Vapositili 9

1Umwene USauli vwu akanale vwu tango ipeṅa vuvule uluvipo, vwu ikuvasinga ukuta ndivabude avakongi va nkuludeva. Akabiha kunteketsi umbaha. 2Akatsidova avakalata va kugendela ukubiha kumpelela gwa va-Juta gwa mu-Ndamasika akata ndingave ndikuvavona mumwa avange ava nongwa tsitsitsi navagosi navadala, pwu ndikuvakungaga ndikwitsaga navo mu-Jelusalemu umu.

3Vwu igenda vwu avye ihegelela mu-Ndamasika pwu akakeńemuka: Ulumuli uluhuma kukyańa lumulika ṅani-ṅani vuvule. 4Pwu umwene akagwa pasi, akavona ilimeńu litsova nave lita: Vi Sauli, vi Sauli vukunswima kiki? 5Pwu umwene akavutsa akata: Veve veni nkuludeva? Umwene unkuludeva akambula akata: Nene Jesu, ndi vukunswima. 6Imaga ubihage mbutsenge umu mwu vikukuvulaga vitetsaga uvombage tswitsi tswitsi. 7Avene avanine avagendaga nave vwu vimile baho vasamile vuvule. Ulwakuva ukupulika kwu vapulikaga ilimeńu, lola umwene uvi atsovaga vi navambone. 8Pwu USauli akasisimuka upwu agwe. Vwu ita ndilole, pwu akavona nilola. Pwu avanine vakamwibata ikivoko vakambika mu-Ndamasika. 9Pwu akagona amatsuva gadatu kitalola, akabela nukulya nukuńwa.

10Alimwo mu-Ndamasika umu ujyunge unkongi, uvi ale vi Ananija ilitavwa. Vi akambonekela unkuludeva akatsova nave akata: Vi Ananija! Umwene akidika akata: Nene nkuludeva. 11Pwu unkuludeva akambula akata: Ima, ubihage malekano ilyu vita lyu Ligolosu, mwu uvutsage nńumba jya Juta utetsage: Mumbonehetsage USauli uvi vita va mu-Talisi. Lola ali pakwisaja. 12Avwene ambonekye umunu uvi vita vi Ananija ilitavwa, avwene ikwingila umwu ale ikumbika amavoko, pwu avwene ilola. 13Umwene Ananija akanda akata: Nkuludeva vambulile vavongosu itsa munu uju, itswu avavalatse vako avakinye ka kongosu vuvule. 14Numwu avateketsi avavaha vampye amaka ga kuvavunga voni avikulitsova ilitavwa lyako ndwisajo. 15Umwene unkuludeva akanda akata: Bihaga, mańa umunu uju kivombelo kyango ikihalivwa ikya kuvagegela ilitavwa lyango navapanzi navakuludeva navańa-Isilaeli. 16Mańa ndikumbonyaga vwoni uvukuvilwa uvwu ilitavwa lyango lilampelelaga ukuta akuvilwagwe. 17Pwu Ananija akabiha akatsikwingila nńumba umwu ale akambika amavoko akata: Vi Sauli, vi njitu UJesu uvi akuvonekelaga munzila ijyu ugendage vwu vukwitsa kunu asuṅile kwave atye ukambule utetsage: Ulolage, adige nu-Mepo umbalatse uve. 18Pwu tukalagala mmiho baho ukuta makakala, pwu akalola. 19Pwu akima akotsivwa. Akalya nisinu, pwu akavona ummana gwipona.

20Pwu USauli akagona mu-Ndamasika pavakongi, Nahave ukuntsova UJesu nńumba tsa vene tsa kwisajilamwo akata: Vi nswambe va Nguluve uju. 21Voni avapulikaga tsitsitsi vakadega sitso vakata: Uju nda vi uvi avabańilitsaga mu-Jelusalemu avisajilaga mwitavwa ili? Numu nda tsu itsilaga tsitsi atetsaga ndikuvakungaga ndikuvavikaga kuvateketsi avavaha? 22Umwene USauli akongeletsa ukuduluka vunnonu. Avene ava-Juta avatsengile mu-Ndamasika vakasama vwu ikuvalema itsakuta UJesu uju vi vi Kilisiti.

