Vapositili 7

1Pwu unteketsi umbaha akambutsa akata: Ndeti uve, nda vwutsilivwo tsitsitsi? 2Umwene akata: Ńi vajitu uńe ṅani vadada mpulikage itsu ndikuvavula: Unguluve umwenevuvaha vwoni ambonekye Abulahamu udada twivoni vwu tango ali mu-Mesopotamija. Vwu akanale ukutsenga mu-Halani, 3akambula akata: Uhumage nkilunga kyako umu nandukolo lwako umwu ubihage kukilunga ikyu ndikukuvonyaga. 4Pwu Abulahamu akahuma nkilunga kya va-Kalitai akatsitsenga mu-Halani. Lola vwu aswe udadaje, pwu Unguluve akammamya baho akatsikumbika nkilunga umwu ntsengile uńe lino. 5Nampe ikinge ikya kuva vuhale vwa mwene nikinge ikya kuliṅana nulwajo uvutale, vakidinana ulwidiṅano akata: Ndilavapa kilava kińo nuve nimbeju jyako ijikukukonga mumbele. Lyu akatsova vwu umwene akanale ukuhoia numwana. 6Nalyene Unguluve akambulila ṅani akata: Imbeju jyako jilagonelaga nkilunga ikinge vuvule, mwu valatetsaga nukujilesa nukujikinila imyaka vamia vani (400). 7Lola ikyene ikivumbuko iki valakivombelaga (avana vako), kyu ndilakihigaga une. Mańa mumbele pwu valahumaga umu valambombela une apa. Vwu akava vuvule-vule Unguluve. 8Pwu Unguluve vakidinana nave palwidiṅano lwa vukegetwa, Pwu umwene akammola Isikaka, akankegeta palitsuva lya nnana. Umwene Isikaka akammola UJakobu, umwene UJakobu akavahola avatengutsi vitu kitsigo navavili avenesivumbuko. 9Avene avatengutsi vitu avenesivumbuko vwu vambinike UJosepu pwu vakangutsa mu-Egipiti, Mańa umwene Unguluve vi akava nave. 10Akampoka mbukuvilwa vwa mwene vwoni, akampa nuvugane nuluhala kwa Palao unkuludeva va mu-Egipiti, vi akampa uvuńivaha mu-Egipiti nanńumba jya mwene jyoni. 11Pwu jikagwa inzala mwoni nkilunga kya mu-Egipiti namu-Kanani, jikapela uvukuvilwa vwongosu sitso. Avatengutsi vitu vakalemwa nisya kulya. 12Umwene UJakobu akapulika ukuta ingano mwujili mu-Egipiti, pwu akavasuṅa avatengutsi vitu lu lulongotsi. 13Vwu vabye ulwa vili pwu vakammańa UJosepu ununavavo. Pwu nu-Palao akakimańa ikivumbuko kya Josepu ikyu ahumile. 14Pwu UJosepu akasuṅa avanu avakuntola udadaje navana va mwene voni imilevulo lekelakupamato navanu vahano pakyańa (75). 15Pwu UJakobo akikilila ukubiha mu-Egipiti. Mwu vakatsiswila najujwa navatengutsi vitu. 16Imisimba gyavene vakatsivika mu-Sikemu mbuguli uvwu Abulahamu agulile nindalama kuvańa-Hemoli mu-Sikemu. 17Pwu umwaka vwu guhegelye ugwa kwitsila itsu Unguluve atsovye ṅani nu-Abulahamu, pwu vakavala avanu vakava vongosu mu-Egipiti umu, 18vakatsisika upwu ivoneka ujyunge unkuludeva uvi nammańili UJosepu. 19Vi akavagegela uvuvivi avakoṅona vitu ikivumbuko kyoni, akavakinila avatengutsi vitu upwu atetsaga vatagivwagwe mwińasi avańa avańehe va vene ukuta vaswitsage voni. 20Pwu akaholwa UMose pamwaka ugu. Nu-Nguluve akambona ukuva nnonu sitso jilweli. Vi vakankutsa nńumba jya dadaje imyetsi gidatu. 21Mańa vwu vantagile pwu akantola umwalive va Palao akankutsa akata: Nswambango umwene. 22Pwu vakambunga lwoni uluhala lwa va-Egipiti. Itsu atsovaga nitsu avombaga tsoni akavoneka amaka. 23Vwu amalile imyaka imilevulo gini pwu akisagile mwene munumbula jya mwene akata ndibihe ndikavalole avajyango avańa-Isilaeli. 24Pwu akatsivona ujyunge una-Isilaeli itovwa vuvule untsilanongwa. Pwu umwene akantanga akampoka uvi atovwagwa akambuda umw-Egipiti. 25Umwene akata pange mwu vikummańilaga avalukololwe ukuta Unguluve ikuvapokelaga ki kivoko kya mwene. Lola avene navakatsivona. 26Nda kilavo akavuja akatsikuvalola. Pwu akatsivona avene vilwa vene. Pwu umwene akata ndivalamulanyage ndivamańanyage akata: Mańa ndi va nkivumbuko kipamato mutovana kiki ńi vanamunu? 27Pwu umwene uvi atetsaga ndintove unjango vi akankuluga akata: Veni akuvikile uve atye uvetsage mbaha vitu, uvetsage mmiganongwa tsitu? 28Pange vulonda ukumbuda nune nduvwu umbudile umw-Egipiti igolo? 