Jenesesi 18

Abarahamu ohawatchela angelro

1Siku nimohi Yehova ohomutwanyuwela Abarahamu agali wewo wafwanyeya mitengo dilukulu da karvaliyo da Mamere. Aligi siku nokaha eto liye afwanyeyaga vamusasani vaye, agali va mulango. 2Abarahamu agavenyihile meswaye, ohaonaga atu araru#18:2 Abarahamu… ohaonaga atu araru: Va niromile vwa ira Yehova ohomutwanyuwela Abarahamu. Mutwanyuwela uwa, Abarahamu aaonne atu araru kazaga. Fwanyeya ira muwari mwa atu araru, mmohi ali Yehova. Nione Jenesesi 18:13,15. Zela ibaribari ira Mulugu Mwana ozetcha mwilamboni ya vati, nione mazu anafwanyeya Jenesesi 16:7,13; 1 Korinto 10:4. kagaimenle wandamelana vali liye vale. Agaaonne atwale, ohatamangelaga, liye akokorela. 3Liye avepa eraga: <<Andimuwa, akala munodifwewela murima, dera muperuwe vande va miyo namalaba wenyu. #18:3 Abarahamu aaonaga atu araru kazile vande vaye, aviitanagamiyo namalaba wenyu kahi ira liye ohaiziwa na wanle. So mbwenye ali makalelo kawongetcha atu wanle muwari momuriheda mundimuwa. 4Anozana mahindje kauvaheni ira muhuwena manyalo enyu, mudowe mwavume vang'onove vanfulrini va mutengole. 5Eto nnozana mwana pawu mutakune ira mukayena kopolo dowenda, tchoira muhufiya vande va namalaba wenyu. Mwera eno, munokwaranya mudowege.>> Evale alendwale kohorumela, aliwa ira: <<Tabo, ihikala pama. Irana nnga muwongele we.>>

6Evale Abarahamu ohovenyaga mobaranya, liye volowa mmusasani mwali muhiyanaye Sara eraga: <<Kabaranya udowe wapime mipimo miraru da utu wa tirigu otchileya pama ira usakanye pawu!>> 7Mbwenye Abarahamu ohotamangela wali jifuwo jaye, liye hinda mwana ng'ombe imohi yoruva yapama, za nvaheda muzombwe mmohi ira asakanyede mobaranya. 8Eto Abarahamu ohotukulaga mukaka osakanyediwa vamohi na mukaka mutiti na mwana ng'ombe amuotchihile liye, liye dowa avaheda alendwale. Abarahamu agaavahedile alendwale jodja jile, ohokalagave oimelene vanfulrini va mutengo valigi atu vale, liye aing'anelaga, fiyeda aliwa mala dja.

Angelro kohomuwandela Abarahamu ira Sara unombala mwana.

9Evale alendwale kohonfuka Abarahamu, aliwa ira: <<Muhiyanawo Sara uli waani?>> Liye oharumelaga eraga: <<Uli mmba mule.>> 10Mutu mmohi muwari mwa alendo ale, ohomuwandelaga Abarahamu ira: <<Na ibaribari yaka ya metchelo miyo nnoza vande vano tempu nnga ha yenna. Tempu yenno muhiyanawo Sara unombala mwanapongwe.>> Ora yawongaga mulendole mazu anne, Sara afwanyeyaga unduli wa mamunaye Abarahamu vamulangoni va musasa vale, avuruwanaga. 11Abarahamu na Sara tempu yenne kafwanyeya kagamanle ulula. Eto Sara idadi yobala yohovira wanle. 12Evale Sara ohoumbuwelaga mmirimani mwaye ateyaga ekave eraga: <<Kodi japama jejo jinafuna jidiireyele avi, agali miyo dihimala goma eto agali mbwiyaga uhumala ulula?>>#18:12 mbwiyaga uhumala ulula: Sara airaga mbwiye waga amuwonga mamunaye Abarahamu. Liye amuitana mbwiye muwari momuriheda. Nione 1 Peduru 3:6. 13Evale Yehova ohonfukaga Abarahamu eraga: <<Nnga muhiyanawo Sara ateya nni airaga: <Kodi miyo nnoza dimbale mwana dagamanle ulula?> 14Kodi ikalavo yengo inamurutcha Yehova? Yaka ya metchelo ora nnga yenna, miyo nnowelela veva, Sara unombala mwana.>> 15Evale Sara na mwasa oova ohorunaga eraga: <<Ii, hehi, miyo kaditeyile!>> Yehova mbwenye ohowongaga na Sara eraga: <<Nari, kurune, weyo uhuteya.>>

