LUKA 24

1Mkonu fo kuwooka fo mfungade wakacha na alya opangenyi ngamenyi otuko warie mdi iya ya opfaamo waweṟeheṟie. 2Wakakooya iho lilya liliwute-ho, likapiṟimitsio mbai. 3Waida napfo walawone-pfo mnying'a fo Mndumii Yesu. 4Wechiṟumo-ṟumo wado, wadi a iwa wasoṟo wawi wahoṟoki alya mbarinyi yawo waṟee nguwo tsikengemae. 5Wawodo wado nyi wuowu, wechiinamitsia na mdo yawo wanda, nawo wakawawia, “Ichu ai na moo nyi wuda muimpfula ko wapfu? 6 Akeri ipfo-sepfo, indi ameṟutso. Kekumbuonyi-wo shilya alemuwia lilyandi awekeri kulya Galilaya. 7Kechihamba, nkishikie Mana o mndu nadambiko mawokoonyi ha wandu wanyamaṟi nakapio msalabenyi na mfiri fo kaṟaṟu nawuye iṟuka.” 8Nawo wakakumbuo madedo halya hake. 9Wakawuya wawuka alya opangenyi, wakacha yongoya walya ikumi na umu shindo-shi shose, hamu na walya wengi wose. 10Nawo nyi, Maria Magidala, na Yohane, na Maria mae o Yakobo, nawaka wodoya, nyiwo walewia wasu walya shindoshi. 11Madedo-ho hakawawiia cha kihano tupu walahaidikie. 12Kyaindi Petro kakure kakambia na kulya opangenyi, kaimehya-pfo, kaaambuya kawona shidami shilya sha owiṟo tupu shi-shileṟyeho; kawuya kechiṟihio mrimenyi kya shilya shawutika.

Kyaṟo kya Emao

(Mar 16:12-13)

13Kyasia mfiri fulya tichi wandu wa mbari yawo wawi wakahenda kundu ko mṟinyi, napfo kowuka kulya Yerusalemu nyi kukuleshe cha mchumie fo saa tsiwi; na rina lyafo nyi Emao. 14Nawo wakahenda wechikapa sumu tsa mbonyi tsilya tsiwutikie. 15Wechikapiana wado sumu na iwesana, Yesu kacha kaduana nawo. 16Kyaindi meso hawo hakawooho walammanye. 17Nao kawawia, “A nyi mbonyi tsida mukeri ihaluyana ili mukeri ichumia lanye?” Indi wo wakahoṟokaho wakuinadie. 18Na ulya umu owo, rina lyake nyi Kleopa, kamhaluo kambia, “Ate na iyo kumonyi ukeri kunu Yerusalemu kulaichi mbonyitsi tsiwutikie mafiri-ha?” 19Nawo kawawia, “Antso njiki?” Wakambia, “Nyi tsa Yesu o kulya Nasareti, ulya aweei mdedi o Ruwa awode pfinya yewuta na yededa sumuhana na Ruwa na wandu wose. 20Ichu-ng'u wakohanyi wadu wang'anyi, na waitoṟi wadu, nyi alemdambika kundu nahutyso owingo lombaaha, wakambambya msalabenyi. 21Natso nyi luwekusirie nao ke nyi awechikaa naletse Israeli. Kyasia-ng'u ishi shose shambutika, mfiri fo inu nyi fo kaṟaṟu. 22Na kingi nyi waka wa kodu maata wameluwuta madima, nawonyi washika kulya opangenyi ngamenyi kilawo. 23Walakooye-pfo mnying'a foke. Wakacha wakahamba, nyi wawonekio nyi wamalaika, wakawawia nyi ai na moo. 24Nyi wudo na wodoyadu waangu wahenda kulya opangenyi, wakawekooya wado chando waka walya waluwia, kyaindi o walambone.” 25Nao kawawia, “Nyo mulaichi mbonyi mui mudo na ngoo njilemeri iidikia shilya waikimbi wa Ruwa wahambie. 26Alae Kristo chi kiwemsumhanyie iliso wukiwa kundu naidime ikuidia wusuṟinyi woke?” 27Nao kawoka alya ko Mose na waikimbi wose kawatambahaluya shilya shi-shidede sha mbonyi tsake kadung'atsa mṟeho yose. 28Wekisembelia hafui na mṟi fulya waweihenda, kakuhesha cha ili akundi ihenda. 29Nawo wakamlemba-lemba wakahamba, “Shika-wo kodu, kipfa nyi iila kui, na mfiri fomekelia.” Nao kaida na mba, kakaa nawo. 30Kikashika lilyandi awedamie nawo kilionyi kya shelya, kaira mkate fulya, kaidapfuma, kafupeṟenguo, kawainengia. 31Nawo wakatambaruka meso hawo, wakammanya nyio. Nao kawadekia-dekia walakimbonese. 32Wakawiana wa-wawi, “A chi luweihya shimbadu kunu ngoonyi tsadu lilyandi aweideda naso kulya njiehu kelutambahaluya mṟeho iya?” 33Wakakure oweṟe lulya, wakawuya na Yerusalemu; wakakooya walya ikumi na umu wakuwumbie handu hamu, na walya wodoyawo wakeri nawo. 34Wechihamba, “Mndumii na kya lohi ameṟuka opfunyi, amekuloṟa na Simon!” 35Nawo wakawaongoya mbonyi tsilya tsilewutikia kulya njiehu, na chando alemanyo nyiwo lilyandi alefunja mkate fulya.

