LUKA 9

1Kyasia kalaha walya ikumi na wawi na handu hamu, kawainenga pfinya na chila yeng'anyia waṟufu wawicho na ichiṟa ndaaṟe. 2Kawaduma wahende yonguo wumangi wo Ruwa na ichiṟa wandu waluo. 3Kawawia, “Ma mlawone mochiduo kindo kya njienyi, manya ndichi manya kikuchu, ma mkate ma mapesa; ma nguwo ya kawi. 4Na orio mba momekuidia-ho, kaenyi-ho itane moweda iwuka-ho. 5 Walya wada walamwambia, mkashika iwuka mṟi-fo, kute-kutenyi kiluli-kyo ipfo madende, kundu kiwawiie kiṟingishio kyawo.” 6Kyasia wakawewuka-ho, wakawa motengeta-tengeta mṟinyi ya wandu wechionguo mbonyi tsa sia, na ichiṟa wandu handu hose.

Herode apfio nyi mdo

(Mat 14:1-12; Mar 6:14-29)

7 Kyasia mangi Herode kawio shindo shilya shilewutika shose, kapfiio nyi mdo; nyi kipfa wandu maata waweihamba, Yohane nyi aleṟutso ko wapfu. 8Na maata wakahamba, nyi umu o wadedi wa Ruwa wa kacha akure. 9Herode kahamba, “Yohane nyi njilemdumbuo mdo; aka ichu ngaicho shindo shake shii shido nyiu?” Kaanga moshiha mweke fowonana nao.

Yesu aihutsa wandu shiku shitanu

(Mat 14:13-21; Mar 6:30-44; Yoh 6:1-14)

10Wasu walya wamewuya, wakamwongoya shilya walewuta shose. Kasheṟuka nawo kawaduo kundu ko kisekenyi, kulya mṟinyi fumlahe nyi Betisaida. 11Na mamwingi fo wandu foikimanya, fukamwitung'ata. Kawaambya; kadeda nawo mbonyi tsa wumangi wo Ruwa, na sa wawelangi ichiṟo, kawewachiṟa. 12Kushikye iila, walya ikumi na wawi wakacha na alyando ai wakambia “Kesama-ng'u-wo mamwingi-fu fo wandu, kundu wahende ipfo mṟinyi ya wambaṟa na madema, wawone handu helaa na shelya, kifa iya handu lui nyi nuka, nyi handu halai na wandu.” 13Nao kawawia “Wainengenyi shelya nyo.” Nawo wakahamba, “Luwode kya ngoseṟa kota mkate itanu na shikunga shiwipfo, shile na luhende ihuṟa shelya wandu-wa walye wose.” 14Kipfa sa wawei-pfo nyi waweshikie kufui na shiku shitanu womi tupu. Nao kawia walya wa kiloshionyi kyake “Damiṟenyi wandu njiotasa makumi hatanu-hata-nu.” 15Wakawika wado, wakawadamiṟa wose. 16Nao kaiṟa mkate iya itanu na makunga halya hawi, kaambuya huye ruwehu kashiidapfumya Ruwa, kashipeṟenguo-peṟenguo kainengia walya wa kiloshionyi kyake, wakahawia wandu walya. 17Wakalya wakaihuda wose, kukatolo mtsuhaṟo fo shipeṟengu shilya waletsihaṟa, ikaichuo shikunjia ikumi na shiwi.

Yesu aṟingishio nyi Petro ke nyio Mesia

(Mat 16:13-19; Mar 8:27-29)

18Kukashika ili limu aweiiterewa Ruwa kyanya, walya wa kiloshionyi kyake waai hamu nao, kawawesa kahamba, “Mamwingi fo wandu nyi wekehamba inyi nyiwu?” 19 Nawo wakahaluo wakahamba, “Nyi wekehamba nyi Yohane mpatisi, na wengi wakahamba nyi Elia na wengi wakahamba nyi umu o wadedi walya wa Ruwa wa kacha akure.” 20 Nao kawawia, “A nyio nyi mokehamba inyi nyiu?” Petro kahaluo kahamba, “Nyi Kristo-chu o Ruwa.”

