MATAYO 12
12
1 Mandi halya Yesu aleida kidi kya mdemi ya ngano ili mfiri fo Sabato. Kyasia walya wa kiloshyo wawodo nyi njaa naho wakawoka itowa mahaa wakalya. 2Kyasia Wafarisayo wamewona wado wakacha imbia, “Ambuya wa kiloshyon kyapfo nyi wawuta kindo kilakiwikye momu kiwuto ili mkonu fo Sabato.” 3 Nao kawawia, “Nyimlasomye kilya Dawidi alewuta lyandi wawodo nyi njaa na walya wavekeri nao? 4 Chando aleida na mba ya Ruwa wakalya mkate iya yeṟihichya oshangunyi lo Ruwa, ilanjiwikye momu ilio ma nyio ma walya wakeri nao chila na wakohanyi wawenyi. 5 Ag'nu nyi mulasomye ipfo mawawasonyi, kya wakohanyi ke nyi vekewichuṟa mfiri fo Sabato nawo ma walawute-ho owingo? 6Kya indi ngambia, ‘Ke iya na hawode ang'anyie hekalu.’ 7 Kya indi kidedo kilya kehamba ke, ‘Kindo njikundi nyi isaṟia, ma chi idasa.’ Nokoe muwekiichi ke nyiki, ma iwa walanyamaṟye kindo muwechiwahutsya owingofo. 8Cha kifa Mana o mndu nyi akeri mnene na o Sabato.”
Mndu ai mhuli owoko
(Mar 3:1-6; Luk 6:6-11)
9Naho kakure alyando awekeri kahenda-henda kashika ipfo sinagogenyi yawo. Naho adi aichu mndu akeri-fo o owoko luumu. 10Nawo wakambesa wakahamba, “Nawo kiwesumuhanyi ikiṟa mndu ili mfiri fo Sabato ngesa?” Nawo nyi kundu wawone mwaanya fo mkumba. 11 Nao kawawia, “Kunu konu nyi o ku awode ichondi lyake limu. Kakoya lioloke ṟungunyi ili mfiri fo Sabato. Nao nade alacha iliwada na ilidosapfo? 12Ashika-ng'u-wo mndu kyake mwidime ihamba nyi aidye ichondi kashika hanga? Kyasia kyamba nyi wudo ki na kiwesumhanyi iwuta sha wuoloṟu ili lya Sabato.” 13Nalyo kawia mndu ulya, “Kehoṟuo owoko lofo!” Nao kaluhoṟuo lukawuya ichia lukawa cha lulya lungi. 14Kyasia Wafarisayo wakahenda nja wakamdedya kyama kundu wambahe.
Mṟundi o Ruwa
15Yesu kekimanya, kakure-pfo kahenda kuleshe. Wandu wakaduana nao mamwingi sa funganyi Nao kawakiṟa wose. 16Nao kawakekedya walahende imduo ṟamba. 17Nyi kundu kushike kii kidede nyi mwikimbi Yesaya kehamba: 18 “A ichu msoṟo oko ndesambuṟa, a mkunde nyi inyi, ichu mrima foko fu mchihie nyio. Njechimbikya Mumuyo oko nakae huye yake nao nahende ongoya wandu wa masangenyi mbonyi tsa wusumuhanyi. 19Echiloya ma ifahyafo. Ma kochikaapfo mndu echiicho ṟu lyake kulya njienyi tsekyama mṟinyipfo. 20Iṟeṟe likonoki echilifunjafo, ma orusu lo taa lui kenga echilurumishafo. Na natane aduo mbonyi tsa wusumuhanyi tsido-ho tsiwinshye. 21Na rina lyake nyi lyo wandu wa masanga wawekusihya nalyo.”
Yesu na Belsebuli
(Mar 3:20-30; Luk 11:14-23)
22Naho kaendyo mndu awodo nyi mṟufu mbicho a mpfu meso kavewa na pipi. Nao kamkiṟa. Ulya ai pipi kaidima ideda na yambuo. 23Wandu walya wawekeri-fo mamwingi wakauma mkahai wakahamba, “Alae ichu chio mana o Dawidi?” 24 Kyasia Wafarisayo wamicho kihambo kido wakahamba, “Ichu nyi aifuna mṟufu mbicho kui pfinya ya Belsebuli ichu ai mnene o mṟufu mbicho.” 25Kyasia Yesu amemanya mahio halya hawo kawawia, “Orio oruka lose ilu lulekanyi wenyi na wenyi nyi lochihaluka mrapu. 26Na kokoya Satan kefuna Satan chi awa nyi alekanyi nao amonyi. 27Na inyi kokoya nyi ngafuna mṟufu mbicho kui Belsebuli, ashika wana-wo wanu nyi kiki wefuna nakyo? A wumangi woke wuidime iwanga? Nahonu kyamba nyi wudo nyi nawo wechiwa nyi wemuwonya owingo. 28Na inyi kokoya nyi Mumuyo o Ruwa njefuna nao mṟufu mbicho, aiwung'u wumangi wo Ruwa womidima imuchea. 29Ang'u ipfo mba ko mapfinya, nyii wuda mndu echida napfo na iduo-pfo nzohoṟa tsake na pfinya, kulawode nyi echiwoka ipfunga mafinya cho? Lyondi echiiduo shindo sha kulya mba koke. 30 Mndu alakeri na inyi nyi asuanyi na inyi, na moda alasanya na inyi nyi erahanja. 31Kyasiang'u nkyondo ngambia, ‘Orio wunyamaṟi wose wo mndu echehoṟyo na orio kirumo kyose, kya indi kirumo kyeruma Mumuyo Mwele kyakyo echihoṟyofo. 32 Na mndu echideda dedo kya isuana na Manomndu nechihoṟyo kyakyo. Kya indi mndu echideda dedo kya isuana na Mumuyo Mwele nechihoṟyo kyalyopfo ma ili akeri kunu wuyana wu, ma kashika wulya wochikaa wuche.’”
