Juwawu 15

Yesu gu muratchi wa ibaribari

1Yesu ohowonga ira: <<Miyo dili muratchi wa ibaribari. Babaga gu namalima. 2Tambi datene nnakuma mwa miyo. Tambi dedile dahanavaha, Baba unogwadawo. Mbwenye tambi datene nnavaha, Baba unokasela ira divahegeve jovaha jimohi jiwa kwaranya.#15:1-2 Miyo dili muratchi wa ibaribari…: Muwari mwa mazu Yesu unawonga liye, unawonga zela makalelo olima uva. Tchoira namalima wa uva unoroma ing'ana tambi datene nnakala na muratchi. Afwanya tambi youmma ya yaka ivirile, unowanda iziwa ira: <<Tambi ila ivahile yaka ile eto eni imala umma.>> Evale unogwada, liye tatila. Afwanya tambi yapama, unowanda iziwa ira: <<Tambi ila ili yapamene. Mbwenye ira iwande vaha pama, miyo nnafuna digwadele sogolro uwa wu ira ivahege kwaranya.>> Tchoira wahiya uva aramba bure, nnaindjiva tambive. Mbwenye wagwada sogolro wa tambi, tambile inovaha pama. Na makalelo amohive, Baba unoasakanyeda atu omuroromela Yesu ira kavahege kwaranya. 3Nyo eto muli ohuweyene na mwasa wa mazu nnaufundjihetchani miyo. 4Nyo inafwanela mukaleve muwari mwa miyo eto miyo dikaleve muwari mwa nyo. Voira tambi yahagumane na muratchiwa, yakala vewa vene kinavaha yengo, sawasawa na nyenne mwahakaleve mwa miyo kamunavaha jovaha. 5Miyo dili muratchi. Nyo muli tambi diwa. Wenno unakalave muwari mwa miyo, gwenno unavahege jovaha jidjindji. Tchoira mwadihiya miyo, kamunaira yengo. 6Wenno ahanakalave muwari mwa miyo unotatiliwa nnga tambi dohokana mabasa. Danyala, namalima unogumaniha, liye dowa vokeda munloni, aliwa ja.

Yesu ohowonga zela makalelo okalave no zivela waye

7<<Nyo mwakalave na miyo, mazwaga kakalave na nyo, mwadivepa miyo yengo ili yatene inafune nyo, munerege vahiwa. 8Nyo mwavahaga jovaha jidjindji, Babaga unerege titimihiwa eto inerege oniha ira muli anamadiharaga. 9Miyo duhuzivelani nyo na makalelo nnga Baba udizivenle liye miyo. Mukaleve muwari mozivela waga. 10Makalelo anafuna nyo kalave muwari mozivela waga ku hariha malamulo aga. Sawasawa nnga miyo. Miyo nnohariha malamulo a Baba nona zivela waye ulive na miyo. 11Miyo dauwandelagani eji nnerela ira hagalala waga ukaleve muwari mwa nyo eto ira nyo mukayena hagalala okwakwanela.

Nlamulo na Yesu zela zivelana

12<<Nlamulo naga nnauvahani miyo ti ni. Muzivelanege mmohi na nfwaye nnga miyo eto duzivenleni miyo. 13Mutu usimbwetchetche gomiheda azivela afwaye, gwenno unafiyeda akwela.

14<<Mwairagana jinaurumani miyo, munokala afwaga.#15:14 Mwairagana jinaurumani miyo, munokala afwaga. Mazwala ananiwandela ira atu omuroromela Yesu a ibaribari anairana jinafuna Yesu. Fwanyeya ira mutu kanaroma kala nfwaye wa Yesu moirana jinatonga Yesu. Mbwenye wenno uli nfwaye na wanle unooniheda vili liye monvwelela wenno unamunyindela liye.

15<<Roma peno miyo kannauitanegeni anamalabaga. Nnauitanegeni afwaga mwasiwa namalaba kanaiziwa jatene ja mbwiyaye. Nyo mbwenye, jatene jidiwandenle Baba, dihimala uiziwihani.

16<<Kahi nyo mudisakunlre miyo, nari. Miyo mbwenye guusakunlreni nyo, miyo urumani ira mudowe mwavahege misapo dapama dohokana goma uwa,#15:16 misapo dapama dohokana goma uwa ku wonga joira japama jolaba yengo yohokana goma uwa. Muwari moira anamamuhara Yesu kafuna kalaleye makalelo ira atu kakayena ingumi yohomala, kafuna kapindulre yengo yohomala inafwanyeya yagali atu okala muUmweneni mwa Mulugu kala no kala. Hiyaniha no manga nyumba ya igereja, umbuwelaga ira: <<Peno mbwenye nihilaba mabasa a Mulugu>>, agali kamangile jengo jinafuna za vunda sogolro. ira jatene jinanvepege nyo Baba na nzina naga, auvahegeni.

17<<Inaurumani miyo tchi ila, muzivelanege mutu mmohi na nfwaye.>>

Yesu ohowonga zela harahariwa

18<<Atu a mwilamboni kauidagani, kamudiwale ira murandji idiwa gu miyo. 19Nyo mwahakale a mwilamboni, atu kerege uziveliwani nnga ewa. Mbwenye atu anerege uidani mwasiwa nyo kamuli a mwilamboni. Anerege uidani nyo mwasiwa miyo dusakunlreni ira mwahakale atu a mwilamboni.

20<<Muumbuwele mazu duwandenleni miyo ira: <Kalivo namalaba omukwaranya patarawu waye.> Akala atu amohi kodiharahara miyo vano, na nyenne muiziwe ira munerege harahariwa. Akala atu amohi korumeletcha jowonga jaga, na nyenne muiziwe ira mwalaleyaga anerege oneya amohiwa ofuna rumela jinafuna nyo wonga.

21<<Mbwenye jabure jatene jinafuna atu uirelagani, anauirelegeni na mwasa wa nzina naga. Tchoira aliwa kimuiziwile wenno udirumile.

Goma wa atu anne kahanamuroromela Yesu

22<<Miyo dahaza eto dahaawandela atu ibaribari, atu anne kahanadiroromela tchakana mulandu. Mbwenye peno kinna votawela zela jotega jewa. 23Mutu wenne unadiida, kanadiida miyo meka, nari. Unamwida eto na Babene. 24Miyo diwendaga muwari mwa atu a ilambo ya vati, dahairana joira jejo jahanawanda mutu mmohiwa irana, aliwa tchakana mulandu zela jotega. Mbwenye peno kohokana mulandu mwasiwa aliwa kohoona jotikiniha jiirile miyo, nomala ona aliwa diidaga eto mwidaga na Babene. 25Mbwenye jatene ejo jinaireyela ira jikwakwanelihede jolremba jejo jinafwanyeya mmalamuloni mwewa ira: <Aliwa kohodiida vahali mwasa.>#Salmu 35:19

26<<Mbwenye Nkamihedi wenno nnafuna miyo muruma kuma zulu wa Baba, wenno unafwanyeya agali Munemba wa ibaribari, wenno unakumela wa Baba, liye aza unodihidedela miyo umboni. 27Na nyenne eto munerege dihidedela umboni miyo mwasiwa nyo mulive na miyo kuma maromelo.>>

Currently Selected:

Juwawu 15: iLolo

Highlight

Copy