LUKA 20
20
1Kukashika, ili mkonu fumu kechilosha wandu kulya hekalunyi, na yonguo mbonyi tsa sia, kukacha wakohanyi, na walaanyi wa shitapu warianyi na wameeku. 2Wakadeda nao, wakambia “Keluwie, Ishi nyi uiwuta kui pfinya ida? A kingise, nyiu akuinengie pfinya-i?” 3Kahaluo kawawia “Na inyi na njimuwesa kidedo kimu, munjihaluo, 4wupatiso wo Yohane nyi ruwehu wuwukie ang'u nyi ko wandu?” 5Wakakusaṟa-saṟa wo wenyi na wenyi ke, lukahamba nyi ruwehu wuwukie, nao nyiechihamba, a nyiki ili mlalemwidikia? 6Na lukahamba, ko wandu, wandu wose nyi wechilukumbia maho, kipfa wakusirie ke Yohane nyi mwikimbi o Ruwa. 7Wakahaluo, “Luichi kundu wuwukiepfo.” 8Na Yesu kawawia, “Ma inyi nechimuwia pfinya-i njeketana nayo ishipfo.”
Mfanano fo dema lya msabibu na waṟundi
(Mat 21:33-46; Mar 12:1-12)
9 Kyasia kawooka iwia wandu ifano-li, “Mndu awedemie mdemi fo msabibu; kafudambikia wefulimia, kahenda orukenyi lungi ikaa-pfo mfiri ifoi. 10Kiheri kya ndunda tsambiṟa, kaduma msoṟo oke nahende ko walya welimia, kundu wamnengie ndunda tsintowe kulya msabibunyi; na walya welimya wakamkapa, wakamwinutsa wulya. 11Kawuya iduma msoṟo ungi; wakawemkapa-se na imwinyala, wakamfuna alarie kindo. 12Kaengeṟa iduma, kaduma-se o kaṟaṟu; nawo wakambika shifaṟe wakamfunyia nja. 13Menyi dema lya msabibu kahamba, ‘Ngawika njida? Nyi njechiduma mana-chu oko mkunde; kofia ichu nyi wechimwowuo!’ 14Walya welimia wambona, wakakusaṟa na ideda kyama wo wen na wenyi wakahamba, ‘Hoona ichu nyio mokyoṟa, nndenyi lumbahe-ng'u, kundu na kyora-kyo kechiwa kyadu!’ 15Wakamkumbalya nja ya mdemi fulya fo sabibu, wakambaaha, ‘Kyasia, menyi dema lilya lya msabibu nyi echiwawutia ada ngesa?’”
16“Nyi echicha nawarumatse, na msabibu iya nadambikie wengi.” Na walya waleicho wakahamba, “Kilahendeke kido!” 17 Nao kawaambuya wowatuma kahamba,
“A idedo-lyo li iṟehie lyehamba,
Iho lilya wandu wewika mba walelisuo,
nyilyong'u lilewa iho ling'anyi lya ndumbenyi;
kimaduma kya idedo-lyo nkiki?”
18“Orio moho huye ya iho-lyo nyiechifunjika-funjika; na ichu mohoyo nyi iho-lyo, nyi lyechimsonohotsa.”
Itaa okamba lo Kaisari
(Mat 22:15-22; Mar 12:13-17)
19Walaanyi wa shitapu na wakohanyi wakakunda imleshia mawoko wambade kiheri kilya kilya, indi wakaowuo wandu, kipfa nyi walemanya ke ifano lilya nyi lyahambo kipfa kyawo. 20Wakambikya ndeheka, wakamdumia wemsoṟa wokulembetseṟa ke nyi wai wecha wasumhanyi na wucha, kundu wawone mti fo madedo hake wahende imdambika wuchilinyi na pfinyenyi ya mchili mwitoṟi o oruka. 21Wakambesa kindo kemsoruo, wakahamba, “Mlosha, nyi luichi nyi okededa kisumhanyi na ilosha kisumhanyi, ma ulekeambuya shamu sha wandu; na njia tsa Ruwa kolosha chando tsii lohi. 22So na kilusumhanyie iwikia kaisari kodi ang' ote?” 23Nao kamanya mkoṟo yawo, kawawia, 24“Kenjiloṟenyi shilingi. Nyi iwode ofano lou na mṟeho nyi fou?” Wakahamba, “Nyi sha kaisari.” 25Nao kawawia, “Keinengyenyi kaisari ishi sha kaisari; na Ruwa mbemnenga isho shi sha Ruwa.” 26Manya walaidime imdeha na madedo hake alya oshangunyi lo wandu, wakaṟihio mhaluye foke, wakatsia.