Ikidi na ndunda tsalyo
(Luk 6:43-45)
33 “Kokoya mowaya mdi fo ndunda njicha, na ndunda na njicha mochiwona. Anu mkawaya mdi fo ndunda njiporu, kyasia na ndunda tsafo na njiporu. Cha kipfa orio ikidi nyi lyechimanyika kui ndunda-tso tsalyo. 34 Nyo mui malea ha njoka, mumanye ideda kindo kicha, mui wawicho? Kifa ikyo kiichuo mrimenyi na dumbu lyo nakyo lyechihamba. 35Mndu cho ai mcha ipfo kisenyi aṟikye kii kicha nyi echiendepfo kicha, na mndu chu mbicho ipfo kisenyi aṟikye ki kiwicho kawende-fo shindo shiwicho. 36Kya indi inyi ngambia, ‘Ke orio mbonyi njiwicho iyo wandu wechideda nyi wekaa wawuwuyo ili mfiri fo mondu. 37Kipfa ili madedo hapfo nyiho ochiwutaho iwiko wusumhanyi, na madedo hapfo nyiho ochiwuta-ho iwonyo owingo.’”
Ilanga kichano
(Mar 8:11-12; Luk 11:29-32)
38 Walosha wa mawawaso na Wafarisayo, maataho wakahalwo wakahamba, “Maarya, lukundi iwona kiṟingishyo kopfo iyo!” 39 Nao kahalwo kawawia, “Mbaṟi-i ya wandu i mbicho idahye na iṟuhuya nyi ipfula kiṟingishyo. Nayo ma yechinengyo kiṟingishyopfo chila na kiṟingishyo kya mwikimbi Yona. 40 Cha kipfa Yona chando awekeri kulya ndewunyi ya mkunga fulya handu ha mfiri iṟaṟu na shio shiṟaṟu, na Manomndu na wudo echikaa wusunyi wo oruka handu ha mfiri iṟaṟu na shio shiṟaṟu. 41 Nyi wandu wa kulya Niniwe wechikaa wahoṟoke alya kya moondu fofurumya kyanduyonyi handu hamu na mbaṟi i ya wandu waweiwutya owingo kipfa lyandi waledumbuya weongoyo nyi Yona. Na iki kii iya nyikinene kikaida Yona. 42 Nyi mangi mka ulya awukye kulya kya ora lo nuka echikaa nahoṟoke alya kyanduyonyi kya mondu fofurumya, nahoṟoke-pfo handu hamu na mbaṟi i ya wandu naweiwutya na owingo, kipfa lilyaindi alecha awuka kishingonyi kya oruka, nache yadanya wuṟango wo Solomon. Na iya kuiho ang'anyie Solomon.”
Iwuya lya mṟufu mmbicho
(Luk 11:24-26)
43“Kyasia iliindi mṟufu mbicho fochiwuka mndu nyi fochiida handu kuhadutsu, koonyonya fulawone. 44Naho fokehamba, ‘Keleka njikuwuye na mba koko kundu ngawuka! Ili fochicha naho nyi fokoya kulawode menyi indi nyi kundo kui kwahye kui kusungusie. 45Nalyo fukahenda fukaonduo mṟufu mbicho ingi mfungade i mbicho ikafuida fo fumenyi fukacha fuirie, ikasamya-ho ikakaa-ho. Naho mbonyi tsefurumya tsa mndu ulya tsikawa nyi mbicho kota na tsa kuwoka. Na mbaṟi i ya wandu i mbicho ido kyayo na wudo yehenda.’”
Wa kanyi ko Yesu
(Mar 3:31-35; Luk 8:19-21)
46Kyasia kechideda ado na wandu walya wakeri-pfo mamwingi, adi a ulya mae na wanawamae wahoṟoki kulya nja wakundi ideda nao. 47Kyasia mndu umu kambia, “A walya mayo na wanawamayo wahoṟoki nja wakundi ideda na iyo.” 48Nao kahalwo kawia ichu amongoya kahamba, “Nyi ohamba wama nyi wu? Na wanawawama nyi ohamba nyi waki?” 49Kahoṟoya mawoko hake kya alya huye ya wa kiloshyonyi kyake kahamba, “A iwa wanawawama! 50Kipfa mowuta shechihia Wande kulya ruwehu, nyi-ong'u anjikerye manowama na mshiki ang'u wama.”
Mfanano fo mkumbi o mbeu
(Mar 4:1-9; Luk 8:4-8)
Currently Selected:
MATAYO 12: KIM2
Highlight
Share
Copy
Want to have your highlights saved across all your devices? Sign up or sign in
Kimochi Bible © Bible Society of Tanzania, 2016.
