Vapositili 10

1Alimwo ujyunge umunu mu-Kesalija, ilitavwa lya mwene ale vi Kolineli. Ale vi ndongotsi va kipuga kya vasikali ikyu vatetsaga kya va-Itali. 2Vi ali ngolosu. Vakandwada Unguluve voni, najujwa nava ńumba jya mwene voni, ava-Juta sikutsoni akavapa isya kidovano, akisaja kwa Nguluve sikutsoni. 3Ilitsuva ilinge pakavalilo ka budikakupamato pwu akakeńemuka uluvoneko lukumbonekela pavuvalasu. Akambona unsuṅwa va Nguluve ikwingila umwu ale itsova nave ita: Vi Kolineli! 4Umwene akandungamila lukambona uludwado akata: Kiki nkuludeva? Umwene unsuṅwa akata: Nińisajo tsako nisya kidovano isyu vwavapetsaga avanu sitogile kukyańa, Unguluve akumbuhitse isyene. 5Lino usuṅage avanu mu-jope, vakantole USimoni uvi vita vi Petele ilitavwa ilinge. 6Umwene igona pa Simoni unyukanguvu, uvi ińumba jya mwene jili pańanza. 7Pwu vwu avukile unsuṅwa uvi atsovaga nave, pwu akavilanga avakivaga va mwene vavili nunsikali mpamato uvi andwadaga Unguluve, akahala mbene avalutilye ukumbadama. 8Vwu akavavula tsoni itsavonike, pwu akavasuṅa mu-Jope.

9Pavusiku vwu avanu ava vali munzila vwu vahegelye mbutsenge mu-jope, pwu UPetele akatoga pakyańa pańumba akata pwu ndikisajaga, ilitsuva vwulili pantwe. 10Pwu jikambona inzala akata singave syalipwo isya kulya. Vwu vali pakuntelekela pwu akagangaluka. 11Akavona kukyańa kudindwike, akavona akanu kikwika, kikava ndikilundwa ikivaha vibite panguto tsu ini vikwisa pasi pakilunga. 12Akavona mwu tsile iṅanu tsoni tsa nkilunga nitsa malunde gani nimińandalwe gyoni igigenda pasi nisidege sya kukyańa. 13Pwu akavona ilimeńu likumbula lita: Imaga vi Petele, uhinzage ulitsage. 14Umwene UPetele akabela akata: Bako nkuludeva. Mańa nandilili lusiku isili mwiko nisikali. 15Pwu likavuja ilimeńu likata: Isyu avalitse Unguluve kwu bako ukuta silimwiko uve. 16Tsitsitsi tsikavuja ikavoneka kadatu. Pwu gukatoga kukyańa ṅani-ṅani vuvule unsabwa.

17Vwu alemilwe UPetele ukuluvona uluvoneko ulu vwu ikisagila ita kyu kinu kiki, pwu akavona avanu uvwu avasuṅile UKolineli vavavwene avakuvalungikila ińumba jya Simoni vimile pandyango, 18vikwilanga ilya kuvutsa vita: Ntuvonelage USimoni uvi vita vi Petele ilitavwa ilinge, pange igona umu? 19Umwene UPetele vwu akanale ikisagila uluvoneko lwa mwene pwu UMepo akambula akata: Pwuvale avagosi vadatu avikukulonda. 20Ukwa sisimukaga vwikage ubihage navo ulalwitsaga numwuja, mańa ndivasuṅile une. 21Pwu akika UPetele akabiha kuvanu uvwu avasuṅile UKolineli akavavula akata: Nene uvi mukundonda. Jyu nongwa ṅi ijyumwitsye? 22Avene vakambula vakata: UKolineli ependi umunu ungolosu uvi ikundwada Unguluve, uvi vikuntsova uvunnonu syoni isivumbuko sya va-Juta, vi avwene unsuṅwa angegye undomo gwa Nguluve ugwakuta: Ukantole UPetele itsage nńumba jyako umu, vi ikukuvulaga inongwa. 23Pwu UPetele akingila navo nńumba vakagona.

