Jenesesi 34

Muselu wa Dina na Sikemu

1Siku nimohi, Dina mwana Jako wenno ambanle liye na Leya, ohovenyaga ira adowe awalrede na ahiyana a ilambo yenne. 2Mwa enne mulombwana Amori nkuda Evi, musogolrelri wa ilambo yenne, ohomukana mwanaye mmohi aitaniwa Sikemu. Mwanayele Sikemu agamuonne Dina, ohomutukula dowa murarutcha momuhindela. 3Liye ohomuziveliwetchetcha Dina mwana Jako ule na mmirimani mwaye mwatene. Muwari momuziveliwa, omuwongetchana jotapilra ira Dina amurumele. 4Evale Sikemu ule ohowongaga na babaye Amori, liye ira: <<Miyo dera mudowe mwadiwongele wa namwali ule ira akale muhiyanaga.>>

5Mulombwana Jako ohovwaga ira: <<Mwanawo Dina uhutakalihiwa na Sikemu.>> Mwa tempu yawandeliwa liye enne, anaye kali olapela wene kadjihaga ng'ombe. Evale liye kawongilegeve yengo, fiyeda anaye aliwa welawo. 6Eto noira enne mulombwana Amori babaye Sikemu ule, ohovenyaga dowa tapanyeda na Jako zela Dina.

7Evale ahima a Jako kagawenlewo kokolani ule, kagavwile zela jejile jaireyile na Dina, kohokukumuwaga eto kohotakaleliwaga valukulu, mwasiwa Sikemu ohategela eto ohapudja aIzarayeli, agonaga na mwana Jako, asakanyaga yengo yotakaletchetcha. 8Mbwenye Amori ohowonga na aliwa eraga: <<Mwanaga Sikemu unonfuna namwali ula na mmirimani mwaye mwatene. Nnouvepani ira mmuhiye amutele. 9Inafwanela nitelanege. Nyo mwaatelege anamwali ehu eto na hiyene naatelege anamwali enyu. 10Eto nyo mukalege mwilamboni mwehu mu na hiyo vamohi nnga anamurala. Mmange nyumba dinyu eto musakanyegemo malronda enyu emuno eto mugulege mamburo munafuna nyo.>>

11Evale Sikemu ohonvepa babaye Dina vamohi na arongola a Dina ale eraga: <<Nnouvepani ira mudifwewele murima ira dimutele murongolinyu. Malringana inafuna nyo wonga, miyo nnouvahani jatene jinafuna nyo. 12Nyo mwarumela ira dimutele, masiki muwonge pete idjindji, na mivaho didjindji, miyo nnouvahani jatene ejo. So miyo nnafuna namwali ule akale muhiyanaga bahi.>>

13Voira Sikemu ohomutakaliha murongoliwa Dina, ana Jako ale kohomunyenga Sikemu vamohi na babaye Amori wenne, aliwa muwakula keraga: 14<<Hiyo kannamuteliha murongolihu ula na mutu ohoineliwa. Namuteliha mwanihu na mutu ohoineliwa, para hiyo ba manyazo. 15Mbwenye ira hiyo nirumele iwongile nyo, mudowe mwaainele ahiminyu atene a alombwana nnga jinaira hiyo. 16Mwaineliwa mbwenye, hiyo nnerege ateliha anamwali ehu na nyo eto hiyo nnerege atela anamwali enyu. Hiyo nnerege kala na nyo eto nnerege oneya nnga atu a nlogo nimohive. 17Mbwenye nyo mwaharumele iwongile hiyo, mwahafune ineliwa, hiyo nnomutukula murongolihu ula eto nnovenyamo wene mwilamboni muno.>>#34:17 ineliwa: Ineliwa unawongiwa va kahi nnga ineliwa wa tempu ili hiyo ila. Wanle Mulugu ohomuwandela Abarahamu ira: mwana wa mwanapongwe uli watene unabaliwege vande vawo, akwakwanihaga malambo matanu na mararu, inafwanela aineliwe. (Jenesesi 17:12) Eto ineliwa uwa, aineliwa ali ahima a alombwana ve, kakwakwaniha malambo matanu na mararu. Ku wonga ineliwa unawongiwa va ku wonga gwadiwa tembe niwa na mbene, hiya langiwa bahi muwari mwa mazu. Nione Levitiku 12:3. Ku wonga ja zoma jinaireya na anamwali nari lunga na azombwe jinera atu tempu ili hiyo ila kajinna pandi no ineliwa wafunetcha Mulugu wanle.

