Luka 12

1Pwu vakalundamana avanu vaelupu kitsigo uvwongosu, vakakadana nukukadana amalunde, pwu umwene akatengula ukutsova kuvakongi va mwene akata: Mbandikage unsabe gwa vapalisai. Nditsova uvunwasi. 2Twoni utwidindile tuladindulivwagwa, twoni nutwa kuvutitu tulamańivwagwa pavuvalasu. 3Mańa tsoni itsu ngave mukutsitsovela mbutitu, tsu avanu valapulikaga pavuvalasu, tsoni itsu ngave avanu muvahehie mumbulukuto nkajumba, tsu valatsitsova vwu vimile pakyańa pańumba. 4Uńe ńi vajyango ndikuvavula ndita: Vwu ndavadwadaga avibuda ummana gwene, pwu ulwambele navibuda kinu. 5Ukwa ndivavule uva kundwada lweli: Mundwadage uvi ivona abudile nummana, pwu namaka ga kuvalahila ndugenge lwa mwoto nagene ali nago. Ena jilweli ndita vi mundwadage. 6Umunu nigula isilutundulu sihano nutuhela tuvili? Nupwu singave sili vuvule-vule uvwebepe, napene Unguluve nikukisamwa ikinge, ikusilola syoni. 7Natsene ninzwili tsa kuntwe tsoni avalile umwene. Kwu bako ukudwada lino, mańa nsilutile isilutundulu sisyongosu uvulutye uńe. 8Lola ndikuvavula ndita: Uvi ikitsova kwane vwu vipulika avanu, ita ndimmańile uńe, vi namwene Uńamunu alitsova kumwene vwu vipulika avasuṅwa va Nguluve alatetsaga ndimmańile umwene. 9Lola uvibela kwane vwu vipulika avanu ita nandimmańili uńe, vi nuńe ndilabela kumwene vwu vipulika avasuṅwa va Nguluve ndilatetsaga nuńe nandimmańili. 10Uvi ikuntsova ilinge ilimeńu ilivivi Uńamunu, vi isyikilivwa, mańa uvi ikunduka amadusi UMepo umbalatse, vi nalasyikila. 11Apene vangave vikuvahilika nńumba tsa vene tsa kwisajila nakuvavaha va vene nakuvamaka, pwu mulisagililaga ṅani ukuta ino tugahage, ino tutsovage liliku? 12Mańa UMepo umbalatse alavavulaga pakavalilo aka itsa kutsova.

