Jenesesi 14

Lroti ohotukuliwa na anyakondo

1-2Muwari mwa tempu yenne mulombwana Amerafeli wenno afwanyeya agali mwene wa Sinari, na Ariyoki mwene wa Elazari, na Kedorilawomeri mwene wa Elamu, na mulombwana Tidali mwene wa Goyimi, kohovenyihanaga siku nimohi ira kadowe kawane na Bera mwene wa Sodoma, na Birisa mwene wa Gomora, na Sinabe mwene wa Adima, na Semeberi mwene wa Zeboyimi, na mwene mmohiwa wenno ali mwene wa sidadi ya Bela, yenno eto inaitaniwa Zowari. 3Evale amwene atene kohagumaniha anyakondo ewa ndabo na Sidimi, wewo unafwanyeya Ntiya na Mwinnyu. 4Ira kawane, mwasiwa goira malambo a mundulri mwene Kedorilawomeri ohagondjiha amwene afwaye, aliwa roma mulabaga muwari mwa yaka kumi na mbinli. Mbwenye ikwakwanaga yaka yanekumi na taru, kohoroma konda tongiwa na liye.

5Evale dikwakwanaga yaka kumi na nnayi, mwene Kedorilawomeri ohovenya vamohi na amwene afwaye anne aawandannena liye, aliwa dowa roma agondjiha aRefayina sidadi ya Axiteroti-Karinaimi, akuda Zuzi ilambo ya Ami, akuda Emi sidadi ya Save-Kiriyatayimu, 6vamohi na akuda Hori mwangoni wewa wa Seyire. Aliwa kohogondjiha ilambo yatene fiyeda sidadi ya Eli-Parani, wandamelana kokola. 7Nomala eno, kohowela, aliwa dowa sidadi ya Eni-Misipati, ku wonga sidadi ya Kadeji, aliwa roma agondjiha aAmaleki atenene, vamohi na aAmore anno anakala ilambo ya Hazazoni-Tamari.

8Evale amwene okonda tongiwa na afwiwa anno kafwanyeya sidadi da Sodoma, Gomora, Adima, Zeboyimi, sidadi ya Bela, ku wonga sidadi ya Zowari, kohogumana kadowaga ndabo na Sidimi 9ira kawane kondo na Kedorilawomeri mwene wa Elamu, na Tidali mwene wa Goyimi na Amerafeli mwene wa Sinari na Ariyoki mwene wa Elazari. Ku wonga amwene atanu kavenyile ira kadowe kawane na amwene annayi.

10Ndabo na Sidimi neno wafuna atu dowa wana, nohokana matchelra madjindji okana alikataraya muwari muwa. Mwa enne anyakondo kakumile sidadi ya Sodoma na Gomora, muwari mowana mule, kohoroma gondjihiwa, aliwa roma tawa. Muwari motawa mule, amohiwa kohomorela matchelra anne eto amohiwa kohotawela mmwangoni. 11Evale amwidaniwa ale kohotukulaga jorayela jatene ja Sodoma na Gomora vamohi na jodja jiwa jatene, aliwa dowagana. 12Eto kohomutukula mulombwana Lroti, Abaramu muzuliye#14:12 Abaramu muzuliye: Owu hehi Abaramu mbalaye mwanaye. na jatene jene janna liye, aliwa mudowagana ira akale muzari. Tchoira liye akaletcha Sodoma.

Abaramu ohomuwombola muzuliye Lroti

13Mbwenye ohokalawo mutu mmohi avuluwile, ahatukuliwa. Wenne ohodowaga muwandela mulombwana Abaramu muEberewu ule jatene jaireyile. Mwa tempu yenno Abaramu akala wandamana na mitengo da karvaliyo da mulombwana Mamere nkuda Amore, wenno ali Exikoli na Aneri mbaliwa. Fwanyeya ira Mamere vamohi na abalaye ale kohopangana wandana na mulombwana Abaramu. 14Evale Abaramu agavwile ira: <<Muzuliyo Lroti utukuliwa!>>, ohagumaniha anamalabaye kabaliwe vande vaye okwakwana 318 ira kadowe kawane. [Na afwayene Mamere na Exikoli na Aneri kohodowaga vamohi]. Mwa enne aliwa kohogundeya, aliwa roma atamangela amwidaniwa ale ante ilambo ya Dani.

