Luka 23

1Pwu vakasisimuka voni umwuvavelye vakangega kwa Pilate. 2Kwu vakatengula ukumbulila vakata: Umunu uju tuvwene ikilivula ikivumbuko iki kyoni, ikuvabetsa ita ndasangulaga amasango kwa Kesali. Ita nene Kilisiti, nene nkuludeva. 3Umwene UPilate akambutsa akata: Uli nkuludeva va va-Juta? Umwene akanda akata: Nduvwuvwitsova. 4Pwu UPilate akavavula avateketsi avavaha navanu voni akata: Uńe umunu uju nandikujivona ijyinge inongwa. 5Avene vwuvakamwumilitsa sitso vakata: Ikuvahambulanya avanu upwu itsova inongwa tsa mwene mwoni mu-Jutai. Mańa atengwe mu-Galilai asike umu. 6Umwene UPilate vwu apulike vwu vita Galilai pwu akavavutsa: O, humbe va mu-Galilai umunu uju? 7Vwu vambulile ukuta ahumile nkilunga kya Heloti pwu akata: Mbihage nave kwa Heloti. Mańa namwene agonaga mu-Jelusalemu mmatsuva aga. 8Umwene UHeloti vwu ambwene UJesu pwu akahekela sitso. Mańa alondile ukummańa kakatale ulwakuva apulike ńongosu itsu vantsovaga avanu nukuhuvila ahuvilaga ukuta pange ikumelelaga akange aka kudega. 9Akambutsa amameńu mongosu sitso mańa umwene nakamwanda kinu. 10Navene avateketsi avavaha navamańakalata vakava baho vakambulila sitso. 11Mańa UHeloti navasikali va mwene vakamelula vakameka. Pwu vakanswika unsabwa ugwaṅalikaga uvuvalasu, vakambutsa kwa Pilate. 12Pwu nu-Pilate nu-Heloti vakamańana ilitsuva ili. Mańa vale ngoso sikutsoni ukusika palitsuva ili.

13Pwu UPilate akavalundamanya avateketsi avavaha navavaha navanu vuvule. 14Akavavula akata: Lola mungegye umunu uju mukata ikuvapilusa avanu. Lola ndimigile vwu pwunde, mańa nanditsivweni inongwa itsu mukumbulila umunu uju. 15Namwene nu-Heloti ibela mańa ambutsitse. Pwu ndita natulili itsinge itsa kumbudila. 16Pwu ndita ndikuntovaga pwu ndikumbopolaga. 17(Lino pwulwale ulwiho lwa kuvavopolela mpamato umunu sikutsoni palitsuva ilivalatse.) 18Avene pwu vakilanga paninye voni umwu vavelye vakata: Umbuse uju utuvopolele UBalaba. 19Umwene ale nńumba jya vańololo akilivuṅinye mbutsenge abudile numunu. 20Umwene UPilate akavuja akatsova navo ulwakuva atetsaga ndimbopole UJesu. 21Avene pwu vakilanga vakata: Vi untovelelage pakidamiṅanye, Vi untovelelage pakidamiṅanye. 22Umwene akavuja ulwa datu akata: Vi avombile imbivi ńiki uju? Mańa nandijivweni inongwa ijyinge jya kumbudila. 23Pwu avene vakangatatsa ukwilanga sitso, vakamwumilitsa vakata: Untovelelage pakidamiṅanye. Pwu umpwato gwavene gukandema. 24Pwu UPilate akahiga ilyakuta: E twidikage itsuvasumbilwe. 25Pwu akavavopolela uvivandovaga, uvi adindilwe nńumba jya vańololo ulwakuva akilivuṅinye mbutsenge ulwakuva abudile numunu. Umwene UJesu akavapa ukuta abudwagwe nduvwuvatsovaga avene.

26Pwu vwu vikungega UJesu vwu vibiha nave pwu vakamwibata ujyunge umunu USimoni va mu-Kilene, uvi ahumile kukilimila kya mwene. Vi vakantwika ikidamiṅanye vakata ampimbile ankonge nakyo UJesu. 27Vakankonga avanu ikipuga ikyongosu navadala vwu vakankutila vakandilila nulwihotsi. 28Umwene UJesu akavakilivukila akata: Ńi vahinza va mu-Jelusalemu, kwu bako ukundilila ulwihotsi une, mwilililage ńivene, mbalililage navana vińo. 29Lola likwitsa ilitsuva pwu valatetsaga: Vandugataluko avagumba navamihana igyunagiholili navamavele ugwu nagositsi avańa. 30Ilitsuva ili pwu valatengulaga ukutsova kusidugala valatetsaga: Mutugwilage nakuńika mutusilage. 31Mańa vangave vwu vigaha vuvule-vule numbiki umwigu, pwu valagaha ndeti numwumu? 32Vakavagega luninye nave avange avanu vavili avatulanongwa avakubudwa luninye nave.

