Matai 20

1Mańa uludeva lwa kukyańa luli ndumwenevutsenge uvi alavaga pavusiku nkugongola avalimi mungunda gwa mwene gwa masilu. 2Vwu vidiṅine vwu atye mwilya ndenali mpamato palitsuva lipamato, pwu akata: Mbihage mungunda gwane gwa masilu. 3Vwu ilitsuva litogile akavuja akabiha akavona avange vimile vuvule paluvanza. 4Navene akavavula akata: Nuńe mbihage mungunda gwane gwa masilu, ndilavahomba isyu muliṅanile nasyo. 5Avene vakabiha. Akavuja akabiha napamuńi ngati palitsuva litembile akagaha vuvule-vule. 6Vwu avujile abye ilya kumihe akatsikuvavona avange vimile vuvule. Akatsova navo akata: Mwimile kiki ilitsuva lyoni kitavomba? 7Avene vakanda vakata: Mańa natugongolili umunu. Umwene akavavula akata: Nuńe mbihage mungunda gwane gwa masilu mulya. 8Vwu vuhwe umwenengunda akatsova nave undoleli va mwene akata: Uvilange avalimi uvahombe isya kuvahomba, utengulage pavambele usikage pavalongwe. 9Vakitsa avambele vakupilila mpamato-mpamato undenali va mwene. 10Vakitsa navene avalongwe vakisagila vakata humbe ikutwongeletsa. Vakavona navene vikwupilila ujyunge undenali va mwene ujyunge undenali va mwene. 11Mańa vwu vupilye pwu vakantanila nave umwenevutsenge 12vakata: Lola avambele valimile akavalilo kapamato kene vuvule utuliṅanitse navene uvwe twituvombile ilitsuva lyoni tusumbilwe nulutsuva lwoni lwa lyene. 13Umwene akambula ujyunge akata: Vi njango uve nandikutekili. Natwidiṅini undenali mpamato? 14Tola akave ubihage. Lola uńe uvambele ndikumpa nduvwu ndikupye jyuve, 15napinoga une ukuvapela umwu ndinogilwe vwu syoni syango? Iliho lyako livinivwa kwiki vwu ndili ndekedeke une? 16Pwu avambele valava valongotsi, navene avalongotsi valava vambele. Mańa avilangilwe vwu vongosu, lola avahalilwe vwu vadebe.

17Vwu vitoga ukubiha mu-Jelulsalemu pwu UJesu akapatuka navo avakitsigo navavili. Vwu ijekye navo munzila pwu akatsova navo akata: 18Lola twitoga twibiha mu-Jelusalemu, mwu Uńamunu valatsikuvapetsaga navateketsi avavaha navamańakalata, vwu valatsihigaga ilya kuta upita aswitsage. 19Valatsikuvapetsaga avapanzi, vwu valatsikuntovaga nisonzo valatsikuntovelelaga pakidamiṅanye, mańa palitsuva lya datu alatsitsukaga.

20Pwu akahegelela kumwene uvańina va vańa-Sebetai navana va mwene akabiluka pasi akata: Ndisumbilwe. 21Umwene akata: Vudovaga kiki? Akata: Nditye avana vango vwu vavili ava vatamage nuve ndudeva lwako, mpamato kukivoko ikyandyo ujyunge kukivoko ikyaṅigi. 22Umwene UJesu akanda akata: Nantsimańili itsu mudova. Ndumańile ukuńwa ikińwelo ikyu ndiva pakuńwa uńe? Avene vakata: Ena tulumańile. 23Umwene akata: Ikińwelo kyane kyu kyiki kyu mwińwa, ukwene ukutama kukyandyo nakukyaṅigi kwańe, kwu nakiva kavombo kane ukumpa umunu. Bako pwu valatama avene avagahye ṅani ju dada. 24Vwu vapulike tsitsitsi avajavo avakitsigo pwu gukavavipila avanamunu vwu vavili ava. 25Umwene UJesu akavilanga akatsova navo akata: Muvamańile navakuludeva va vapanzi ukuta vikuvalesehetsa ulwa vutwa avanu va vene, navavaha va vene muvamańile ukuta vavibite amaka avanu. 26Uńe ndagahaga vuvule-vule. Bako uńe uvi ita ndivetsagembaha kuvajango, vi upita ipelage ukuva va kuvavombela ńi vanine, 27uvi ita ndivetsage ndongotsi kuvajango, vi upita ipelage ukuva nkivaga vińo ńi vanine, 28nduvwu namwene Uńamunu nitsili nkulonda avakumbombela jujwa, bako itsile nkuvavombela avanu jujwa, itsile nkuhomba uvwumi vwa mwene ukuta sive sya kuvavangila va vongosu.

29Vavwene vwu vihuma mu-Jeliko pwu vakankonga avanu ikipuga vuvule. 30Pwu vakavona avabosu vavili vakatama panzila. Avene vwu vapulike ukuta UJesu iluta, pwu vakilanga vakata: Uvetsage nikisa vi nkuludeva vińa-Ndaviti. 31Avene avanu avale nave vwu vakantanila navo vakata: Nunali! Avene avabosu pwu vakongeletsa sitso ukwilanga vakata: Uvetsage nikisa vi nkuludeva ńa-Ndaviti. 32Pwu UJesu akima akavilanga akavavutsa akata. Ndigahe ndeti nuńe? 33Avene vakanda vakata: Tungave twalolaga amiho vi ntwa vitu! 34Pwu kikambona ikisa mwitumbu UJesu akavabasa mmiho, pwu vakalola ṅani-ṅani, pwu vakankonga.

Currently Selected:

Matai 20: Kinga

Highlight

Copy