13Pwu ujyunge umunu nkipuga umu akatsova nave akata: Vi mańisi umbulage ujyango tugavane vunnonu isya pavuhale. 14Umwene UJesu akata: Vi ujyango, vi munu uve, veni ańimike une, veni atye uvahiganye uvalamulanye? 15Pwu akavavula akata: Mbandikage vwoni uvunogwe vulavatekaga, mańa nupwu siva syongosu, umunu uvwumi vwa mwene navwihuma nkyuma ikyu akavile. 16Pwu akavavula ikihwanihitso akata: Ujyunge umunu umosu ikilimila kya mwene kyale nimote sitso. 17Pwu akisagila mwitumbu akata: Ndigahe ndeti lino? Mańa pajagile apakulundamanihitsa isinu syango isi. 18Akavuja akata: Nditsivwene. Ndimamulage isyanga syango isilala isi, ndipatage isipya isivaha, mwu ndilundamanihitsage isimotike syoni nikyuma kyango kyoni, 19pwu ndilatsovaga kuntima gwango ndilata: Vi ntima gwango lola uli nasyo isya kugona imyaka myongosu vuvule. Uve mye, ulitsage uńwetsage uhekelage vuvule. 20Umwene Unguluve akata: Vi ntsimu uve, mańa uvwumi vwako vitola ikilo iji, pwu siva syani isyu vwagahaga? 21Vwu igahavwo uvi ilundamanya ikyuma vwu kwa Nguluve nakavili kinu. 22Pwu akavavula avakongi va mwene akata: Pwu ndikuvavula ndita: Kwu bako ukwigatatsa ukwisagila nuvwumi vwińo nisya kulya, nummana gwińo, igya kuswala. 23Mańa nuvwumi nisinu vuvaha vu vwumi, nummana nigya kuswala mbaha gu mmańa. 24Mulolage amahove. Mańa agene nupwu gatye nukulima uvuletsi nagilima, gatye nukubena nagibena, gatye nisyanga nagiva nasyo, mańa Unguluve ikugasugila isinu. Uńe nansilutili sitso uvutengo isidege? 25Uńe umwu mbelye veni avumańile ukwijongeletsa akakono kapamato kene uvutale uvwumi vwa mwene, nupwu angave isagye igatitse. 26Apene tsingave tsivalemile natsi ndebe tsitsitsi, pwu mukigatatsa kiki ukwisagila nitsinge? 27Mulolage uvuluva upwu vwimela. Mańa uvwene navukuvilwa navuhona. Lola ndikuvavula ndita: Namwene USelomoni mbudwadwa vwa mwene vwoni naswalili lusiku ndakaluva kapamato aka. 28Ino angave Unguluve aswikile vuvule-vule ilińasi vuvule ilya mwińasi ilyu ndilelo livakwo, ndakilavo lilahwa ndivive lya mwoto, pwu aleke ukulutilila pakuvaswika uńe ńi vanalwidiko ulwebepe? 29Pwu ndita: Kwu bako ukwisagila ukuta tukusivona ndaku isya kulya nisya kuńwa? Inumbula tsińo tsilavetsaga nkyańa. 30Mańa syoni isi syu vikigatatsa avapanzi avankilunga umu. Mańa uńe udadajińo asimańye ṅani syoni isyu upita mbe nasyo ukuta ṅisi ṅisi. 31Bako mwijumilitsage tango lu ludeva lwa Nguluve, lwu luvetsage mbulongolo, pwu ndavona syoni isi ikuvongeletsa pakyańa. 32Kwu bako ukudwada vi kadimo kango akadebe uve, mańa udadajińo isagye ṅani ukuvapa uludeva uńe.

33Mugutsage isyu ngave ndi nasyo, mbapetsage isya vupevwa avakuvapa. Muhonage nimipako igyu nagilalapala. Mukavage ikyuma kukyańa ikyu nakisila lusiku, ikyu nujyunge ummitsi nisika, ikyu namajenje nagilya. 34Mańa ukwu kilikwo nikyuma kińo, kwu tsilikwo natsinumbula tsińo.