33Vwu vatsisike upwu vita pwu paliṅalalyantwe, pwu vakavatovelela pasidamiṅanye sya vene namwene navatulanongwa, ujyunge vakambika kukivoko kya mwene ikyandyo, ujyunge kukivoko kya mwene ikyaṅigi, umwene akava pagati. 34Pwu umwene UJesu akata: Vi dada uvasyikilage, mańa navimańili itsu vivomba. Pwu vakalagulila pakugavańa imisabwa gya mwene. 35Avene avanu vakava baha navene vakalola. Navene avavaha vakameka vakata: Avange avapokaga sikutsoni alinakiki ukwipoka mwene lino, humbe vi Kilisiti jilweli, humbe vi Mmalwa va Nguluve. 36Navene navasikali vakamelula vakagega nuvugimbi vwa asiki vakata tunnwese. 37Vakata: Ungave vi nkuludeva va va-Juta jilweli, pwu vwipoke vimwene. 38Lino pwuvwale nuvwene nuvuvige pakyańa uvwakuta: UJU NKULUDEVA VA VA-JUTA. 39Lola avatulanongwa avatovelilwe ujyunge akammelula namwene akata: Ungave veve Kilisiti jilweli pwu vwipoke uve, pwu utupoke nuvwe. 40Akamwanda ujyunge unnine akantanila akata: Nuve nda navukundwada Unguluve nupwu ndiṅanile vuvule ukuvungwa? 41Uvwe tuli viki vwevwe tunogye, mańa tukwupilila isihwanine nimbombo itsu twavombile, uju lweli vi navombili itsinge imbivi. 42Pwu akatsova kwa Jesu akata: Vi Jesu vwitse ukaṅumbuhitsage vwu vukwingila ndudeva lwako. 43Umwene akanda akata: Jilweli-lweli ndikukuvula ndita: Tutsiva twivoni mbutsuka vwa vannonu ilelo iji.

44Pwu jikatengula pakavalilo ka ntanato (vwu lili pantwe), pwu iṅisi jikagwa nkilunga kyoni jikatsisika pakavalilo ka budikakupamato (vwu litembile). 45Nalyene ilitsuva likabosola, nagwene unsabwa ugwadindile kuńumba imbalatse gukalenduka pagati napagati. 46Pwu UJesu akakuta ilimeńu ilivaha akata: Vi dada untima gwango ndivika mmavoko gako! Lola vwu atsovile ili pwu akatsilika. 47Umwene undongotsi va vasikali vwu atsivwene tsoni tsitsitsi pwu akanginya Unguluve akata: Lweli ngolosu umunu uju. 48Navanu voni avalundamine baho pakulola, vwu vatsivwene tsitsitsi, pwu vakitova pakipambaga vakakilivuka ukubiha kuvutsenge. 49Navene navamańani vamwene voni vimile pavutale, navadala avankongaga ukuhuma mu-Galilai voni vakalola.

50Pwu vakakeńemuka itsile ujyunge umunu, uvi ilitavwa lya mwene ale vi Josepu uńivaha umunu unnonu ungolosu. 51Umwene nidike itsu vidinine nitsu vavombile. Ahumile mu-Alimatya mbutsenge uvunge vwa va-Juta. 52Vi akabiha kwa Pilate akatsidova ummana gwa Jesu. 53Pwu akagutumbula pakidamiṅanye akagubinila munsabwa ummbalasu, akatsikuguvika mbuguli uvwu vapunzile ndunalavwe, uvwu navambikili lusiku mumwa ujyunge umunu. 54Tsu vakavomba palitsuva lya kwinotsa vwu liva pakutengula ilya sabati. 55Avene avadala avankongaga ukuhuma mu-Galilai vakankonga UJosepu vakatsilola nuvuguli nummana gwa mwene ukuguvika. 56Pwu vakabiha kuvutsenge vakatsigaha nimituguva nimono inalamu. Mańa pasabati pwu vakagataluka vuvule nduvwu tsilagye indagilo.

Currently Selected:

Luka 23: Kinga

Highlight

Copy