Pwu pavusiku akasisimuka ukubiha navo. Navene avakilisiti avanine va mu-jope vakagenda nave. 24Nda kilavo vakatsisika mu-Kesalija. Umwene UKolineli amiho gale kunzila. Avalundaminye avanine navamańani. 25Pwu UPetele vwu ikwingila nńumba, pwu UKolineli akatsikumwupilila akangwila mmalunde akamwimika. 26Umwene UPetele akeńemwike akata: Ima mańa nune ndili munu vuvule. 27Pwu vakapembetsanya vunnonu. Pwu akingila umwu vale, akavona valundamine vavongosu. 28Pwu akavavula akata: Nuńe ndumańile ukuta twi va-Juta mwiko ukuhanga navakivumbuko ikinge nukukina navo, mańa une Unguluve ambulile atye: Ulantsovaga nujyunge umunu ukuva mwiko nukuva mbivi. 29Pwu nditsile kitatsova nilinge ilya kubela vwu mukuńilanga. Lino pwu ndikuvavutsa ndita: Jyu nongwa jiliku: ijyu muńilangye? 30Pwu UKolineli akambula akata: Lino pagonile kani pwu nda vuvule-vule pwu ndikisaja ulwisajo lwa pakavalilo ka budikakupamato nńumba jyango umu. Pwu ndikakeńemuka umunu uvi aswalile unsabwa uguṅalika uvuvalasu imile apa, tulolana nave. 31Vi akambula akata: Vi Kolineli ulwisajo lwako apulike Unguluve nisya sidovano isyu vukuvapa sikutsoni avanu akumbuhitse. 32Suṅaga avanu mu-Jope vakamwilange USimoni uvi vita vi Petele ilitavwa ilinge. Igona nńumba jya Simoni unyukanguvu pańanza. 33Pwu ndikasuṅa avanu kwave baho vuvule. Uve uvelye upwu vwitsile. Lino uvwe twivoni tulundamine kumiho kwa Nguluve twita tupulikage tsoni itsu unkuludeva akulagye atye utuvule uvwe.

34Pwu UPetele akadindula undomo akatsova akata: Pwu nditsivwene jilweli lino itsakuta Unguluve nujyunge umunu nikumalila mbunnonu kumiho, 35bako nsivumbuko syoni uvi atye nukundwada jujwa, atye nukuvomba itsa vugolosu, vi ankelye umwene. 36Nuńe mulimańile ilimeńu ilyu avasuṅilaga avańa-Isilaeli upwu akatsova mwoni-mwoni ulunotsehetso ululi mwa Jesu Kilisiti. Umwene vi vi nkuludeva va voni. 37Nuńe mutsimańile inongwa itsikwilile vwoni uvutsenge vwa mu-Jutai, itsatengulaga mu-Galilai vwu UJohani ahumile ukutsitsova itsa kwotsivwa. 38Nditsova inongwa tsa Jesu va mu-Nasaleti itsu Unguluve akambaka nu-Mepo umbalatse namaka, itsu umwene akatsungutila akamala ikilunga kyoni, akavavombela innonu avanu, akavaponya voni uvwu USetano avalemile, ulwakuva Unguluve ale nave. 39Nuvwe tutsivwene tsoni itsu avombaga nkilunga kya va-Juta namu-Jelusalemu. Avene vakambuda upwu vantovelelaga pakibiki. 40Vi uju Unguluve akantsusa palitsuva lya datu, akampa ukuta ivonesage pavuvalasu. 41Lola umwene nivonesage kuvanu voni, bako akivonesa kwavwe twi Unguluve atuhalye ṅani ukuta twitse tuve vakumwidikila inongwa tsa mwene, twi twalitsaga nave isinu, twi twańwetsaga nave amagasi vwu ahumile pakutsuka kuvaswe. 42Akatulagila akata: Nkavavulage avanu ntsovage nsimilitsage ntetsage: Vi uju Unguluve amwimike jujwa ukuta avetsage migi va vumi navaswe. 43Vi uju vikuntsova voni avańamalago vita: Voni vangave vikumwidika vwu vikuvuvonelaga mwitavwa lya mwene uvusyikilo vwa mbivi.

44Pwu vwu akanale UPetele, vwu ali pakutsova amameńu aga, pwu UMepo umbalatse akavatuńukila voni avapulikaga inongwa tsitsitsi. 45Pwu avidike avakegetwa avitsile nu-Petele vakadega vwu vakivwene ikigavilwa kya Mepo umbalatse ukuvadudikila navapanzi. 46Ulwakuva vavonaga navene vitsovela tsindimi imya vikunginya ju Nguluve. 47Pwu UPetele akatsanda akata: Pwu veni ate agakilivule amagasi ugwu kuta ndavotsaga ava avali nduvwe ukumwupilila UMepo umbalatse? 48Pwu akata: Mbotsehetse mwitavwa lya Jesu Kilisiti. Pwu avene vakantekelesa vakata: Ugonage tango amatsuva gangave gavili gangave gadatu.

Currently Selected:

Vapositili 10: Kinga

Highlight

Copy