MAWOOKIONYI 21

Ifeo lya Isaki

1Mndumii-Ruwa kachea Sara chandu awehambie, na Mndumii kambutia chandu awehambie. 2 Sara kakapika kafeeye Abrahamu mana o womi kiidi kya wuku woke, ko kiheri kilya ewio nyi Ruwa. 3Abrahamu kamdumbuya rina lyake nyi Isaki, mana ulya alefeyo, ulya Sara emfeya. 4 Abrahamu kadina mana ulya oke Isaki, kiheri awewode mkonu nyanya chando Ruwa embawasa. 5Nao Abrahamu nawei mndu o maaka ihana, kiheri mana oke Isaki alefeo. 6Sara kahamba, “Ruwa amenjiwutia kindo kesetsa; orio oose echiicho nechiseka hamu na inyi.” 7Kahamba, “Nyiu awechiwia Abrahamu, Sara nechionza wana?” Kyamba ngamembonyia mana kiidi kya wuku woke.

8Mana ulya kang'ana, kadumbutsio ionga; Abrahamu kasungusia mfuho fung'anyi mkonu fulya Isaki aledumbutsio ionga.

Hajiri afuno

9Sara kaambuya mana ulya o Hajiri Mmisri, ulya efeeya Abrahamu, kechitema na mana oke Isaki. 10 Nalyo kawia Abrahamu, “Funa kisingaki kya kika hamu na mana oke, cha kipfa mana o kisinga echiwada kyoṟa handu hamu na mana oko, Isakipfo.” 11Na idedolyi liwei lyiwicho mnu mesonyi ha Abrahamu; kipfa kya mana oke. 12 Ruwa kawia Abrahamu, “Idedo lyi lyilawichuo mesonyi hapfo, kipfa kya mana na kisinga ki kyapfo. Orio kindo Sara echikuwia idikia ṟu lyake, cha kipfa kiidi kya Isaki oshari lopfo lochisendo. 13Nao manachu o kisinga njechimhaluo mkambo fo wandu, kyamba nao na luwa lyapfo.”

14Abrahamu kakure ngamenyi otuko kaira mkate na kitumo kya mṟinga, kainengia Hajiri kamdika o makosohu hake; kamnengia na mana; nao kahenda kadekia kulya nuka ya Beer-sheba. 15Mṟinga fulya foikisia kulya kitumonyi, kalaṟa mana ulya shiya ikidi limu. 16Kahenda kakaa handu haleshe cha ha mkumbie fo mfi kemwambuya; kipfa nalehamba, “Ndawone manachu kechipfa;” nao kakaa kechimwambuya, kakoṟoṟoma na ṟu lyake, kafihiṟa. 17Ruwa kaicho ṟu lya mleu ulya. Malaika o Ruwa kalaha Hajiri kuwuka ruwehu, kambia, “Nki ki kikuwode, Hajiri? Manya kulaowuo, cha kipfa Ruwa ameicho ṟu lya mleu ulya ipfo kundu ai. 18Kure, nohendeira mleu ulya, nombade owokonyi lopfo, kyamba njechimhaluo mkambo fung'anyi.” 19Ruwa kamwambuṟa meso, nao kawona ṟungu lya mṟinga; kahenda kaichuṟa kitumo kilya mṟinga, karutsa mleu ulya.

20Ruwa kakaa na mleu ulya, nao kang'ana kakaa kulya nuka, kawa mlasi o wuda. 21Kakaa kulya nuka ya Parani; mae kamdaya mka kya orukenyi lo Misri.

Mkundano kiidi kya Abrahamu na Abimeleki

22 Kikashikia kiheri kilya Abimeleki, na Fikoli mnene o itorito lyake, wakawia Abrahamu, wehamba, “Ruwa nakeri na iyo ko orio kindo kyose okewuta. 23Kyasia wulalu nonjiliie nyamu ko Ruwa, ke ochinjiwutia mtambopfo, ma mana oko, ma mchuku okopfo; kyaindi chandu njilekuwutia osaṟio na wudo ochinjiwutia inyi, na orukalu ulechumiapfo.” 24Abrahamu kahamba, “Njechilya nyamu.”

25Nahong'u Abrahamu kadehelia Abimeleki kipfa kya ṟungu lilya lya mṟinga masinga ha Abimeleki halelyimsoka. 26Abimeleki kahamba, “Inyi njiichi mndu alewuta kindokipfo, ma kulenjiwia manya iicho mbonyitsipfo shile na inu tupu.” 27Abrahamu kaira ichondi na mmbe kainengia Abimeleki, nawo wa wawi wakawada mkundana. 28Abrahamu kawika mahuṟuwi mfungade kyanya kyaho. 29Abimeleki kawia Abrahamu, “Mahuṟuwi ha mfungade ohawika kyanya kyaho nyi ha kiki iho.” 30Nao Kahamba, Mahuṟuwi ha mfungade nochihaambia mawokonyi hako, hawe uṟingishi ke nyi inyi njilesuma ṟungulyi lya mṟinga. 31Ko ikyo kalaha handu halya nyi Beer-sheba, kipfa waleliiaho nyamu wa wawi. 32Nahong'u wakawika mkundana ipfo Beer-sheba. Abimeleki, na Fikoli mnene o itorito lyake, wakakure wakawuya tane orukenyi lo Wafilisti. 33Abrahamu kadonga mmoya ipfo Beer-sheba, kaichimbiṟiaho rina lya Mndumii, Ruwa o mlungana. 34Abrahamu kakaa cha mhenu orukenyi lo Wafilisti mkonu ifoi.

Currently Selected:

MAWOOKIONYI 21: KIM2

Highlight

Copy