YOHANE 5
5
1Ili numa kuweshikye mkonu mnene fo Wayuda Yesu kahenda ido na kulya Yerusalemu. 2Nahong'u kulya Yerusalemu oo kufui na kichumi kilya kya machondi kukeri-pfo nduwa ilaho rina lyayo. Kiebrinia nyi Betesida. Nayo ii na shidangasha sha mholo-holo shitanu. 3Napfo kudamye-pfo mamingi fo wandu waluo wapfu meso na wahuli madende ho, na watangaṟimi. [Nawo wechiwedia mṟinga fulya fochikupayapaya, 4cha kipfa ili malaika echisokya kulya nduwenyi ku kiheri kapayapaya mṟinga fulya. Na ulya amewooka isokya ipfo mṟingenyi ili fomekupayapaya kawekuchia ndaṟe yo yake.] 5Kyasia hando ho kwipfo mndu aluo amaye maka makumi haṟaṟu na nyanya. 6Yesu kawona mndu ulya alee-pfo. Kamanya ke amaye-pfo maheri hafoi. Kambia, “Okunda ichia woe?” 7Mndu ulya aluo kamhalwo, “Mndumii njiwode ma mndu nanjisotsie ipfo nduwenyi ili mṟinga fochikupayapayapfo. Indi ili njii-pfo njihendahenda ungi kawenjiida kasonguo ikusokya-ho.” 8Yesu kambia, “Kyekureng'u nokudike kitaṟa kyapfo nokuchumie-ng'u.” 9Nalyo liyenyi mndu ulya kachia kakudika kitaṟa kilya kyake kachumia. Na mfiri fulya fuwei fo Sabato. 10 Nahong'u Wayuda wakacha iwia mndu ulya alechiṟo “Inu nyi Sabato kikusumhanyi iduo kitaṟa kyapfopfo.”
11Nao kawawia, “Mndu ulya anchiṟa anjiwia, kudike kitaṟa kyapfo nokuchumie.” 12Wakambesa, “A mndu ulya akuwia kundike kitaṟa kyapfo nochumia nyiu?” 13Na ulya alechiṟo nalakimanye mbeo-u kyamba Yesu awemedekya ipfo kidi kya mamingi fung'anyi fo wandu fukeri hando halya.
14Kyasia ili numa Yesu kamkoya ipfo hekalunyi kambia, “Ambuya omekuchia-ng'u, ma kulakae unyamaṟe-se ukae nowone kindo kiwichowicho kyechikutowokia.” 15Mndu ulya kakure-pfo kahenda iwuuya Wayuda walya ke mbeo Yesu eemkiṟa.
16Nakyo kikaenenga Wayuda wakawa weṟinjawya Yesu wakapfula meeke fombaha cha kipfa lya alewuta ado mkonu fo Sabato. 17Nao kawahalwo, “Ndeyako nyi aiṟunda kiheri kyose na inyi daa njiṟunda.” 18Nakyo kikaengeṟa iitika Wayuda wapfule mwaanya fombaha chi kipfa atahachye Sabato tupupfo kya indi nyi ili ahamba ke Ruwa nyi ndee amonyi kechikung'ang'anyisha adi na Ruwa.
Pfinya ya Mana o Ruwa
19Nahong'u Yesu kahalwo kawawia, “Nyi lohi kya lohi ngamuwia, Mana echiidima itana kindo kui chila yake amonyi kulawode nyi ikyo awona Nde aitana-pfo. Kyamba kindo ndee atana na Mana nakyo kawekitana ado da. 20Kyamba o Wande nyi akundi Mana, kamloṟa orio kindo aitana amonyi shose. Nao echimloṟa na shetana shing'anyi kota isho mukuwutye-ho iṟihio. 21Kyamba chando Wande aṟutsa walya wapfu kawainenga moo, nao Mana na wudo-ng'u iwo akunda kawainenga moo. 22Kyamba Wande alaanduya mndu o wandu ma umu kya indi Mana nyio amdambikye yanduya li lyose. 23Kundu wandu waindye Mana chando wekeindya Nde. Ichu ada alaindya Mana nyi ada iindya na Nde alemduma.” 24“Nyi lohi kya lohi ngamuwia, Ichu moanguya dedo lyako madu na iidikya ichu alenjiduma nawode moo fo mlungana. Nao echianduyo manyalepfo, kya indi nyi amsama auka opfunyi kasamya moonyi. 25Nyi lohi kya lohi ngamuwia, Kukaa kuche kiheri na wulalu na kikeri-pfo da lyondo wapfu wechiicho ṟu lya Mana o Ruwa na iwo weliicho wechiwona moo. 26Kyamba chando Wande awode moo fuwukye ipfo kiidi kyake kwenyi nyi wudo da aleinenga Mana ikaa na moo fuwukye ipfo kiidi kyake kwenyi. 27Kawemnenga na wuchili wo idumbwo mondu kipfa akeri Mana chu o Mndu. 28Ma mulaṟihyo kya ikyo, kipfa kukaa kuhoye kiheri ili iwo wose walee ipfo shipfunyi wechiicho ṟu lyake. 29 Nawo nyi wechiṟuka. Iwo wawutye hai mecha waṟuke kyewada moo, na iwo wawutye hai mawicho waṟuke kya yanduyo mondu fulya.”
