Johani 12

1Umwene UJesu vwu avwene vwu gasigye amatsuva ntanato aga Pasa, pwu akabiha mu-Betanija umwu atsengile ULasali uvi aswe, uvi UJesu antsusitse kuvaswe. 2Mwu vakantelekela isyakulya kumihe, UMalita akavapimbila isima avalitsaga. Umwene ULasali vi vakalya nave. 3Umwene UMalija akatola ikibake kya mono itsu natsihangili nakanu akange imala sitso, tsu akambaka mmalunde UJesu akampulusa mmalunde ninzwili tsa mwene, Pwu ulunusi lwa mono lukakwila mwoni nńumba. 4Pwu akatsova ujyunge unkongi va mwene UJuta uva mu-Kalyoti, uvi ulwambele amendamaga akata: 5Valinakiki ukugula imono itsi nindalama vamia vadatu (300), tsu ndili vavagavinye avagatsu? 6Mańa tsu natsovage ulwakuva avasagilaga avagatsu, bako ulwakuva ale mitsi ulwakuva ibite umpako, sikutsoni akahitsa utwu valahaga avanu. 7Umwene UJesu akambula akata: Vi njango undeke mańa avikile ukuta gave palitsuva lya kusilila une. 8Mańa avagatsu vwu ndi navo sikutsoni, lola une nandivamwo mwańe sikutsoni. 9Vakammańa ava-Juta ikipuga ikivaha ukuta mwale. Pwu vakabihamwo. Lola navasumbilwi UJesu mwene, bako ulwakuva vakata tummańe nu-Lasali uvi antsusitse mbaswe. 10Pwu avavaha vakatsovana vakata: Namwene ULasali upita tumbudage. 11Ulwakuva vavwene ava-Juta vongosu vigendela mumwene pakumwidika UJesu.

12Nda kilavo pwu avanu avabye pa Pasa ikipuga vwu vapulike ukuta UJesu ali pakubiha mu-Jelusalemu, 13pwu vakatola amapagika ga mikindu vakahuma mbutsenge vakatsikumwupilila vakakola vakata: Hosyana nsajivwa uvi ikwitsila mwitavwa lya nkuludeva, unkuludeva va vańa-Isilaeli. 14Pwu UJesu akakavona akagodovwe akitoga. Nduvwu livigilwe ilita: 15Uladwadaga vi minza Syoni, lola unkuludeva vako ikwitsa, itogile palyana lya ligodovwe. 16Tsitsitsi avakongi va mwene vakalemwa ukutsivona tango, lola ulwambele UJesu vwuabye mbuvaha pwu vakakumbuhitsa nilyakuta tsu atsovelilwe ṅani tsitsitsi nilyakuta tsu tumbombye tsu itsi tsu itsi. 17Avene avanu ikipuga kyoni avale nave vwu ikumwilanga ULasali mbuguli vwu ikuntsusa mbaswe vwu vakatsitsova mwoni-mwoni. 18Tsu tsitso avanu ikipuga kyoni vakabiha kukumwupilila ulwakuva vapulike ukuta kyu apelile ikipelwa iki. 19Pwu avapalisai vakavulana vakata: Lola avalemile uńe. Lola ikilunga kyoni kikunkonga mumbele.