35Mwihudikage ingwamba nkivino, nagene amalangamuli gińo gavikage. 36Muvetsage ndavanu avikundolela unkuludeva va vene vwu ikwitsa vwu ahumile kutola undala, uvwu navihava ukundindulila vwu itsile ikoṅona palwitsi. 37Vwu vali va ndugataluko avakivaga uvwu unkuludeva va vene alavona vali miho vwu itsile. Jilweli-lweli ndikuvavula ndita: Pwu umwene alihudikaga ingwamba, alavalondela palugataluko, pwu alavagegela isinu umwene. 38Vwu vali va ndugataluko avakivaga uvwu unkuludeva alavona vali miho nupwu angave itsile pakavalilo aka vili, umwu vivalila avilonda pakilo, nupwu angave itsile pakavalilo ka datu. 39Tsu lweli tsu mukumbuhitsage tsitsitsi: Angave umweneńumba alumańile ukuta ummitsi ikwitsa nkavalilo akatunga pakilo, pwu nda lino iva miho ukunswima vwu ita ndijave ińumba jya mwene. 40Nuńe lino mwiteteṅanyage vunnonu, mańa Unńamunu ndavona itsile pakavalilo ukwu ndata pange akanale. 41Pwu UPetele akambutsa akata: Nkuludeva, ikihwanihitso iki nda vukutuvula uvwe pange vukuvavula avanu voni? 42Umwene unkuludeva akata: Avekwo undolelańumba umugu uńaluhala uvi unkuludeva va mwene ikunginya ita itse avagegelage isinu sya vene avanńumba jya mwene vwu kitsile aka valilo aka kulila. 43Vi ali va ndugataluko unkivaga uvi unkuludeva va mwene alavona ivomba ukwu andagye vwu itsile. 44Jilweli ndikuvavula ndita: Alamwimika ukuta avetsage ndolela syoni isyu ali nasyo. 45Mańa angave unkivaga uju munumbula jya mwene ita, mańa unkuludeva vango akanale, isuvila ukwitsa, lino pwu ime pakuvatova avakivaga avanine navadala va pambombo, atetsage nukusyota isinu, atetsage nukugala uvugimbi, 46pwu akakeńemuka unkivaga uju ilitsuva ilinge unkuludeva va mwene itsile vwu umwene ita akanale, alakeńemuka avonike pakavalilo ukwu umwene nisagili. Pwu umwene alandojola nisonzo, alangavila luninye navańalubedo. 47Unkivaga uvi atsimańile itsu alagye unkuludeva va mwene, lino pwu avuje abele nukwisavulila ṅani, abele nukuvomba itsu andagye umwene, vi alatovwa tsińongosu isonzo. 48Mańa uvi natsimańili itsu alagye unkuludeva va mwene, lino pwu namwene avombe itsa sonzo, vi alatovwa padebe. Uvi upilye syongosu, vi valantsigila sisyongosu. Namwene uvi vangave vatye ulolelage syongosu, vi valalutilila pakuvutsa sisyongosu kumwene.

49Nditsile nkukotsa umwoto nkilunga umu. Pwu ndili natso tsitso tsene itsakuta gungave gwamulike tango. 50Ndili nukwotsivwa, kwu upita ndotsivwagwe. Kwu kundwatsa vuvule mwitumbu ndita ndingave ndasike kuvusililo. 51Uńe pange mwita nditsile nkunotsehetsa ikilunga iki. Bako ndigegile lu lukani. 52Mańa vangave mwuvale nńumba mamato jyene avanu, vwu vitengula lino vihambukanila. Vavili vikuvahambukila avajavo vadatu, vwu vadatu ava vikuvahambukila avajyavo vavili valya. 53Nudadaje ikummambukila unswambe, namwene unswambe ikumambukila udadaje. Nuvańina ikumambukila umwalive, namwene umwalive ikumambukila uvańina, Namwene unkwive ikumambukila unkamwanave, namwene unkamwanave ikumambukila unkwive.

54Pwu akavavula navene avanu ikipuga kyoni akata: Upwu ngave muvwene ilivingo litoga kuvusemo ilitsuva pwu namuhava ukuta isula jiva pakutima ilelo iji. Humbe jilweli. 55Mańa ngave mbwene ilikuluguta lihumile kusika pwu mwita ulutsuva lwiva pakuvala sitso ilelo iji. Humbe jiweli. 56Ńi vanwasi uńe, nikilunga nikya pasi apa nikya kukyańa syu nsimańile. Ndi nakiki lino ukugumańa nagwene numwaka gwa lino ugu? 57Ndi nakiki ukutsimańa uńe ńivene itsa vugolosu? 58Lola ngave mwimile kuludeva ńi vavili nuve nuńanongwa jyako, ugimbage sitso munzila ukudumukana nave. Lola pange uvone ikukugega kumiganongwa jujwa, lino umiganongwa pange uvone ikukuhalila kuvandudeva, umwene uvandudeva uvone ikukudindila nńumba jya vańolola. 59Ukwa ndikuvule nulatsihume umu vwu nuhombili nakatalama ka kunepo aka kumalisa syoni.

Currently Selected:

Luka 12: Kinga

Highlight

Copy