akavapa, voni vakanwa. 24Akavavula akata: Gwu nkisa gwango gwa lwidiṅano ugu, ugukuvadudikilaga va vongosu. 25Jilweli-lweli ndikuvavula ndita: Ndihumaga ilelo iji nandilavuje ukuńwa uvwa seke tsa masilu, nditsisikaga palitsuva ilyu ndilańwetsaga uvupya vuvule ndudeva lwa Nguluve.

26Pwu vakimba ulwa kunginya Unguluve pwu vakahuma panzi vakabiha kukidugala kya mono. 27Pwu UJesu akavavula akata: Ikilo iji ńivoni ndatetsaga ipelile va kutwambutsa une. Ulwakuva livigilwe mwa kalata ilita: Ndilantovaga undimi, pwu iṅolo tsa ndimo tsihambage. 28Vwu nditsukile pwu ndilalongola mbulongolo ukubiha mu-Galilai. 29Umwene UPetele akamwanda akata: Nupwu voni vita ipelile va kutwambutsa uvwe, bako nandilatsove ipelile va kuńambutsa une uve. 30Akanda UJesu akata: Jilweli-lweli ndikukuvula ndita: Ikilo iji vwu iṅongove jikanale ukuvika kavili, pwu vwu vwibelile kadatu kwane vwu utye nandimańili une. 31Umwene pwu akalutilila pakutsova sitso akata: Napene nupwu tungave twavetsaga kuswa twivoni nuve, napene nandilibele kwave ukuta nandimańili uve. Voni navanine vakatsova ili.

32Pwu vakatsisika paluvanza ulunge ulwu vatetsaga mu-Getisemane ilitavwa. Umwene akatsova navakongi va mwene akata: Mutamage apa, uńe ndisajage tango ukwu. 33Akatola va-Petele nu-Jakobu nu-Johani vwu akaluta navo. Pwu akadetema nukuva nkyańa vuvule inumbula. 34Pwu akavavula akata: Umwuja gwango ukususuvala ulususuvalo lwa kwoni nakwoni vuvule pwu nditye ndili pakuswa. Mbetsage apa, mbetsage miho. 35Umwene akaluta padebe akatsibiluka pasi akisaja akata: Pangave pavonekaga pakuluta kwane akavalilo aka. 36Akata: Aba, kwu kuta vi dada, nasikukulema isinge, kingalutaga ikinwelo iki pane. Mańa nene viki itsu ndinogilwe une, ńage jyuve, tsitsu unogilwe uve. 37Akitsa akavona vagonile itulu. Pwu akatsova nu-Petele akata: Simoni, O ugonelye itulu. Napene napakavalilo kapamato kene pakulemile ukuva miho uve? 38Mbetsage miho mwisaje ulugelo ukuta lulavavonaga. Ugwene umwuja gwu gwidike, ugwene gu mmana, mańa gwu ndekedeke. 39Akavuja akabiha akisaja, akatsova ga mameńu ugwu atsovaga ululongotsi. 40Vwu avujile itsile pwu akavona vavujile vagonelye itulu, ulwakuva itulu javalemile vuvule, natsene itsu vamwandaga vakasinzila vuvule. 41Pwu akavuja akitsa ulwa datu akatsova navo akata: Mugonage mugatalukage ulunge lusiku. Lino vuvule akavalilo kitsile. Lola Uńamunu viva pakuvapa mmavoko avatulanongwa. 42Mwimage tugendage, itsile uvi ikuńendama.

43Pwu ṅani-ṅani vuvule vwu ali pakutsova amameńu aga, pwu itsile UJuta va mu-Kalyoti uva kitsigo navavili, agegile navanu ikipuga vuvule, vwu vibite ninuvwo nisonzo, vahumile kuvateketsi avavaha nakuvamańakalata nakuvańivaha avenekivumbuko. 44Umwene uvi amendamaga avavulile ikimańilo kya kumańilamwo ukuta vi uju atye uvi ndikuntsiba kundomo vwu vi jujwa vi nkamwibatage nkalute nave, mbandikage alakimbilaga. 45Vwu asike UJuta pwu akańilila mumana UJesu akata: Vi mańisi vango! Pwu akantsiba kundomo. 46Pwu avene vakamwibata UJesu. 47Avene avimile baho ujyunge akaswekula ulwuvo lwa mwene akamenga unkivaga va nteketsi umbaha, akampyatula imbulukutu mamato, 48Pwu UJesu akatsova navo akata: Upwu mwitsile kukuńibata une pwu mutye tutsikumwibata umitsi, mwibite nińuvwu nisonzo. 49Sikutsoni upwu twavetsaga twi voni mwa Tempeli upwu ndavavulaga inongwa sikutsoni, pwu namuńibiti. Lola vwu tsigahilwe vuvule-vule ukwitsa itsili mwa kalata. 50Pwu vakandekela voni avakongi va mwene vakakimbila. 51Pwu ale ujyunge undume uvi ankongaga, vi aswalile ikilundwa kyene kya nsabwa umbalasu mumana, vi vakamwibata. 52Pwu umwene akavalekela ikilundwa akakimbila vuvule.