20Mbene avatogile kukisaja palitsuva ilivalatse valemwo nava-Giliki avange. 21Vwu vakatsitsova nu-Pilipo uva mu-Betisaita uva nkilunga kya mu-Galilai vakantekelesa vakata: Nkuludeva tukatye tummańe UJesu. 22Umwene UPilipo akatsikumbula Andileja, lola pwu vwu vavili nu-Andileja nu-Pilipo vakatsikumbula UJesu, 23Pwu UJesu akavavula akata: Kitsile akavalilo aka kupelwa ukuva mbaha Uńamunu. 24Jilweli-lweli ndikuvavula ndita: Uluseke lwa ngano lungave nalulahwa nkilimila, lungave nalwiswa pwu lwiva lwene, mańa lungave lwiswa pwu luhupa iseke tsińongosu. 25Uvi uvwumi vwa mwene ikuvusagila vi alavwambutsa. Lweli uvi uvwumi vwa mwene nikuvusagila nkilunga umu vi alavwupilila ukuta vusike nakuvwumi vwa sikutsoni. 26Uvi ilonda ukumbombela une vi aṅongage mumbele. Ulwakuva ukwu ndilikwo une kwu upita avekwo namwene uva kumbombela une. Uvi ikumbombela une vi alamwimika nudada. 27Lino umwuja gwango pwu gususuvye. Pwu ndigahe ndeti? Nda nditetsage: Vi dada ungamokaga nkavalilo aka? Bako mańa tsu tsitso ndingye nkavalilo aka. 28Vi dada ulipetsage uvuvaha ilitavwa lyako. Pwu likahuma kukyańa ilimeńu likata: Ndilipye uvuvaha, ndivuja ndikulipetsage uvuvaha. 29Avanu avimile baha ikipuga kyoni avapulikaga ilimeńu ili vwu vakata: Sula, jikuluma. Avange vakata: Nsuṅwa, atsovaga nave. 30Umwene UJesu akavavula akata: Ilimeńu ili upwu lyipelaga ndatetsaga pange lyale lya kupulika une, bako lyale lya kupulika uńe. 31Lino pwu ikilunga iki kihigwa. Lino umwenekilunga iki itagwa panzi. 32Nuńe lungave lusiku ndingave ndimikivwe nkilunga iki pwu ndilavakwegela kwane voni. 33Tsu atsovaga vuvule itsa kutsova ukuta uvuswe ndilaswila uvunongi. 34Pwu avanu ikipuga kyoni vakavutsa vakata: Mundagilo tupulike ukuta UKilisiti ivakwo sikutsoni. Mańa tsu vwitsova tsiki itsita: Uńamunu upita imikivwagwe? Vi veni Uńamunu uju? 35Pwu UJesu akavavula akata: Tango pasigye padebe vuvule pwu ulumuli lwijaga mwańe umu. Lino ngendage ndumuli vwu tango luli mwańe umu, iṅisi jilavambulanyaga. Mańa uviigenda muṅisi, vi nikivona ukwu alotsitse. 36Mulwidikage ulumuli lino vwu tango lulimwańe umu, pwu mukipelaga vańa-lumuli nuńe. Lola vwu avavulile tsitsitsi UJesu pwu akabiha akuva.

37Avene vakabela ukumwidika napene nupwu apelaga nisidego isi vwuvilola. 38Pwu likitsila baho ilimeńu lya Jesaja uńamalago ilyu atetsaga: Nkuludeva veni pwale uvi ikutsivona itsu tukuvavula? Ikyene ikivoko kya ntwa kyu veni akivwene? 39Pwu lwavalemaga nukuvalema ulwidiko, mańa UJesaja pavunge ita: 40Avapelye uvubosu mmiho ukuta valalolaga namiho, ninumbula tsavene atsidulwise ukuta valatsivońaga inongwa munumbula, ukuta valakilivukaga, ndilavaponyaga. 41Tsitsitsi tsu atsovaga UJesaja upwu alolaga uvuvaha vwa mwene uvudwadwa upwu antsovage jujwa. 42Mańa navene avavaha vakamwidika vavongosu. Mańa navakalutsova pavuvalasu ulwidiko lwa vene, ulwakuva vadwadaga avapalisai, ulwakuva vakata vikutuhumya mumpelela. 43Mańa ulwimiko ulwa kwimikivwa kuvanu avene lwale lwu lunnonu kulwimiko lwa kwimikivwa kwa Nguluve. 44Pwu UJesu akilanga akata: Uvi ańidike vwu nańidiki uńe, bako vwu amwidike uvi asuṅile une. 45Uvi ambwene une vwu ambwene uvi asuṅile une. 46Upwu nditsile nkilunga umu, pwu nditsile nene lumuli, voni avańidike ukuta valavetsaga muṅisi. 47Angave ujyunge umunu ipulika amameńu ganga mańa abele ukwidika ndatetsaga vi ndilamiga une, mańa nanditsili nkuhiga ikilunga, bako nditsile nkukipoka ikilunga. 48Uvi ikungilila une, uvi nikugupilila amameńu gango, vi ali nave uva kummiga. 49Mańa itsu ndatsovaga tsu nandyisuṅili ndimwene. Bako ju dada uvi ansuṅile vi andagye jujwa, atye tsu utsovage tsu itsi tsu itsi uvavulage utetsage utetsage. 50Ulwene ululagilo lwa mwene ulwuandagye ndilumanile ukuta luli nuvwumi vwa sikutsoni, Itsene itswu nditsova itsu nditsovela umwu ambulile udada.

Currently Selected:

Johani 12: Kinga

Highlight

Copy