Johani 15

1Uńe ndili mbiki gwa masilu jilweli. Umwene udada vi mbyalamasilu. 2Twoni utupagika twango utwu natuhupa iseke twu ivusa, utwene twoni utuhupa iseke, twu ipalagata ukuta twongeletse vunnonu ukuhupa. 3Uńe ndi vapalagatwa ulwakuva ndi nalyo ilimeńu ilyu ndivavulile. 4Mbetsage mwane sikutsoni, pwu nune ndivetsaga mwańe Nduvwu akene akapagika nakihupa akaseke akange kangave nakiva mumbiki ugwa masilu, vwu ndivwo nuńe, namuhupa akange ngave namwiva mwane. 5Ndili mbiki gwa masilu, ńi tupagika uńe. Uvi iva mwane, nune ndiva mumwene jujwa, vi ihupa iseke tsińongosu, upwu ngave namwiva nune, pwu syoni sikuvalema. 6Angave ujyunge umunu niva mwane, vi itagwa panzi ndakapagika akumu. Lino utupagika utuli vuvule-vule twu vilundamanya vitaga mmwoto twipya vuvule. 7Ngave mwita nuńe mwiva mwane, nagene amameńu gango giva mwane, pwu syoni isyu nnogilwe mudova vuvule, pwu sikuvitsila. 8Vwu munginyage udada ngave muhupa iseke tsińongosu, ngave mwiva vakongi vango. 9Nune ndivaganile nduvwu nune udada anganile. Mbetsage mundugano lwango ndahumaga. 10Ngave indagilo tsane mukutsivika munumbula pwu ndi mundugano lwango, nduvwu nuńe ndatsivikile munumbula indagilo tsa dada nukuva ndugano lwa mwene jujwa. 11Upwu ndivavulile tsitsitsi, pwu ndivavulile ukuta mwitumbu mwane sikutsoni muhekelage lu luhekelo lulwu ndihekela nuńe, pwu ukuta uluhekelo lwińo ulu lwipelage luluti vuvule. 12Ulwene ululagilo lwango ulwu ndikuvalagila lwu ulu ndita: Ngananage ńi vene nduvwu ndivaganile uńe. 13Nakuli umunu ujyunge uva lugano ulululutile ulwa munu uvi ikuvaswila uvwumi vwa mwene avanine. 14Uńe vwu ndi vajango ngave muvomba itsu ndikuvalagila. 15Lino pwu ndilekile ukuvatsova ilya vugulano, mańa ungulano nakamańili umwu kavelye koni ukwu ivomba unkuludeva va mwene. Uńe ndivapye ilya kuva ńi vajyango, mańa tsoni itsu ndipulike kwa dada tsu ndivavule uńe. 16Ndatetsaga uńe ńivene muńalile uńe, bako mańa une ndivahalile uńe, nukuvasuṅa ndivasuṅile ukuta mbihage muhupage iseke, iseke itsa kuvakwo sikutsoni, pwu ukuta udada avapetsage syoni isyu mudovela mwitavwa lyango. 17Tsoni tsitsitsi tsu ndivalagye ulwakuva ndita ngananage ńi vene.

18Ngave mbwene ikilunga kivasulile, pwu ndumańage ukuta kilongwe ukunsula une vwu kikanale ukuvasula uńe, 19Ngave mwale va nkilunga umu, pwu ndili ikilunga kisiganile isya kyene, pwu lino nandi va nkilunga umu, ulwakuva ndivahalile nkilunga, pwu kivasulile ikilunga. 20Nkumbuhitsage ilimeńu ilyu ndivavulage ilyu nditetsage: Unkivaga nandutili uvuvaha unkuludeva va mwene. Vangave vaswimile une vatye tumbude, pwu nuńe valavaswimaga. Vangave ilimeńu ilyango valivikile munumbula, pwu nilino valalivika. 21Lola tsoni tsitsitsi valavavombela ulwakuva ndi nilitavwa lyango, ulwakuva navammańili uvi asuṅile une. 22Ndingave nanditsili ukuvavula, pwu ndili avene navali ninongwa, mańa lino itsa kwinotsehetsa avene inongwa tsa vene natsikuli. 23Uvi ansulile une, vi ansulye ṅani nudada. 24Ndingave nandipelili imbombo itsu ujyunge napelili lusiku, pwu ndili navali ninongwa ijyinge avene, mańa lino pwu vatye nukutuvona, vatye nukutusula twi vavili nudada nuńe. 25Lola mwu litsile ilimeńu ilivigilwe musimilitso tsa vene ilita: Vansulile vuvule ndi ntsilanongwa. 26Lola angave itsile ju Ntangili, uvi ndikuvasuṅilaga vwu ndisike kwa dada, nditsova ju Mepo va jilweli, umuma mwa dada, vi alavavula tsoni itsango alavasimilitsa uńe. 27Nuńe ndasimilitsa uńe ulwakuva muhumile upwu nditengwe, sikutsoni tuli twivoni nuńe.

Currently Selected:

Johani 15: Kinga

Highlight

Copy