Yesu awonekya wakiloshyonyi kyake

(Mat 28:16-20; Mar 16:14-18; Yoh 20:19-23; Mawu 1:6-9)

36Wechideda wado, o amonyi kacha kahoṟoka oo kiidi kyawo kawawia, “Ofoṟo lukae nanyo.” 37Wakawuko m'madima, wakaowuo wakahia kulako nyi kiṟishe wawona. 38Kawawia, “Nyikili moangalala mdo, nkili mahio mawicho hadi hakuwada ngoonyi tsanu? 39Njiambuyenyi mawoko hako na madende hako, mumanye nyio inyi, njiwade-wadenyi, muwone. Kipfa kiṟishe kiwode nyama na mbihu na mafuo chando muwonyi njiwode inyipfo.” 40Kekimaa ihamba ado, kawaloṟa mawoko na madende. 41Nawo wakeri wado walameidikia wawodo nyi mkeu-keu fo sia na iṟihio, kawawia, “Muwode kindo kelya ma kida iya?” Nawo wakamneenga ora lo ikunga lu-ukahaṟe. 42Kaluambia, kalulya wawonyi. 43-44Kawawia, “Iha nyiho madedo hako njilemuwia lilyandi njiwei nanyo ke, shilya shii shiṟehie nyi Mose ipfo wuwawasonyi na ipfo ko waikimbi na ipfo saburinyi na shikae shihoye shose.” 45Nahong'u katambaṟuo wuṟango wulya wowo wakatamuo mṟeho iya mwele. 46Kawawia ke, “Nyi wudo kikiṟehie ke Kristo nyi awechikaa naliso ado wukiwa, na ili lya kaṟaṟu naṟuke wapfunyi. 47Numa wandu wa mbaṟi tsose tsa masanga waongoyo rina lyake wadumbuye, waidime ihoorio manyamaṟo. Nasho shiwoke Yerusalemu. 48Nanyo nyi mochiwa waṟingishi wa mbonyitsi. 49 Keambuyenyi, nyi njiechimdumia kyaasa kya Wande kimuwonekie, nanyo kaenyii-ng' kunu mṟinyi ifu itane mowonyio pfinya iwukie huye.”

Yesu ado Ruwehu

(Mar 16:19-20; Mawu 1:9-11)

50 Kahenda nawo, kawaduo kulya Betanyia, Kawaṟambatsia mawoko, kawawikia ona. 51Kechiwawikia ona, kalekana nawo, kairio huye ruwehu. 52Nawo wakampfiria ndi, wakawuya na Yerusalemu wawodo nyi msiha fung'anyi. 53Wakahenda ika kulya hekalunyi mafiri hose wechiadapfuma Ruwa.

Currently Selected:

LUKA 24: KIM2

Highlight

Copy