23Vwu galutile amatsuva agange, pwu ava-Juta vakalundamana vakidikaṅana itsa kumbuda USauli. 24Umwene lola akapulika itsu vidikiṅine. Napavumongole vakalinda napamuńi napakilo vakata pwu tukumbudilaga. 25Pwu avakongi vakantola pakilo vakamwisa mwimato vwu vambikile nkiswiswi.

26Vwu asike mu-Jelulsalemu pwu akata ndihange navo avakongi. Mańa avene vakadwada vakata ikututeka upwu ita nune ndili nkongi. 27Lola umwene UBalinaba akantola akangega kuvapositili akavavula itsu ambwene munzila unkuludeva nitsu umwene atsitsovile pavuvalasu inongwa tsa litavwa lya Jesu mu-Ndamasika kitadwada nisinge. 28Pwu USauli akakina navo, akatsungutila pavuvalasu mu-Jelusalemu. Akatsitsova inongwa tsa litavwa lya Jesu unkuludeva kitadwada nisinge. 29Akatsova navo ava-Juta avahuma kuvu-Giliki, akakaniṅana navo ulukani. Avene lola vakisagila ukuta tumbude. 30Avene avakilisiti avanine vwu vapulike tsitsitsi, pwu vakakimbila nave vakatsikumbika mu-Kesalija vakata: Lino ubihage mu-Talisi. 31Pwu umpelela gwoni mwoni namu-jutai namu-Samalija gukanoga vuvule. Gukitsenga gukagendela ndudwado lwa kundwadila unkuludeva, gukakula ulwakuva agutangaga UMepo umbalatse.

32Pwu ilitsuva ilinge UPetele vwu itsungutila vwu ikuvalola voni, pwu akatsisika napavavalatse avatsengile mu-Lita. 33Mwu akatsikumbona umunu uvi vatetsaga vi Eneja ilitavwa. Vi akavona ali pavugono, agonile baho imyaka nnana vwu gudeńike ummana. 34Pwu UPetele akatsova nave akata: Eneja, UJesu Kilisiti akuponitse. Sisimukaga vwitengelage vimwene ikitala. Pwu umwene akasisimukila baho. 35Vakambona voni avatsengile namu-Lita namu-Saloni vakakilivukila kunkuludeva.

36Mu-Jope mwu alemwo unkongi undala uvi ilitavwa lya mwene ale vi Tabita, kukuta vi Mbavala. Vi ale nimbombo innonu tsińongosu itsu avombaga, nisya kuvapa akavapa avanu sisyongosu. 37Vi akavona pamatsuva aga pwu akatamwa akaswa. Pwu vakamwotsa ummana, vakatsikumbika kuńumba jya kukano. 38Pwu avakongi vwu vapulike ukuta UPetele ali mu-Lita, mańa pipi vuvule ukuhuma mu-Lita ukubiha mu-jope, pwu vakasuṅa avanu vavili kwa Petele. Vwu vakatsitekelesa kumwene vakatsita: Ulasuvilaga, tsukwi tubihe kumitu. 39Pwu UPetele akasisimuka ukubiha navwo. Vwu asike pwu vakatoga nave kuńumba jya kukano. Pwu voni avadala avaswile vakankonga upwu ale vakalila ulwihotsi, vakambonya nigyańingilitsa nimisabwa igyu avahonye UMbavala vwu tango ali kuvwumi. 40Pwu UPetele akavahumya panzi voni, akasugama pasi akisaja. Pwu akakilivukila kunsimba akata: vi Tabita sisimuka! Pwu umwene akadindula amiho, vwu ambwene UPetele pwu akatama. 41Pwu UPetele akamwibata ikivoko akansisimula. Pwu akavilanga avavalatse navadala avaswile akata: Vi uju. Pwu vakavona mwumi vuvule. 42Tsu tsikapulikika mwoni mu-jope tsitsitsi. Pwu vakamwidika unkuludeva vavongosu. 43Pwu UPetele akagonapwo mu-Jope umu, akava nńumba jya munu ujyunge uńukanguvu uvi ali vi Simoni ilitavwa.

Currently Selected:

Vapositili 9: Kinga

Highlight

Copy