53Umwene UJesu vakangega vakabiha nave panteketsi umbaha ulwakuva pwu valundamine avateketsi avavaha navańivaha avenekivumbuko navamańakalata. 54Umwene UPetele vi akakonga pavutale akatsisika navo nńumba jya nteketsi umbaha, pwu akatsitama navakivaga pakwota umwoto. 55Avene avateketsi avavaha ululundamano lwoni lwa vatsovanongwa vwu vakalonda itsinge itsa kundema UJesu itsa kumbudila, mańa vakalemwa. 56Vakavapwo avakuntsova itsa vunwasi, vakavona itsu vikuntsova natsikwaganila vunnonu. 57Pwu vakima avange vakantsova itsa vunwasi vakata: 58Umunu uju tukambona ita ndilumanile ukumamula ińumba imbalatse jya Nguluve iji, ijyu vatsengile namavoko, ndivomba amatsuva gadatu vuvule pakutsenga ijyinge inzilakutsengivwa namavoko. 59Lola natsene natsitsitsi vwu vikuntsova vakavona natsikwaganila. 60Pwu akasisimuka unteketsi umbaha akima pavuvalasu akambutsa UJesu akata: Tsoni itsu vikukutsova ava, nda navukwanda ilinge uve? 61Umwene akava mye vuvule akaleka nukwanda nilinge. Pwu unteketsi umbaha akavuja akambutsa akata: Nda veve vi Kilisiti, vi nswambe va Mweneluginyo? 62Umwene UJesu akata: Ena nene. Nukumbona ndambonaga Uńamunu vwu atamile kukivoko kya Mwenemaka, vwu ikwitsa mmavingo ga kukyańa. 63Pwu unteketsi umbaha akalendulanya imisabwa gya mwene akata: Pwu tuvalondage viki avange avakuntsova? 64Mpulike nuńe vwu ikunduka amadusi Unguluve. Ndeti uńe? Pwu voni vakahiga vakata: Vi va kubudwa. 65Pwu avange vakambehela namati kumiho vakata nukungubiṅanya kumiho. Pwu vangumbage niṅonde vatetsage: Lagaga. Navene navakivaga vakantova namapi.

66Umwene UPetele vwu atamile nduvanza pwu ujyunge umunu va nteketsi umbaha undala akabiha upwu ale 67akavona UPetele ikwota umwoto, pwu akandola akata: Nuve vwavetsaga nu-Jesu va mu-Nasaleti ulya. 68Umwene UPetele akabela akata: Bako nanditsimańili itsu vwitsova nukutsivona nanditsivweni une. Vwu ita ndihume panzi vwu ali nńumba jya pandyango, pwu jikavika inongove, 69Umwene undala vwu ambwene, pwu akavuja akavavula avale baho akata: Umunu uju vwu vanine valya. 70Umwene UPetele akavuja akabela. Vwu valindile padebe, pwu vakavuja avale baho vakatsova nave UPetele vakata: Jilweli vwu vanino valya. Mańa uli va mu-Galilai. 71Pwu umwene akikotola akata nukujiganika akata: Une nandimmańili lusiku umunu uvi mukuntsova. 72Pwu jikavika ulwa vili inongove. Pwu UPetele akakumbuhitsa ilimeńu ilyu UJesu ambulile ilyu atye: vwu jikanale ukuvika kavili inongove vwu vwibelile kadatu kwane vwu utye nandimmańili. Pwu akisagila akalila.

Currently Selected:

Malika 14: Kinga

Highlight

Copy