15Nzuwa nagavirile mulombwana Abaramu ohagawaga anamalabale makuru menli. Mwa enne kohatatamulaga amwidaniwa ale ora ya mahiyu, aliwa roma wana fiyeda agondjiha. Eto kohoromaga ahara ante ilambo ya Hoba yenno inafwanyeya pandi ya norti#14:15-16 pandi ya norti ku wonga mutu aimela aing'anaga mavirelo wa nzuwa, pandi ya muwononi odjana. ya sidadi ya Damaxiku. 16Ohawakaga jorayela jatene jatukunle atu eto ohomutukulaga muzuliye Lroti vamohi na jatene janna liye na ahiyana vamohi na atu atene katukuliwe.

Gumana wa Abaramu na Melikezedeki

17Mulombwana Abaramu agamanle mugondjiha mwene Kedorilawomeri ule na amwene afwaye kali vamohi na liye, ohoroma welela waniwa wakoka wene. Mwa tempu yenno yawelela liye mundulri adowaga waniwa, ohongumanagana mwene wa Sodoma ndabo na Save. Ndabo nenne nohokana nzina nimohiwa neriwa ndabo na Mwene. 18Mwa enne ohokalawo mulombwana mmohi aitaniwa Melikezedeki wenno ali namakuta wa Mulugu Okwaranya Jatene eto ali mwene wa ilambo ya Salemi. Melikezedeki ule ohotukulaga vinyu vamohi na pawu, liye nvaha mulombwana Abaramu. 19Aganvahile, Melikezedeki ohomureliha Abaramu eraga: <<Mulugu Okwaranya Jatene, Mwinnya wa ilambo ya zulu na ilambo ya vati aurelihe we Abaramu. 20Mulugu Okwaranya Jatene wenno uuvahedile amwidani awo mmandani mwawo atamaleliwe.>> Evale Abaramu ohotukulaga yanekumi ya jejo jaawakile liye amwidanaye kondoni, liye nvaha Melikezedeki ule.

Gumana wa Abaramu na mwene wa Sodoma

21Abaramu agamanle awombola atu atene anne, mwene wa Sodoma ohomuwongana eraga: <<Jengo jaga jatene mwaawakile nyo amwidani podi halana, so miyo nnafuna ira mudivahede atwaga bahi.>> 22Mbwenye mulombwana Abaramu ohomuwakulaga eraga: <<Miyo nnovenyiheda mandagala zulu, nnolumbela vamentoni va Yehova, Mulugu Okwaranya Jatene, Mwinnya wa ilambo ya zulu na ilambo ya vati 23ira miyo kadiza dihalana yengo ili yatene ili yawo nne usalru mmohi nne mungohi mmohi wa xineli tawiha ira unaze uwongege ira: <Miyo gumurayelihile Abaramu!> 24Miyo kannafuna tukula yengo ili yatene, so yotukula yaga ti jodja jejo jidjile azombwaga mundila vamohi na pandi yenno inafuna watchela afwaga anno kadivelenle, roma mulombwana Exikoli, Aneri na Mamere. Afwagala mbwenye aliwa podi tukula pandi yewa.>>#14:24 Afwagala mbwenye aliwa podi tukula pandi yewa. Abaramu awonga zela liye na alombwana atene a vande vaye ira: <<Hiyo kannatukula yengo ili yatene.>> Mbwenye liye kaatongile afwaye araru kadowile kondoni vamohi na liye. Akala afwaye ale kohokana yafuna atu vahiwa, kogovahiwa.

Currently Selected:

Jenesesi 14: iLolo

Highlight

Copy