YOHANE 10
10
Mfanano fo mlisi o machondi
1"Nyi lohi kya lohi ngamuwia, “Mndu kada alaida na mfiṟihenyi fo machondi aida oo mongo, kang'alawuo hando hengi o nyi mwiwi na msoki. 2Indi ichu aiida napfo aida oo mongonyi nyio ai mlisi o machondi. 3Nao mringi o mfiṟiha kawempengeluya kichi. Na machondi halya hakaicho ṟu lyake. Na machondi halya hai hake amonyi kahalaha marina haho kahaduo nja. 4Kamaa iduo halya hai hake nja hose nekehasongoya. Na machondi halya hakamwiwata kyamba haichi ṟu lyake. 5Indi mndu mhenu hekemlatyapfo, kya indi nyi hekemdicha cha kipfa halaichi ṟu lya wahenu.” 6Nyifong'u mfanano Yesu alewawia. Nawo walamanye ikyo arie iwawia nkyo iki.
Yesu nyi mlisi mcha
7Nahong'u Yesu kawawiase, “Nyi lohi kya lohi ngamuwia, inyi nyi mongo fohenda kundo machondi hai. 8Walya walenjisongoya nyi wawekeri waiwi na wasoki wose kya indi machondi halawaadanye. 9Ngiṟi iya nyio inyi. Mndu aida napfo aidia koko nyechikiṟo na yanga napfo na iwuka napfo nawekoya na ura. 10Mndu ai mwiwi nelekecha shila nyi kundu naiwe na ishinja na idetsa. Inyi njilecha napfo kundu mukoye iwada moo na mweena fofo fose.
11“Mlisi mcha nyio inyi. Ichu ai mlisi mcha nyi nekerekya machondi hake moo. 12Mndu chu ai mekelei ma alakeri mlisi, machondi ho halambaṟi hake, kyake kawona rumu lyechicha nao katihia-ho machondi ho kadicha. Na rumu likacha iharakwo na iharahanyitsa. 13Cha kipfa ili o ai mekelei ma echisaṟa machondi hopfo. 14 Mlisi mcha nyio inyi. Na inyi njiichi iho hai hako, naho hakawekunjimanya. 15Chando nao Wande anjiichi inyi na inyi njiweichi Wande, Na inyi ngarekya machondi moo. 16Njiwode na machondi hengi-se halakeri ha mfiṟihafu. Kyaho nangaki na njihaende naho. Naho na hecheicho ṟu lyako. Naho kochikaa-ho ipo limu tupu na mlisi na umu mfi.”
17“Nkyo kyaenenga Wande anjikundi ili ngakurekya-ho moo foko kundu njiwuye ifuwada-se lingi. 18Ma kwipfo aifunjisokapfo kya indi nyi ngafulekya kui ikunda lyako njimonyi. Nyi njiwode pfinya ya ifulekya, njiwewode na pfinya ya ifuwada-se. Nyi wudo wande oko alenjiwawasia njiṟunde.” 19Nahong'u Wayuda walya wakawuya idumbukanase kawi kipfa kya madedo halya hake. 20Wafoi wa ipfo kiidi kyawo wakahamba, “Nyi oṟuṟe lumbode na isuko kasuko. A nyi nkya ki-se mumwadanyia?” 21Wengi wakahamba, “Madedo ho adeda chi hakeri cha ha mndu awodo nyi oṟuṟepfo. Alewo mooṟuṟe awechiidima itambaṟuo meso ha shipfupfuṟe ngesa?”
Yesu apiṟo nyi Wayuda
22Nahong'u kushikye mkonu mnene kulya Yerusalemu fokumbwo ngumbwo ya hekalu ilesamyo. Na kiheri kilya kiwei kya mbeo. 23Na Yesu aweichumiachumia ipfo hekalunyi ipfo kiṟihenyi kyalyo kihambo kya Solomon. 24Nalyo Wayuda walya wakacha imtengetia wakahamba, “Mtano indi ochiluwika mkeumkeu? Kokoya ukeri Kristo iyo, keluwie-wo na pata ṟaa.” 25Yesu kawahalwo, “Nyi njilemuwia da nanyo mulaidikye. Maṟunda hako njiwuta kui rina lya Wande oko, nyiho-ng'u hainjiṟingishia. 26Nanyo ma mulaidikye ili mulakeri kambenyi lya machondi hako. 27Machondi ho hako nyi haicho ṟu lyako. Na inyi njihaichi naho hanjilatya. 28Na inyi ngahaenenga moo fo mlungana. Naho ma hechikaa hadeke-se ma mlunganapfo. Ma kwipfo mndu echiharakwo kunu owokonyi lokopfo. 29O Wande ahanjienengye nyi ang'anye wose. Ma kwipfo mndu aidima iharakwo ipfo mawokonyi ha Wandepfo. 30Inyi na wande lui wamu.”
31Nalyo Wayuda walya wakawuya yende maho wamkape naho. 32Yesu kawahalwo, “Maṟunda hafoi sa mecha ngamaa imbonesya nyo hawuka ko Wande. Ipfo kiidi kyaho nyi liki lyemtewa munjikape na maho ngesa?” 33 Nalyo Wayuda walya wakamhalwo, “Chi kimaduma kya iṟunda liwe icha lurie ikukapa na mahopfo. Nyi kimaduma kya ngalali yapfo yeruma Ruwa, na ili iyo ukeri mndu o wandu kokutana Ruwa kumonyi.” 34 Yesu kawahalwo, “A ipfo wuwawasonyi wonu chi kuwode-pfo idedo lii iṟehye lyehamba, ke, Inyi njilehamba, ‘Nyo nyi mukeri maruwa?’ 35Kyasia walya waleshitsyo idedo lya Ruwa komkoya Ruwa nyi alewasenda maruwa na iki kii-kiṟehye ma kilechiwa ipfunguka. 36Ashika-wo inyi ili njiletano mwele nyi Wande kanjiduma kunu wuyana nyi monjihamba ke nyi ngaruma Ruwa ili ngahamba, njikeri Mana o Ruwa ko? 37Kokoya ngada njilawuta maṟunda ha Wande oko, denyi mulanjiidikye inyi. 38Indi kokoya ngawa mohawuta nahong'u mulanjiidikye inyi modeda, keidikyanenyi na maṟunda ho hako mukuwutye-ho imanya kya kisimirya ke o Wande ai na inyi na inyi njii na Wande.” 39Nahong'u wakawuya wakapfula mweke fombada. Nao kakuashuo ipfo mawokonyi hawo.
40 Yesu kawada njia kaambada meda fo Yordanyi kashika kulya kundu Yohane epatsiya kakaapfo. 41Wandu wakamchea wafoi, nawo wakahamba, “O Yohane ma alewuta ngata ya ṟihopfo. Kya indi kilya Yohane alededa kya ichu kyamba iwa kya lohi kyose.” 42Nalyo wandu wa kulya wafoi wakamwidikia.
Opfu lo Lasaro
Currently Selected:
YOHANE 10: KIM2
Highlight
Share
Copy
Want to have your highlights saved across all your devices? Sign up or sign in
Kimochi Bible © Bible Society of Tanzania, 2016.
