ZEKARIA 12
12
Yerusalemu yechikiṟo ilyi numa
1Otambahaluo lo idedo lya Mndumii ko Israeli. Ishi nsho Mndumii ahamba, atsanyie Ruwehu na oruka, kaumba mndu kawika mumuyo kiidi kyake. 2Ambuya njechihaluo Yerusalemu iwe kirahu kekupayapaya kiidi kya wandu wa mbaṟi tsose, nakyo kekaa ipfo Yuda mkonu fo kiwi fo Yerusalemu. 3Mkonu fo njechihaluo Yerusalemu mṟi mnene fuwe iho lilemeri na orio mndu mokudika limtane shifaṟe, wandu wa mbaṟi tsose wechikuumbia handu hamu. 4Mkonu fo Mndumii nahamba nechiwika kiṟihisho ko frasi tsose, na icho ambawe nawodo nyi oṟuṟe, na meso hako hechiambuya mba ya Yuda, njechiwaaha meso ha orio frasi ya wandu wa mbaṟi tsose. 5Wandu wanene wa Yuda wechihamba mrimenyi yawo wandu wa Yerusalemu nyi pfinya tsako, Mndumii menyi Matorito nyi Ruwa owo. 6Mkonu fo njechihaluo wanene wa Yuda cha kyohyo kyauto modoni fo ngu, cha kimunyi kya modo fuakya mkunjenyi; nawo wehirumatsa wandu wa orio mbaṟi wawatengetie njora tsose, numa ya isho Yerusalemu ikae handu hayo - oo Yerusalemu. 7Indi Mndumii nyechikiṟa mahema ha Yuda kuwoka kundu kiṟumi kya mba ya Dawidi na kiṟumi kya wandu wa Yerusalemu kilang'anye Yuda. 8Mandi ho Mndumii nechiringa wandu wa Yerusalemu na icho ai mnyonge kiidi kyawo, nechifanana na Dawidi mkonu fo; mba ya Dawidi yechiwa cha Ruwa cha Malaika o Mndumii oshangunyi lowo. 9Nakyo kechiwa mkonu fo njechishiha irumatsa wandu wa mkambo wose wakunda icha ikapana na Israeli.
10 Inyi Mndumii, njechipusuya Mumuyo foko wandu wa mba ya Dawidi na wekaa Yerusalemu wose mumuyo fo osaṟio na iterewa; nawo wechiambuya ulya walemtocha, wo wechihoyo nyi wukiwa na ilia cha ilyi mndu aililia mana oke kimumu nawo wechiicho mawawio kipfa kyake cha mawawio ha mana mmbee ilyi ahoyo nyi wukiwa wuliwe. 11Mkonu fo fochiwa fo kilio king'anyi ipfo Yerusalemu cha kilio kya Hadadrimonyi pichinyi lya Megido. 12Oruka lochiwada kilio, orio kishari kikowo; kishari kya mba ya Dawidi kikowo na waka wawo kikowo; kishari kya mba ya Natanyi kikowo, na waka wawo kikowo; 13Kishari kya mba ya Lewi kikowo na waka wawo kikowo, kishari kya mba ya Simei kikowo na waka wawo kikowo. 14Shishari shingi shose orio kishari kikowo na waka wawo kikowo.
Currently Selected:
ZEKARIA 12: KIM2
Highlight
Share
Copy
Want to have your highlights saved across all your devices? Sign up or sign in
Kimochi Bible © Bible Society of Tanzania, 2016.