29Pwu UMose ilimeńu ili akakimbila. Akava mmenza mu-Midyani. Mwu akatsiholela avana vavili avalume. 30Vwu gilutile iginge imyaka imilevulo gini pwu akambonekela ndukungo lwa pakidugala Sinai unsuṅwa va Nguluve. Akambonekela ndulimbo lwa mwoto mumbiki. 31Umwene UMose vwu aluvwene uluvoneko ulu pwu akadega. Vwu ihegelela vwu ita ndilumańage mbwipi, pwu akavona ilimeńu lya nkuludeva likumwilanga 32lita: Nene Nguluve va vadadajo, ndili Nguluve va Abulahamu, ndili Nguluve va Isikaka, ndili Nguluve va Jakobu. Pwu akadetema UMose. Akadwada nukutsilolakwo. 33Pwu unkuludeva akambula akata: Sulaga isikato syammalunde gako, mańa upwuvwimile pwu pakilunga ikivalatse. 34Ndilolile ndivavwene ukukuvilwa avanu vango mu-Egipiti, ninguto tsa vene itsu vikuta ndipulike, pwu ndikile lino ukuta ndivapoke. Vwitsage lino ndikukusuṅaga mu-Egipiti. 35Jujwa ju Mose uvi vabelile vatye, veni akuvikile atye uvetsage mbaha vitu, uvetsage mmiganongwa tsitu, vi akansuṅa Unguluve akata: Vuvetsaga mbaha va vene, vuvetsaga mpoki vavene. Akansuṅila luninye nunsuṅwa uvi ambonekelaga mumbiki uva kuntanga nikivoko kya mwene. 36Vi akavahumya vwu apelile isipelwa nisidego namu-Egipiti namuńanza jya kigugu nandukungo umwu vagonaga imyaka imilevulo gini. 37Vi vi Mose uvi avavulaga avańa-Isilaeli atetsaga: Unguluve alamwimyaga uńamalago ndune mbajińo umu. 38Vi uvi atetsaga nukwima pagati nunsuṅwa mmpelela ndukungu mulya, uvi atsovile nave pakidugala Sinai, atetsaga nukwima pagati navatengutsi vitu, vi uvi upililaga ninongwa ińumi itsa kutuvula uvwe. 39Mańa avene avatengutsi vitu vakamwila vakansula. Inumbula tsa vene vakavuja vakatsilotsa mu-Egipiti. 40Vakatsova nu-Aloni vakata: Ukwa utuvumbilage amanguluve aga kutulongolela mbulongolo, mańa UMose uvi atuhumitse nkilunga kya mu-Egipiti, vi natummańili ukwu ajagye. 41Pwu palya vavumbage iṅambako, palya ilinguluve lya vene valigegelage isya kutekela, palya vapelage uvukino uvuvaha uvwa ukuhekela akanu ukwu vapelile namavoko ga vene. 42Pwu Unguluve akagilimbuka. Akavataga akata ndivaleke pange vakivombelage ikipuga kya nondwe tsa kukyańa nduvwu livigilwe mwa kalata va vańamalago ilita: Ńi va nńumba jya Isilaeli uńe, upwu mwale ndukungu mulya imyaka imilevulo gini, pwu nda mwanemye akange aka kutekela kwane? Isyene isinge isya kutekela kwane nda mwangegye? 43Bako ihema jya Moloka nkagenda najyo nalu lutondwe lwa linguluve line Lompani si sihwani isyu mwapunzile isya kusibilukila, syu nkagenda nasyo. Tsu tsitso ndilavahamihitsaga ukuluta namu-Babeli. 44Ijyene ihema jya Nguluve jya kwivonehetsamwo vale najyo avatengutsi vitu ndukungo mulya. Jyu vatsengile vakongile umwu andagye jujwa UMose upwa atetsaga: Jivetsage ndikihwani ikyu ukivwene. 45Ihema iji vajyupilye avatengutsi vitu, pwu vakitsa najyo nkilunga umwu vagendage nu-Joswa, valesage ikilunga kya vapanzi uvwu Unguluve avaswimaga mbulongolo mwa vadadajitu. Tsu tsitsisike nakwa Ndaviti vwu pwali. 46Vi akakava uvugane kumiho kwa Nguluve akasana akata: Unguluve va Jakobu ndikundondelaga apakuva. 47Lola USelomoni vi akantsengela ińumba. 48Mańa unduti vi nigona nńumba ijitsengilwe namavoko. Nduvwu nuńamalago itsova upwu ita: 49Ikya kukyańa kyu kitamilo kyane kya vutwa. Ikya pasi kitamilo kya kuvikapwo amalunde une. Jyu ńumbaṅi ijyu mwita tuntsengelage une une? Vwu iva untwa. Palindapi apakugataluka uńe? 50Syoni sisisi nda nakipelili ikivoko kyango iki? 51Ńi mugagile unsingo, ńi vapanzi ninumbula nimbulukutu mukumwila sikutsoni UMepo umbalatse. Vwu vagahile vuvule-vule avadadajińo vwu ngahile vuvule-vule nuńe. 52Vi namalago aliku uvi navansulili avadadajińo? Mańa vavabudaga voni avantsovelaga ṅani Ungolosu avatetsaga ikwitsa, uvi nuńe lino mumendime mumbudile. 53Ukutsupilila kwu mutsupilye isimilitso itsu vavupilitsanyaga avasuṅwa, mańa ukutsikonga kwu namukutsikonga.

