Luka 2

1Pamwaka gugwa pwu UKesali uvi ale vi Augusiti ilitavwa akavalagila ululagilo ulwakuta vavalwagwe avanu ikilunga kyoni kya mwene vavigwagwe pakalata. 2Ukuvalwa ukulongotsi ukwu vakavalwa upwu UKilene ale ndolelakilunga va mu-Silija. 3Pwu vakabiha voni kuvigwa ujyunge kuvutsenge vwa mwene, ujyunge kuvutsenge vwa mwene. 4Pwu namwene UJosepu akahuma nkilunga kya mu-Galilai mbutsenge mu-Nasaleti, akabiha mu-Betelihemu mbutsenge vwa Ndaviti nkilunga kya mu-Jutai ulwakuva ale ńa-Ndaviti pakivumbuko, ale ńavwitsukulu va mwene. 5Akabiha nu-Malija undala va mwene vwu ṅimali umwene, vakavigwa vwu vavili. 6Vwu valibaho pwu likitsa ilitsuva lya kunoga. 7Pwu akahola umwana umbele undume. Akambinila nimisabwa akambika nkititsi ikyu tsilila isenga, ulwakuva navale napo apa kumbika nńumba jijyo umwu valemwo.

8Valemwo navene avadimi nkilunga mumwa. Vwu vagonaga ndudasi vakasilolela isidimo sya vene. 9Vwu vakakeńemuka unsuṅwa va nkuludeva avitsye nuvudwadwa vwa ju ntwa vukuvamulika kwoni-kwoni. Pwu vakadwada nuludwado lwu lwongosu sitso. 10Umwene unsuṅwa akatsova navene akata: Ndadwadaga mańa ndigegile inongwa innonu ija kuhekela sitso avanu voni. 11Mańa aholilwe ilelo iji mbutsenge vwa Ndaviti mulya umpoki vińo, vi Kilisiti untwa. 12Ikyene ikimanilo kya kumańilamwo kwiki: Mutsivona umwana abinililwe mmisabwa agonile nkititsi ikyu tsilila isenga. 13Pwu vakakeńemuka ṅani-ṅani vuvule, isyo nave unsuṅwa isipuga sya kukyańa si syongosu vuvule, syu sikunginya Unguluve sita: 14Uluginyo luve kwa Nguluve, nulunotsehetso luvemwo nkilunga mańa vankelye Umwene avanu.

15Vwu avasuṅwa vitoga kukyańa pwu avadimi vakatsovana vakata: Tsukwi tuvuke mu-Betelihemu tukalole inongwa itsivonike itsu atuvulile unkuludeva. 16Pwu vakavuka ṅani-ṅani ukuluta, vakatsikuvavona, naju Malija naju Josepu naju mwana vwu agonile nkititsi ikyu tsilila isenga. 17Vwu vambwene pwu vakatsova mwoni ilimeńu ilyu vapulike ilya pamwana uju. 18Pwu voni avapulikaga vakadega amameńu ugwu vakavavula avadimi. 19Umwene UMalija vi akagavika goni amameńu aga, akagisagila munumbula jya mwene. 20Pwu vakavuka avadimi, vakamwimika Unguluve, vakanginya patsoni nitsu vatsivwene nitsu vavulilwe.

21Vwu galutile amatsuva nnana, vwu litsile ilya kunkegetela, pwu vakampa ilitavwa ili Jesu, ilyu atsovile unsuṅwa vwu akanale ukuholwa kwa-vańina.

