MATAYO 20
20
1Wumangi wo ruwehu nyi wafananyi na mndu menyi kanyi elelawa ikure kanyi ngamenyi nahende kushihya waṟundi weṟundya pesa wa kulya demehu lyake likeri lya msabibu. 2Kyasia wamidikyana kimu na waṟundi walya kya dinari iwe nyi kya woṟunda wo mfiri fumu kawaduma kulya demehu lyake lya msabibu. 3Kawuya kakure-se lingi kushikye kufui na saa ya kaṟaṟu. Kawona wengi wahoṟoki alya tumo walawode kindo wechiwuta. 4Kawewia na wandu walya, “Kewehendenyi nanyo kulya demehu lya msabibu. Na kindo sa kisumuhanyi njechimwinenga.” 5Nawo wakakuhendya. Kawuya kakure-se lingi kanyi kukeri kufui na saa ya kaṟandaṟu na saa kenda kawewuta ado. 6Kushikye kufui na saa ikumi na imu kakure kanyi kawona wengi wahoṟoki-ho. Kawawia, “Nki ili motsinda muhoṟoki iya mlawode ma kindo mochiwuta?” 7Wakambia, “Nyi ili lulawona molupfula kya iṟunda.” Kawawia, “Kewehendenyi nanyo alya demehu lya msabibu.” 8 Kyasia komshika iila menyi dema lya msabibu kalaha ulya mokalya-ho, “Henda lahang'u waṟundi wo nowewainenga kya woṟunda wowo uwoke iwo wafurumyeho ushike iwo wasongoe.” 9Walya wacha kufui na saa ikumi na imu wakacha naho wakaambya orio mndu na dinari. 10Kyasia walya wasongoe wamcha wakahamba kulako nyi wechyambya kya wueṟa. Nawo wakaweambya orio mndu na dinari mndu na dinari yake wose. 11Wekyambya wakanunuwya menyi kanyi ulya. 12Wakahamba, “Ashika-wo iwo wafurumya na saa imu tupu waṟundaho. Na iyo kowuya iwang'ang'anyisha naso. Naso nyi lotsinda lichikarishya mawina ha mfiri puti na mu fo.” 13Nao kahaluo kawia ulya umu-ho, “Mbuya yako manya chi ngakuwia kilai kya sumhanapfo. Chi loweidikyana kimu kya dinari. 14Kekudae iki kyapfo nokuhendye; na ngakukundya iinenga ichu afurumya kyake kifoyanyi na kyapfo. 15Ngesa ishi shako nyi ohamba nyi kilanjisumuhanye iwuta nasho chando ngakunda? Ang'u nyi onjiambuya kinyeeri ili njii njido mwoloru? 16 Nyi wudong'u iwo wafurumya wechiwa wasongoru na iwo wesonguo wawe wafurumi.”
Yesu ahamba lya kaṟaṟu kya opfu loke
(Mar 10:32-34; Luk 18:31-34)
17Kyasia Yesu kechido na kulya Yerusalemu, nalyo kaduo walya ikumi na wawi handu ha kiseekenyi. Wechihenda kawawia, 18“Ambuyenyi lukeri-ng'u ihenda ido na kulya Yerusalemu. Na Manomndu nahende dambikyo wakohanyi wo wanene na walosha wa mawawaso. Nawo wambutye owingo lo opfu. 19Wawehenda mdambikya na wandu wo wa mbaṟi njihenu kundo wechimtaluo na imkapa na ngowa tso tsii ntochye msha, wawembambya na msalabe-hu. Na ili mfiri fo kaṟaṟu naṟuke.”
Kiterewo kya mae o Yakobo na Yohane
(Mar 10:35-45)
20Nalyo mae o wana wa Sebedayo kacha na handu ai arianyi na wana walya wake. Kamolokya nndenyi kamterewa kindo nainengo nyio. 21Nao kammbesa, “Nyi kiki uiterewa?” Mka ulya kambia, “Hamba ke wana wa wako wawi wadamye ichu ungi ora lo kulyo na ichu umu ora lo kumoso ipfo wumanginyi wopfo.” 22Yesu kahaluo kahamba, “Momanya iki muiterewapfo. Nyimochiidima inyo kirahunyi iki njikeri inyoya inyi?” Wakambia, “Na lochiidima.” 23Kawawia, “Kirahunyi kyako na mochinyoya-ho. Kya indi idamya ora loko lo kulyo ma lo kumoso kyalyo chi kyako kyeinenga mndupfo. Nyi lyawa lya walya wai wasuṟumye nyi Wande.” 24Kyasia walya ikumi na wawi wamicho wado wakapfuluko kya wana walya wa mka wa wawi. 25 Yesu kawalaha na hando hamu kawawia, “Muichi ke wamangi wa wandu wa masangenyi nyi wawaitoṟye na iwo wanene wakawaapfinya. 26 Kya indi kunu kiidi kyanu kilawe kido. Shile na orio mndu ose ichu echikunda iwa mnene kunu konu nawe nyi mompfuṟukanya. 27Na ichu echikunda iwa mndu msongoru kunu konu nawe nyi isinga lyanu. 28Na chando Mana o mndu alalecha kunu kepfuṟukanyo, nyi kundu o napfuṟukane-ho naweinengya-ho na moo foke fuwe ndalai yetalaa wafoi.”
Yesu achiṟa wapfu meso wawi
(Mar 10:46-52; Luk 18:35-43)
29Kyasia ili wewuka kulya Yeriko wandu wakamituma numa yake mamwingi sa fung'anyi. 30Nalyo adi a walya wandu wapfu meso wawi wadamye oo mamba na njia. Wekiicho Yesu aida-ho wakakoṟoṟoma ilaha wehamba, “Kelusaṟye-wo wukiwa iyo Mana o Dawidi!” 31Kyasia mamwingi fulya fukawatoloma kundu watsie. Nawo wakaengeṟa iirya ṟu wehamba, “Hoi Mndumii kelusaṟye-wo wukiwa kui Mana o Dawidi!” 32Na Yesu katirima-ho kainduka kahamba, “A nyi kiki mokunda; ke njimbike njida?” 33Wakambia, “Nyi kundu meso hadu hatambaṟuke.” 34Yesu kawalilia makulili kapaya meso hawo. Nalyo wadi wakawuya ambuo. Wakaoshana nao.
Yesu aida na mṟinyi fo Yerusalemu
(Mar 11:1-11; Luk 19:28-40; Yoh 12:12-19)
Currently Selected:
MATAYO 20: KIM2
Highlight
Share
Copy
Want to have your highlights saved across all your devices? Sign up or sign in
Kimochi Bible © Bible Society of Tanzania, 2016.