54Vwu vapulike tsitsitsi pwu tsikahoma mwitumbu, vakagadutsa namino. 55Umwene ulwakuva adigile UMepo umbalatse pwu akalungama kukyańa akavuvona uvuvaha vwa Nguluve, akambona nu-Jesu vwu imile kukivoko ikyandyo kya Nguluve, 56akata: Lola ndikuvwene kudindwike kukyańa, namwene Uńamunu ndimbwene imile kukivoko ikyandyo ikya Nguluve. 57Avene pwu vakaswanganya sitso, vakingitsa niṅonze mumbulukutu. Vakambukila voni vakava nda vatsovanye ṅani. 58Pwu vakankulugila vakamumya mbutsenge kwu vakammoma namaganga. Avene avamendamaga vwu isilundwa sya vene vakavika mmalunde mundume uvi vatetsaga vi Sauli ilitavwa. 59Pwu vakamoma namaganga USitesani. Umwene akisaja akata: Vintwa vi Jesu upililaga untima gwango. 60Pwu akasugama pasi akilanga ilimeńu ilivaha akata: Vi nkuludeva ulavahigaga inongwa tsitsitsi. Vwu atsovile ili pwu akagona itulu (ja vuswe). Umwene USauli akata vagolwise upwu vambudile.

Currently Selected:

Vapositili 7: Kinga

Highlight

Copy