22Vwu gasilile amatsuva ga vene ugwu vale mwiko ugwu asimilitse UMose, pwu vakabiha nave mu-Jelusalemu umwana vakatsikumbonesa kwa Nguluve. 23Nduvwu livigilwe musimilitso tsa nkuludeva ilita: Twoni utwana utulume utudindulanzila kuvavańinavo twu tuvalatse kwa Nguluve. 24Vakagega nisya kutekela nduvwu nalyene litsovilwe musimilitso tsa nkuludeva ilita: Tsivetsage tsu nuta ivili, pange tuvetsage utugundya utwana tuvili. 25Alemwo mu-Jelusalemu mumwa ujyunge umunu ale vi Simyoni ilitavwa. Umunu uju ale ngolosu akandwada Unguluve. Sikutsoni akalupulikila ulutseso ulwu Unguluve atye ndikuntsesaga Isilaeli. Namwene UMepo umbalatse akava pamwene. 26UMepo umbalatse ambulile atye: Nulakuvone ukuswa vwu numbweni UKilisiti va nkuludeva. 27Vi akabiha mwa Tempeli vwu ansisimwe UMepo umbalatse. Pwu avahotsi va Jesu vwu vikwingila numwana vwu vita tukonge nave ndwiho lwa musimilitso, 28pwu umwene akamwupilila mmavoko akanginya Unguluve akata: 29Lino vi Mwenesyoni ndi munu vako vukunavulaga ndunotsehetso nduvwu vwatsovile. 30Ulwakuva amiho gango gambwene uvakuvapoka avanu. 31Uvi ungahile vwu vilola avanu isivumbuko syoni. 32Ulumuli lwa kuvamulika avapanzi. Nulwimiko lwa kukyimikila ikivumbuko kyave kya Isilaeli. 33Nudadaje nuvańina vakadega amameńu ugwu antsovaga umwana. 34Pwu USimyoni akambula UMalija uvańina akata: Lola uju vi alava va kuvagwisa va vongosu mwa Isilaeli umu, vi alavuja alavimika va vongosu, vi alavetsaga kidego kya kukaṅinana. 35Pwu nukwisagila kwa vongosu kulavoneka kuvuvalasu vuvule. Uve lola ulwuvu lulakuhoma mbwumi lulahumiṅanyaga vuvule. 36Alemwo mumwa nuńamalago undala, ilitavwa lya mwene ale vi Hana umwana va Panweli uva nkivumbuko kya Aseli. Vi agosipe sitso ukugosipa. Pangosi pwu agonile imyaka lekelakupamato vuvule vwu ategwilwe pwu akaswa ungosi. 37Umwene unswile uju amalile imyaka imilevulo nnana nagini (84) ukugona. Sikutsoni avetsaga mwa Tempeli akaleka nukuhuma, akava mwiko isinu, akata nukwisaja akambombela Unguluve napamuńi napakilo. 38Namwene uju akahegelela palitsuva lilyo, akamwidikila USimyoni pakunginya Unguluve, akavavula itsa mwana voni ava mu-Jelusalemu avapulikilaga ukuvangwa. 39Vwu vamalile tsoni itsu unkuludeva alagye musimilitso tsa mwene, pwu vakavuja kuvutsenge vwa vene mu-Nasaleti nkilunga kya mu-Galilai. 40Umwene umwana akakula akaduluka lukadiga uluhala lwoni, nalwene uluhungu lwa Nguluve lukava nave.

41Avene avahotsi va mwene vagendaga sikutsoni imyaka gyoni ukubiha mu-Jelusalemu kwilya isya Pasa. 42Umwene vwu amalile imyaka gya mwene kitsigo nagivili vakatoga ukubiha mu-Jelusalemu nduvwu vabihaga sikutsoni kwilya isya Pasa. 43Vwu vamalile amatsuva gage pwu vakata tuvujage kuvutsenge vwitu, umwene UJesu umwana akatama. Lola avahotsi va mwene navakambona ukuta akilivwike. 44Avene vakata humbe alutile navajitu uvwu tukalenavo. Vwu vagendile lipamato pwu vakandonda namuṅolo nambajyavo. 45Vwu navambweni pwu vakakilivuka ukwitsa mu-Jelusalemu mwu vakatsikundonda. 46Vwu valondile amatsuva gadatu pwu vakambona mwa Tempeli, vakavona atamile pagati pavamańisi ikuvapulihitsa ikuvavutsa. 47Voni avampulikaga vakadega vwu ikutsimańa vwu ikutsanda inongwa. 48Vwu vambwene vakasakuka vuvule. Uvańina akata: Kyu kinu kiki vuvule-vule vi nswambango? Lola udadajo nuńe tukulondile nikisa. 49Umwene akanda akata: Mundondelige kiki, nandumańili ukuta mwu ndinogye ukuva mwa dada umu? 50Avene navakalivona ilimeńu ilyu atsovaga. 51Pwu akagenda navo akika ukubiha mu-Nasaleti. Umwene akidika vuvule kuvahotsi. Umwene uvańina vi akagavika goni amameńu aga munumbula jya mwene. 52Umwene UJesu akava nalwo uluhala nankukula akakava nuvugane nakwa Nguluve nakuvanu.

Currently Selected:

Luka 2: Kinga

Highlight

Copy