18Evale Amori na mwanaye Sikemu, kohoziveliwa yenno yawongile arongola a Dina. 19Mobaranya muzombole ohodowaga ineliwa, mwasiwa ohosimbwetchetcha nfuna mwana Jako. Eto Sikemu ali muzombwe orihediwa kwaranya atu atene a muibalini mwa babaye. 20Noira enne, Amori na mwanaye Sikemu kohagumanihaga alombwana atene va mulango va sidadi yewa ile, aliwa roma awandela alombwana atene a musidadi mule keraga: 21<<Atwala kohokana murendele na hiyo, kinna makani. Mwahiye ira kakalege na hiyo mwemu, kasakanyege malronda ewa emuno, voira ilambwela kahi ya masika. Hiyo naatelege ahima ewa, aliwa eto kaatelege ahima ehu. 22Aliwa anorumela kala mwilamboni muno eto kakalege nnga nlogo nimohive vamohi na hiyo. So mbwenye ira kawande rumela anafuna ira nikwakwanelihede yengo imohi. Aliwa anafuna hiyo naainelege alombwana ehu atene nnga aliwa anaainela atu alombwana ewa. 23Ndoweni nirumeleni. Mwasiwa narumelani, ng'ombe dewa na jorayela jiwa jatene jinokala jehu! Malringana nirumeleni irana yenno ivepile atu, era eno, aliwa anokala vamohi na hiyo.>> 24Jagaireyile enne, alombwana atene a sidadile, kohorumelaga yowonga ya Amori na Sikemu, alombwana vamohi na azombwe atene a sidadile kohoineliwa.

Levi na Simeyawu kohoweliha kunyakunya na mwasa otakalihiwa wa murongoliwa Dina

25Atwale kagamanle ineliwa, siku naneraru, jilonda jiwa jile jahanavole, jipaga bure, ana Jako ambinli, Simeyawu na Levi, Dina arongoliye, kohotukulaga masupadiwa, volowa musidadi mule atu kahaonagawo, aliwa mala apamo alombwana atene. 26Kohompa eto Amori na mwanaye Sikemu na supada. Evale kohomutukula murongoliwa Dina vande va Sikemu vale, aliwa mudowagana waniwa. 27Noira eno, ana Jako amohiwa ohala ale kohovolowaga musidadi mule, aliwa roma viraga muwari mwa alombwana atene kapiwe ale, aliwa tukulaga jorayela jafwanyeyana atu musidadi mule na mwasa otakalihiwa wa murongoliwa. 28Eto kohotukulaga mabila, mbuzi, ng'ombe, aburu, jatene jafwanyeya musidadi mule na mmindani mwene. 29Eto kohotukula jengo jiwa ja peresu yokwima, na ahiyana atene vamohi na ahimiwene aliwa adowagana. Eto kohomala tukula jatene jafwanyeya mmamba.

30Evale Jako ohomuwongana Simeyawu na Levi eraga: <<Nyo muhuditatamulela madugudugu no harahariwa. Muhusakanya ira annya a ilambwela akuda Kana na aFerizi kadiidege miyo. Nyo muhuiziwa ira hiyo kanili anene. Aliwa kera kagumanele na afwiwa amohiwa, kaza ira niwane, anoditolotcha miyo vamohi na vande vaga vatene.>> 31Evale aliwa kohomuwakula keraga: <<Kodi yali yapama yenno yamuirele liye murongolihu ula nnga puta?>>

Currently Selected:

Jenesesi 34: iLolo

Highlight

Copy