Mulugu ohomuwandela Abarahamu zela akuda Sodoma

16Evale alendwale kohomaruwaga, aliwa ing'ana pandi ya ndila yodowa Sodoma. Kamaruwaga, mulombwana Abarahamu ohavelelaga. 17Evale Yehova ohoumbuwelaga mmirimani mwaye ira: <<Miyo kannafuna mukuwa Abarahamu mabasa nnafuna miyo laba muSodoma. 18Tchoira Abarahamu gwenna unafuna kala babi wa nlogo nindimuwa na kopolo. Muwari mwa Abarahamu pu mwemo munafuna za relihiwa malogo matene a ilambo ya vati. 19Miyo dihimusakulra ira aafundjihege ahimaye vamohi na atu atene anafuna za baliwelamo ira kaharihege ndila yaga dagali Yehova, kairegena japama na ja ibaribari. Kairana eno miyo dagali Yehova dize dinvahe Abarahamu yenno ipanganne miyo na liye. Nona ifwanenle dimuwandele mabasa dizele miyo laba muSodoma.>> 20Evale Yehova ohomuwandela Abarahamu ira: <<Miyo dizele na mwasa okuwa undimuwa unavwa miyo kawongaga zela jabure jidjindji jinaira akuda Sodoma na akuda Gomora. Jotega jinera atu kahi jing'ono. 21Miyo nnafuna didowe daone na meswaga ira dikayena ibaribari akala pu mwemo nnga munavwela miyo.>>#18:21 dikayena ibaribari: Wonga waye watonyiheda ira Yehova unaatonga atu mwa ibaribari zela joira jiwa. Mbwenye kahi ira Yehova kaiziwile jaireya Sodoma mwasiwa Mulugu uiziwa jatene masiki joumbuwela ja atu. Nione Salmu 139:2-4.

Abarahamu ohonkumbanya muzuliye Lroti

22Abarahamu aavelelaga alendwale, ambinli kohosogolraga kadowaga ndila ya Sodoma. Mbwenye mulombwana Abarahamu ohalaga na mulendo mmohi wenno ali Yehova.#18:22 mulendo mmohi wenno ali Yehova: Zela mulendo mmohi wenno ali Yehova, nione eto rodape unafwanyeya Jenesesi 16:13. 23Mwa enne Abarahamu ohomukwivelaga Yehova, anfukaga eraga: <<Nnga Sodoma munadowa nyo, kodi munafuna mwaape atu apama vamohi na atu abure? 24Nnga mwaafwanyawo atu apama 50, munoapa vamohi na atu otegale? Kamunalevelela sidadi yenne na mwasa wa atu apama munaafwanye nyo wewule? 25Kamuirena yengo yokala nnga ha yenna ira atu apama kapiwe vamohi na atu abure. Ira apama na abure atene katongiwe na makalelo amohive, kamuirena! Mwasiwa nyo muli namatonga wa ilambo yatene ya vati, wenno unatonga mwa ibaribari.>> 26Evale Yehova ohomuwakulaga eraga: <<Miyo dadowa Sodoma, daafwanyamo atu 50 apama sidadi yatene, kannaitolotcha sidadile na mwasa wa atu 50 ale.>>

27Abarahamu ohowongagave na Yehova eraga: <<Masiki dilive tumbulru na ndora vamentoni venyu, dihivilevela ira diwonge na Nabwiya. Nnafuna dufukenive. 28Nnga mwadowa wewule, mwaafwanyamo atu apama kahafiye 50, kahalaga atu atanu ira kafiye 50, kodi munoitolotcha sidadi yatene yenne na mwasa wa atu atanu kahanle ale?>> Evale Yehova ohomuwakulaga eraga: <<Miyo dadowa wewule, daafwanyamo atu 45 apama, sidadile kannaitolotcha.>>

29Abarahamu ohowelelagave wonga na Yehova eraga: <<Nnga mwaafwanyamo atu apama 40 bahi?>> Yehova ohomuwakulagave eraga: <<Miyo masiki daafwanyamo atu apama 40, na mwasa wa anne, sidadile kannaitolotcha.>> 30Mulombwana Abarahamu ohowongagave na Yehova eraga: <<Nabwiya kamutakaleliwe, mudihiye diwonge akoka. Nnga mwafiya sidadile, mwaafwanyamo atu apama 30 bahi, kodi munoitolotcha sidadile?>> Yehova ohomuwakulaga eraga: <<Nari, masiki daafwanyamo atu 30 apama, sidadile kannaitolotcha.>> 31Mulombwana Abarahamu ohowongagave eraga: <<Dihivilevela ira diwonge na nyo Nabwiya, mudirumelihe ira dufukenive. Nnga mwadowa mwaafwanyamo atu apama 20 bahi?>> Yehova ohomuwakulaga, liye ira: <<Daafwanyamo atu apama 20, na mwasa wa anne, kannaitolotcha sidadile.>> 32Evale Abarahamu ohokalelave fuka eraga: <<Nabwiya waga, kamutakaleliwe, mwasiwa yofuka yenna tchogomiheda. Nnga mwadowa, mwaafwanyamo atu apama kumi bahi, munoitolotcha sidadile?>> Yehova ohomuwakula, liye ira: <<Daafwanyamo atu apama kumi, na mwasa wa anne miyo kannaitolotcha sidadile.>>#18:32 mwaafwanyamo atu apama kumi bahi, munoitolotcha sidadile? Abarahamu ira awonge eno, liye ohoiziwa ira: <<Muzulaga Lroti uli muwari mwa sidadi yenno Mulugu unafuna liye tolotcha.>> 33Evale Yehova agamanle tapanya na Abarahamu, ohotukulaga ndilaye, liye dowaga ulrendo waye eto Abarahamu ohowelelaga vande vaye.

Currently Selected:

Jenesesi 18: iLolo

Highlight

Copy