Iṟutso lya Wapfu
(Mat 22:23-33; Mar 12:18-27)
27 Kuwekeri-pfo na Wasadukayo wawekekaṟuo ke kuipfo iṟuka lya wapfupfo, wakacha na koke wakambesa. 28 Wakahamba, “Mlosha, Mose nyi aleluṟehia ke; kokoya mndu, manomae apfa kada mka alawode mana, manomae naoṟe mkachu, kundu nawonyie manomae luwa. 29Kyasia kuweepfo wasoṟo mfungade wa mndu umu; ulya mmbee kaduo mka, kapfa kada mka ulya alawode mana. 30Mka ulya kadao nyi ulya momwituma. 31Na ulya o kaṟaṟu naawo, kikahendeka kido, itane wapfa wose mfungade walade ma mana, 32Mainukionyi na mka ulya kawepfa. 33Kyasia, maṟutsionyi ha wapfu, mka -chu nyi echiwa o uhya-ho? Kipfa wose mfungade nyi waweei wamii wa mkachu.” 34Yesu kawawia, “Nyi wana wa wuyana wu nyiwo sa wekealika na yaliko. 35Kyaindi walya wechinengo ishika wuyana wulya na iṟutso ko wapfu, wo wechialika ma yalikopfo. 36Kipfa ma ipfa wechikipfapfo; kipfa wo nyi wechifanana na malaika, wawewa na wana wa Ruwa, kipfa wai wa kiṟukionyi. 37 Kyaindi kui kipfa kya wapfu, ke nyi wechiṟutso, ma Mose na alewelongio ipfo isikinyi kiheri Mndumii alemlaha. Kamhamba, Ruwa o Abrahamu na Ruwa o Isaki na Ruwa o Yakobo. 38Ruwa chi o mnying'apfo, indi nyi o wai na moo. Kyamba iwo wai ma moo wose nyi wai-ho kipfa kyake.” 39Wengi wa walanyi wa shitapu wakahaluo wakahamba, “Mlosha, iyo nyi odambuo necha.” 40Nawo walelekaria-se imbesa kindo.
Mbonyi tsa Mesia
(Mat 22:41-46; Mar 12:35-37)
41Kyasia kawawia, “A nyi wuda ili wandu wekehamba ke Kristo nyi mana o Dawidi? 42 Nao Dawidi nyi ahambie amonyi ipfo kitapunyi kya shimbo kehamba,
‘Mndumii nyi alewia mndumii oko,
Kedamia kuwokonyi koko ko kulyo.’
43‘Njitane ngaleṟia wakituwa wapfo,
wanda madendenyi hapfo.’
44“Alae, komkooya Dawidi nyi amlahiye nyi Mndumii,
nyi wuda echiwa-se manoke?”
Yesu awawasa walosha na uwawaso
(Mat 23:1-36; Mar 12:38-40)
45Kawia walya wa kiloshionyi kyake wandu walya wawei imwadanya waichio wose. 46“Kuṟisenyi kya walaanyi wa shitapu, iwo wakundi ichumia waṟee nguwo tsa mkuruo tsekulembetseṟa, wokulefuo, wawekundi iṟikiṟo nyi wandu ipfo tumo; na ipfo sinagogenyi nyi wakundi-pfo shidembo sha kusonguo; na wakalaho shelyenyi wakasambuṟa alya ko wasuṟi. 47Nyi wekelya mba tsa waka wakusu wakatsimaa, na kwi wulembetseṟi wakakurihiria ihamba ke nyi lokemterewia. Iwo! Iwo, nyi wechikaa wawonyio owingo ngoseṟa.”
Kyaano kya mka mkusu
(Mar 12:41-44)
Currently Selected:
LUKA 20: KIM2
Highlight
Share
Copy
Want to have your highlights saved across all your devices? Sign up or sign in
Kimochi Bible © Bible Society of Tanzania, 2016.
