MAWOOKIONYI 26

Isaki asamia Gerari

1Nalyo kukacha njaa kulya orukenyi, chi njaa iya ya kuwoka ya kiheri kya Abrahamupfo. Isaki kahendia Abimeleki, mangi ya Wafilisti, kulya Gerari. 2Mndumii kammbonekia, kahamba, “Kulasoke wohenda Misri, kaa orukenyi sa njechikuwia. 3 Kaa wuhenunyi wo ipfo orukenyi, na inyi njechikaa hamu na iyo, na ikuwikia mboṟa, kyamba njechikuinenga njorukatsi iyo na luwa lyapfo. Na inyi njechiwanza nyamu iya njileliia ndeo Abrahamu. 4Njechipfumbutsa oshari lopfo cha nyenyeri tsa ruwehu, na inyi njechiinenga oshari lopfo njorukatsi tsose, na kiidi kya oshari lopfo mkambo ya wandu wose wa wuyana wechicha iwikio ona. 5Kyamba Abrahamu naleadanyia ṟu lyako, kahendelia shiteṟio shako, na mawawaso hako, na mdumbuye yako, na shiasa shako.

6“Isaki kakaa kulya Gerari. 7 Wandu wa kundo kulya wakammbesa mbonyi tsa mka ulya oke. Kahamba, ‘Ichu nyi mshiki oko;’ kipfa naleowuo ihamba, ‘Nyi mka oko,’ wandu wa oruka lulya walache imbaha kipfa kya Rebeka; kyamba nawemcha kui kyamu. 8Nahong'u amekapfo mkonu ifoi, Abimeleki, mangi ya Wafilisti kaimehia itiṟishenyi, kawona Isaki kechitema-tema na mka oke Rebeka. 9Abimeleki kalaha Isaki kambia, ‘Ichu nyi mka opfo, lang'u,’ nkili kulehamba, ‘Ichu nyi mshiki oko?’ Isaki kambia, ‘Nkipfa njilehamba Njilapfe kipfa kyake.’ 10Abimeleki kahamba, ‘Nkiki iki kuleluwutia? Kofia mndu umuho kawelaa na mka opfo alakusaṟa, iyo noweluwika mondunyi.’ 11Naho Abimeleki kawawasa wandu wose, kechihamba, Ichu echipaya mnduchu ang'u mka oke kimbaṟi nawoho.”

12Nao Isaki kawaya mbeu kulya orukenyi, maaka fulya kasambuo kiheo kya ihana orio imu, Mndumii kammbikia ona. 13Na mnduchu kawa mnene kaengeṟa ipfumbuka, tane awa mwitoṟi. 14Kawada masaa ha machondi, na masaa ha mmbe, na masinga hafoi. Wafilisti wo wakamnyenyia. 15Na maṟungu halya ha mṟinga hose masinga ha ndee walehasuma, kiheri kya ndee Abrahamu, Wafilisti wawemehaikilia, wakahaichuṟa teri. 16Abimeleki kawia Isaki, Kure kunu kodu, kyamba iyo omewada pfinya ing'anyi kota so. 17Kyasia Isaki kakurepfo kawika kambi kulya pichinyi lya Gerari, kakaapfo.

18Isaki kawuya kasumase maṟungu halya ha mṟinga wawesumie kiheri kya ndee Abrahamu; kipfa Wafilisti walya wawehaikilie Abrahamu amepfa; nao kahadumbuya marina chandu ndee awehadumbuye. 19Masinga ha Isaki wakasuma ṟungu kulya pichinyi wakawona mṟinga fuiletseka. 20Walisi wa Gerari wakaloyana na walisi wa Isaki wechihamba, “Mṟingafu nyi fodu.” Naho kadumbuya ṟungu lilya rina nyi Eseki, kipfa waleloyana nao. 21Wakasuma ṟungu lyingi, wakaweloyanase kipfa kya ikyo. Kalidumbuya rina nyi Sitna. 22Kakurepfo kasuma ṟungu lyingi, lyo walakiloyane kipfa kyalyo. Kalidumbuya rina nyi Rehobothi, kahamba, “Kyamba Mndumii ameluwonyia maanya, naso lochiengeṟeka orukenyi.” 23Kado awukapfo kashika Beer-sheba.

24Mndumii-Ruwa kamchea kio kilya kilya, kahamba, “Inyi nyi Ruwa o ndeo Abrahamu, kulaowuo, kyamba inyi njii hamu na iyo, njechikuwikia ona na ipfumbutsa oshari lopfo kipfa kya Abrahamu mṟundi oko.” 25Kasungusia ho rasionyi kaichikiaho rina lya Mndumii. Kawikapfo ihema lyake, na masinga ha Isaki wakasumapfo ṟungu lya mṟinga.

Isaki na Abimeleki waidikiana

26 Nlyondi Abimeleki alemchea awuka Gerari, handu hamu na mbuya yake Ahuzathi na Fikoli, msongoru o itorito lyake. 27Isaki kawawesa, “Nki ili monjichea, nanyo mulenjisuo, mkanjifuna konu?” 28Wakahamba, “Nkya lohi lulewona ke Mndumii nawei hamu na iyo; naso lukahamba, ‘Lukaeliana nyamu na iyo, na iidikiana na iyo 29ke ochiluwutia shiwichopfo, ko koya lulakupaya iyo, manya lochikuwutia shiwichopfo, shile nyi mecha, lukakuda nokuhendie na ofoṟo;’ na iyo wulalu nyi ui msumbe o Mndumii-Ruwa.” 30Nahong'u kawasungusia mfuho nawo wakalya wakawenyo 31Wakakure ngamenyi otuko, wakaliiana nyamu wo wenyi na wenyi, numa Isaki kawainenga momu, nawo wakakuhendia na oforo. 32Naho mkonu na fulya, masinga ha Isaki wakacha wakamwendie mbonyi tsa ṟungu lilya lya mṟinga wawelyisumie, wakambia, “Lulewona mṟinga.” 33Nao kalyidumbuya rina nyi Shiba; ko ikyo rina lya mṟifo nyi Beer-sheba, mṟasa inu.

Waka wa Esau

34Esau kiheri awewode maaka makumi hana; kaalyika Yudithi, mana o Beeri, Mhiti, na Basemathi mana o Eloni, Mhiti. 35Mrima yawo Isaki na Rebeka ikarihinyika kipfa kyawo.

Currently Selected:

MAWOOKIONYI 26: KIM2

Highlight

Copy