Vapositili 6
6
1Pwu mmatsuva aga vwu volwike avakongi, pwu avahuma-kuvu-Giliki vakatanilanila navo avajavo avahuma-mba-Hibuli. Ulwakuva vavwene avadala va vene avaswile vilemwa isinu isyu vavagavanyaga amatsuva goni. 2Pwu avakitsigo navavili vakakyilanga ikipuga kya vakongi umwu kyavelye vakata: Mwiko ukulileka uvwe ilimeńu lya Nguluve ukutsilakulitsova ulwakuva tsidindye itsa kuvagegela isinu avilya. 3Pwu lino ńi vajitu muhalage avanu avajińo lekelakupamato avapulikike uvunnonu, uvwu adigile nu-Mepo umbalatse mwitumbu, uvwu ludigile nuluhala, vwu tuvavike pambombo tsitsitsi. 4Pwu nuvwe tugimbage itsa kwisaja nitsa kutsova ilimeńu. 5Pwu voni umwuvavelye vakidika ilimeńu ili. Pwu vakavahala nu-Sitesani umunu uvi ludigile ulwidiko, uvi adigile UMepo umbalatse nu-Pilipo nu-Pulokoli nu-Nikanoli nu-Timoni nu-Palimena nu-Nikolai umwingitsivwa (mbu-Juta) va mu-Antyokija, 6vwu vakavagega kuvapositili. Pwu avene vakisaja vakavavika amavoko.
7Pwu inongwa tsa Nguluve tsikalandala, navene avakongi vakongeletsa ukuvala mu-Jelusalemu. Navene navateketsi ikipuga vuvule vakidika.
8Umwene USitesani vi akapela isipelwa nisidego isivaha vwu vilola avanu lwakuva vudigile uvupe vwa luhungu namaka. 9Pwu avange ava nkapelela ukwu vatetsaga ka va-Libelitini nava nkapelela ka va mu-Kilene nava nkapelela ka va mu-Alekandilija nava nkapelela ka vahumile mu-Kilikija namu-Asija vakakaniṅana nave Usitesani ulukani. 10Mańa tsikavalema vuvule ulwakuva umwene atsovelaga nanduhala namwa Mepo umbalatse. 11Pwu vakavagongola avita tupulike vwu ikuvaduka amadusi nu-Mose nu-Nguluve. 12Vakavahambulanya avanu voni navańivaha avenekivumbuko navamańakalata vakambukila vakanńaga vakangega kululundamano lwa vańivaha avenekivumbuko. 13Vakavavika avakutsova itsa vumwasi. Vwu vakata: Umunu uju nilindila, sikutsoni itsova itsa kupahelula pavuvalatse nitsa kutsihelula isimilitso. 14Mańa tupulike vwu ita: UJesu uva mu-Nasaleti uvi ińumba imbalatse iji alamamulaga natsene ińiho itsu atuvulile UMose, alatupa itsinge.
15Pwu vwuvandungamye voni avatamile ndulundamano lwa vańivaha avenekivumbuko umu, vakavona kumiho andwike ali nda vasuṅwa va kukyańa.
Currently Selected:
Vapositili 6: Kinga
Highlight
Share
Copy
Want to have your highlights saved across all your devices? Sign up or sign in
New Testament in Kikinga © British and Foreign Bible Society, 1961.
