MALAKI 1

1Idedo lya Mndumii-Ruwa ko Waisraeli kui dumbu lya Malaki.

Ikunda lya Ruwa ko Waisraeli

2 Mndumii-Ruwa nahamba, “Nyo njimukundi;” Kyaindi nanyo mukahamba, “Nyi ulukundi kuda?” “Ngesa! Esau chi monomae o Yakobo? Kyaindi ngakunda Yakobo,” Mndumii-Ruwa ahamba; 3Kyaindi Esau ngamsuo na ihaluo fumvu lyake liwe wukiwa, kyoṟa kyake ngainengia mapara ha nuka. 4Ma chandu Edomu ahamba ke, luiwapaṟe-paṟe, lochiwuya luhende isungusia handu kuledeo mrapu; Mndumii Menyi Matoṟito nahamba adi, “Wo nyi wechiwika mba, kyaindi inyi njechiiwunduo.” Wandu wechimulaha, “Isanga liwicho sa Mndumii-Ruwa alisuo mlungana. 5Meso hanu nyo hechiwona, numa muhambe Mndumii nyio ang'anyi aidie wose wa Israeli.”

Mndumii-Ruwa adedia wakohanyi

6“Mana nekeindia ndeye, na isinga likaowuo menyilyo, wulalu kokoya inyi nyi ndeyanu wuindi woko woku? Na kokoya inyi nyi Mndumii onu kui mbihu wuowu woku koko? Mndumii Menyi Matoṟito nakeri imuwesa nyo Wakohanyi mui imina rina lyako.” Nanyo mukahamba, “Nyi wuda luimina rina lyapfo?” 7Mukeri iwuta shelya shifanyi ngafu kitaṟenyi kyako kedasia, nanyo mkahamba, “Lokufanyitsa luda ngafu? Kipfa mohamba kitaṟa kya Mndumii kedasia nyi kindo kemina. 8 Mukawuta mwano fo kindo kipfu meso chi owichopfo, ma kindo kiiriteka ang'u kiluo. Kyasia, kewuta ishi noinengie mchili opfo, ngesa na echichihiṟo nyisho? Ang'u nechikuichika ngesa? Mndumii o Matoṟito awesa.”

9Wulalu ngamuwia, terewenyi osaṟio lo Ruwa, kundu namwuinenge mboṟa; kokoya kindo ki kiwukie mawokonyi hanu; ngesa Mndumii o Matoṟito nechimuidikia? 10“Nanga kokoya kuwewode mndu moshinga mongo; mulache iatsa modo fo wulya kitaṟenyi kyako kedasia! Njimchihie kyanupfo, manya shidaso shawuka mawokonyi hanupfo, Mndumii Menyi Matoṟito ahamba. 11Kipfa wokia madoyenyi ha mnengeṟi mṟasa iolokia lyafo rina lyako ling'anyi masangenyi kose, na orio handu kokoṟo mpfaamo fo rasionyi na shidaso shicha kui rina lyako; kipfa rina lyako ling'anyi shisharinyi shose, Mndumii Menyi Matoṟito ahamba. 12Indi nyo mukeri ilifanyitsa ngafu, kipfa nyi mukeri ihamba, kitaṟa kya Mndumii kii ngafu na ndunda tsake, ntso nyama, tsekemino. 13Kake, mokehamba, ‘Ambuya chando mbonyi ii chando yalulisa wukiwa,’ Nyo mkanjipiṟa, Mndumii Menyi Matoṟito ahamba, ‘Kipfa mokeende kindo kilewoneka kui wukika, ke mwaano yanu, ngesa njishiambie mawokonyi hanu?’ Mndumii awesa. 14Indi naseso mndu molemba msa awode iponyi lyake keana Ruwa na nawewikie kyaasa kyake indi kaendie Ruwa kindo kiireteka, inyi nyi mangi ang'anyi aoweshie kiidi kya wandu wa masanga.”

Currently Selected:

MALAKI 1: KIM2

Highlight

Copy