Waṟingishi wa Yesu
30“Inyi ngaidima iwuta kindo kii kya chila yakopfo. Njekeanduo mondu mdumbuye fuidikyanyi na kilya ngaicho njewio nyi Wande, na mdumbuye foko nyi fusumuhanyi. Kindo njiiwalya chi kilya njikundi inyipfo; kya indi nyi kilya ichu alenjiduma akundi. 31Kokoya ngakuṟingishya njimonyi kiṟingishyo kyako kyeidikyo ke kii kya lohipfo. 32Indi nyi kuipfo ungi monjiṟingisha. Na inyi njiichi ke kiṟingishyo anjiṟingishya nyi kya lohi. 33 Nyo nyi muleduma watichi wanu ko Yohane nao kaṟingishiaho kiilohi kilya. 34Na inyi ma njekewada kiṟingishyo ki-kiwike nyi wandupfo kya indi nyi ngahamba ikyo kundu muhende ikiṟo. 35Yohane nyio awei cha taa yewaa yechilimika, nanyo nyi mlelanga ikukesya na saa yo ya oweṟe lulya. 36Indi inyi njiwode kiṟingishyo kyako king'anyi kota kilya kya Yohane. Kyamba maṟunda njiṟunda halya wande alenjienenga njihaṟunde, naho nyiho haiṟingishia ke nyi Wande alenjiduma. 37 Nao Wande monjiduma kawenjiwikya kiṟingishyo o amonyi. Nanyo mlemeicho ṟu lyake ma mantapfo, ma fana yake mlemeiwone-pfo. 38Ma idedo li lyake mukuwodye nalyo likae ipfo mrimenyi-pfo kipfa ichu alemduma mulalemwidikya. 39Nyo mokeweṟuwetsa Maṟehyo Maele muichi kulako mochiwonapfo moo fo mlungana, ate maṟeho ho nyi inyi. Naho hainjiṟingishya. 40Nanyo ma mulakunde ikuchea na koko kundu muwade moo fulya.”
41“Kitewe kyako chi iwona kiṟumi ko wandupfo. 42Kya indi nyo njimwichi ke ikunda lya Ruwa muliwode ipfo mrimenyi yanupfo. 43Inyi njicheye kui rina lya Ndeyako, nanyo ma mulanjiambye. Kokoya ungi echicha kui rina lyake amonyi nyi mochimwambya. 44Nyi wuda moidima iidikya nyo ili mokeringa kiṟumi mukeri muiwikyana muwenyi na wenyi, na kiṟumi kilya kicheye ko Ruwa amonyi mulaikiwalya? 45Ma mulawone mohamba ke nyio inyi nyechimkumba ipfo ko Wande. Mose chu mumkusihye nyio echimkumba. 46Kyamba kokoya muweidikye Mose na inyi muwenjiidikya, kyamba Mose o aṟehye kya injihamba inyi. 47Indi kokoya mulaidikie shilya aleṟehya, nyi wuda mochiidikya madedo inyi njideda?”
Yesu ainenga wandu shiku shitanu kyela
(Mat 14:13-21; Mar 6:30-44; Luk 9:10-17)
Currently Selected:
YOHANE 5: KIM2
Highlight
Share
Copy
Want to have your highlights saved across all your devices? Sign up or sign in
Kimochi Bible © Bible Society of Tanzania, 2016.
