MAWOOKIONYI 8

Mtsitsionyi fo mfu

1Na Ruwa kakumbuo Noe, na orio kii na moo, na shuma shose shilya shiwei nao kulya safinenyi, Ruwa kawiwita otanu orukenyi mṟinga fukanyia 2soka tsa mapichinyi tsikapfungika na shiṟoṟi sha ruwehu-daa, ruwehu ilaolotse-se mvuo, 3mfu fukakaa orukenyi; na mkonu ihana na makumi hatanu (150) yekisia mṟinga fukaanguoanguo, 4mkonu fo ikumi na mfungade, fo meri fo mfungade, safina ikakuwada alya fumvunyi, lya Ararati. 5Mṟinga fukaanguo-anguo tane meri fo ikumi mkonu fo kuwoka fo meri-fo fo ikumi shitoṟomoso sha mafumvu shikawono. 6Nahong'u mkonu makumi haana yekisia, Noe kaṟuhuo kiṟoṟi kya safina iya alelisungusia, 7kalekia ikuru; nalyo lilawuye likarunduka ipfo na ipfo, tane mṟinga fouma orukenyi. 8Numa kalekia mbeta, naambuye kokoya mṟinga fomeanguo-anguo orukenyi, 9kyaindi mbeta iya ilawone handu hewika kudende koyo, ikawuuya Noe kulya safinenyi, kipfa mṟinga fuwei orukenyi kose, na Noe kahoṟuo owoko, kaiambia kaiwihiṟa na kulya safinenyi.

10Kaweda-se mfiri mfungade, naho kalekia mbeta iya lya kawi. 11Ili kyukanyi ambuya mbeta ikamchea irie iṟa lya mtsinefu na olumba ilelitowa, nahong'u Noe kamanya ke mṟinga fomeanguo orukenyi. 12Nao kawedia-se mfiri mfungade, kalekiase mbeta iya, nayo ilakimbuye-se manyale.

13Nalyo maaka fo mahana haṟandaṟu na fumu (601), meri fo kuwoka, mkonu fo kuwoka fo meri, mṟinga fuleomia orukenyi. Noe kairaho kipfinyiko kya safina iya kaambuya, kawona oruka lui luhadutsu. 14Meri fo kawi, mkonu fo makumi hawi na mfungade fo merifo, oruka luwei luhadutsu.

15Ruwa kadeda na Noe, kambia, 16kure kunu kiidi kya safina, iyo na mka opfo, na wana wapfo na wali wa wana wapfo handu hamu na iyo. 17Nowute-pfo na orio kindo kii na moo kyose kiwode mbihu, malehe na mando ha nja na hekeafuo orukenyi; shichepfumbukia orukenyi, shiwade kishari, shiengeṟeke iya orukenyi. 18Nahong'u Noe kawukapfo o na wana wake na mka oke na walyi wa wana handu hamu nao; 19orio indo lya nja na orio kindo kekeafuo na orio kilehe, na orio kindo kekechumia iya orukenyi kui mbaṟi yasho, wakawukapfo.

Noe awuta kidaso ko Ruwa

20Noe kasungusia Mndumii kitaṟa kedasia, kawuta orio indo lyiheṟemtsu na orio ilehe liheṟemtsu, kashiwika kidaso kemaya modonyi alya rasionyi. 21Mndumii-Ruwa kaicho opfamo lumchihiṟie, kahamba mrimenyi, “Njechisesa-se oruka numa ya ishi kipfa kya mndu o wandu-pfo kipfa mahio ha mrimenyi fo mndu o wandu, nyi hamawicho wokia wurika woke, manya njechikapa-se numa ya ishi orio kindo kii na moo chando njilewuta-pfo. 22Mandi oruka luipfo, kiheri kewaya, na kesambuo kiheri kya mbeo na kya kwaari, shiheri sha mfiri na kio na kiheri kya nduo, kisie na fulyi shechitsitsapfo.”

Currently Selected:

MAWOOKIONYI 8: KIM2

Highlight

Copy