Yesu ahamba kya iliso wukiwa na ipfa lyake

(Mat 16:20-28; Mar 8:30–9:1)

21Nao katutuma, kawawawasa walawie wado mndu. 22Kawehamba ke, “Nyi kiwaṟi Mana o mndu nahende iliso wukiwa wufoi na ileheka ko waitoṟi na ko wakohanyi wang'anyi na ko walaanyi wa shitapu, itane wambaaha, na ili lya kaṟaṟu naṟuke.” 23 Kawuya iwia wose, “Mndu akundi yawishana na inyi, nakukane amonyi, nakudikie msalaba foke nache injiosha-ng'u. 24 Kipfa ichu akundi iletsa moo foke nyi echifudetsa; na ichu echidetsa moo foke kipfa kyako inyi, nyi echifukiṟa. 25A mndu nyi kiki echiira-ho kya wowina woke kokoya nyi awinya wuyana-wu wose wukawa woke, nao kakudetsia-ho amonyi kawichuṟa mrima foke? 26Kipfa orio mowada sonu tsako inyi ang'u tsa shidedo shako, o ichu na Mana o mndu na echeewada sonu tsake ili echikaa nache na wusuṟi woke, nyiwo wo Nde na wo wamalaika wake waele. 27Nyi kya lohi lohi ngamuwia, iwa wahoṟoki iya maata-ho, wechisonja opfu ma nta walawona wumangi wo Ruwa kuwookapfo.”

Yesu ailachika fana

(Mat 17:1-8; Mar 9:2-8)

28Kyasia kekihamba shidedo-sho, kukaida-ho mkonu cha nyanya, kaduo Petro na Yohane na Yakobo kado fumvunyi nahende iterewa Ruwa. 29Kechiterewa, kyamu kyake kikailacha fana, na nguwo tsake tsikaila weṟu tsikakengemaa. 30Naho kudi aiwa womi wawi waideda nao, nawo nyi Mose na Elia. 31Wakawawonekia wai na kiṟumi wechideda nao kya mainukionyi hake, chando echihenda iinukia kulya Yerusalemu. 32Na Petro na wodoe nyi wawewodo nyi mado. Waambuo, wakawona wusuṟi woke na womi walya wawi wahoṟoki nao. 33Kyasia, lilyandi wawei isamana wahende, Petro kawia Yesu, “Alewo Mwaaria, iya nyi hecha, lukukaye-ho, luwike-ho mahema haṟaṟu, limu lyapfo, na limu lya Mose, na limu lya Elia!” Nao nalamanye kilya aideda. 34Kechideda ado kukacha ipuchi likawawikia maṟishe; nawo wakaowuo lilyandi waleshingio nyi ipuchi. 35 Kukawuka ṟu kulya ipuchinyi likahamba, “Ichu nyio manoko msambuṟe mwadanyienyi!” 36Ṟu lilya lyechihamba lido, Yesu kawono ai amonyii. Nawo mfiri iya wakatsia walaongoye mndu ma nta shilya walewona.

Yesu achiṟa mana awodo mṟufu mbicho

(Mat 17:14-18; Mar 9:14-27)

37Kyasia ili lya ngama, wechisoka kulya fumvu-hu, kakumbuhana mamwingi fufoi. 38Kulya mamwinginyi kuwekeri-pfo mndu, kakoṟoṟoma kahamba “Mlosha Mwaaria! Nyi ngakuterewa nosaṟie mana oko o womi, kipfa nyi ai kimumu kyako! 39Keambuya, mumuyo mbicho nyi fokemososa, nao kawefihiṟa ngeṟu-yo, kawa momrakuo-rakuo katana adosa mahoṟe-hoṟe, fulakunde ida fulamiwira. 40Ngaterewa iwo wa kiloshionyi kyapfo wafuwute, walaidime.” 41Yesu kahaluo kahamba, “Ee, nyo kishari kilawode iidikia kihendie makika! Aka-le-wo, nyi njekaa nanyo njishike indii, a njiwe moduana nanyo njishike indi? Keende mana-cho opfo na iya?” 42Kekicha na alyando ai, mṟufu ulya kawemrakuo-rakuo na imrengetesha-rengetesha. Yesu katilima mṟufu ulya o ngafu, kachiṟa mana ulya, kamnengia ndee. 43Wakaṟihio wose kipfa lya walewona mng'ano fo pfinya fo Ruwa. Nawo wose wechiṟihio wado kya shindo shilya ekewuta, naalyo kawia walya wa kiloshionyi kyake.

Yesu ahamba-se kya opfu loke

(Mat 17:22-23; Mar 9:30-32)

44“Wikyenyi necha madedo-ha ipfo madunyi hanu! Mana o mndu nyiechikaa nahende dambiko mawokonyi ha wandu.” 45Nawo walamanyie kidedo-kyo, kikawatambisa walatambahalukio, wakaowuo imbesa kya kidedo kyo.

Nacho ang'anyi?

(Mat 18:1-5; Mar 9:33-37)

46 Kyasia wakawado nyi mhio-hio ke nyiu echikaa nawe mnene-nene ngesa? 47Na Yesu kamanya mhio-hio iya ipfo ngoonyi tsawo, kawada kimana kitutu, kakihoṟotsa oo mbaṟinyi yake. 48 Kawawia, “Mndu kaambia kimana-ki kui rina lyako, nyi inyi anjiambia; na monjiambia inyi, nyi aambia ichu anjiidumie; kipfa ichu ai mtutu onu kamunyiia, nyio sa ang'anyi.”

Alalehanyi nanyo nyi ai ora lonu

(Mar 9:38-40)

49Yohane kahaluo kahamba, “Mlosha Mwaaria, nyi lulewona mndu aweifuna waṟufu wawicho kui rina lyapfo, naso lukamwima, cha kipfa alekeawishana naso.” 50Yesu kambia, “Ma mlamwime; kipfa sa alalehanyi nanyo nyi awishanyi nanyo.”

Wasamaria waleha iambiliya Yesu

51Lilyandi mfiri yake ileetuka, kushikie mainukionyi hake nao kahaluka wohenda Yerusalemu. 52Kaduma na wasu wakawemsongoya. Wakahenda, wakaida mṟinyi fo Wasamaria ke wamteseheṟie-pfo handu. 53Nawo walakunde imwambia, kipfa lyandi awesumhantsie kyamu wohenda Yerusalemu. 54 Walya wa kiloshionyi kyake wo ko Yohane na Yakobo wekiwona wado wakahamba, “Mndumii, ukundi luhambe modo fuoloke kulya ruwehu fuwarumatse, chando na Elia ewewuta?” 55Nao kainduka, kawadedia kahamba, “A mumuyo-fu mkeri nafo mlafuichi nyi fuda? 56Mana o mndu chi alecha narumatse moo ya wandupfo, shile nyi iikiṟa.” Wakahenda mṟinyi fungi.

Wawaṟi iwa wakiloshyonyi

(Mat 8:19-22)

57Wechikuhendia wado njiehu, mndu kambia, “nyi njechiawishana na iyo orio handu omekuhendaia.” 58Na Yesu kambia, “Mapaara nyi hawode mruma, na shilehe shikawewada sungu, indi Mana o mndu awode handu helaṟa mdo fokefo.” 59Kawia mndu ungi, “Nde, awishana na inyi.” Nao kahamba, “Kemembikia momu fohenda ikuṟikia wande.” 60Yesu Kambia, “Leka, wapfu-wo waṟike wapfu wawo, indi iyo njoo nohende kochionguo wumangi wo Ruwa.” 61 Na ungi-se kahamba, “Mndumii, njechianga moawishana na iyo; indi kya kuwooka kemembikia momu njihende isamana na wandu wa kanyi koko.” 62Na Yesu kambia, “Ma mndu amelesha owoko loke kawada kumbi lyedema na mbe, kawuya yambuya numa, nechikaa nasumhane ipfo wumanginyi wo Ruwapfo.”

Yesu aduma wa kiloshyonyi makumi mfungade

Currently Selected:

LUKA 9: KIM2

Highlight

Copy