Jenesesi 12

Itaniwa wa Abaramu

1Yehova ohowonga na Abaramu eraga: <<Uvenye ilambo ili we, waahiye abalawo, na vande va babawo, udowege ilambo yenno inafuna miyo utonyiheda. 2Miyo nnosakanya ira mwa weyo mukume nlogo nindimuwa. Miyo nnoureliha, nnovweyiha nzina nawo ira atu amohiwa karelihiwe mwa weyo.#12:2 nnovweyiha nzina nawo ira atu amohiwa karelihiwe mwa weyo: Aliba manga nyumba yolapa sidadi ya Babeli kafuna kavweyihe nzina niwa okave. Mulugu mbwenye apanganne ira avweyihe nzina na Abaramu ira muwari mwa Abaramu atu amohiwa karelihiwe. Ku wonga Abaramu afuna avweyihiwe muwari mwa kopolo da Mulugu hiya vivweyiha ekave. 3Miyo nnerege areliha ale anaurelihege eto nnerege atembelrelra ale anautembelrelrege.#12:3 Miyo nnerege areliha ale anaurelihege eto nnerege atembelrelra ale anautembelrelrege. Mazwala ananiwandela ira Mulugu uiziwa akoya aye. Nona kinafwanela mutu nyindelaga mirombwe nari sakanyedaga vande na mirombwe ira akale pama. Akala weyo uli wa Mulugu, kilivo inafuna ufwanya, mwinnya Mulugu ahaiziwaga. Eto malogo matene a ilambo ya vati anoza karelihiwe mwa weyo.>>#12:3 Eto malogo matene a ilambo ya vati anoza karelihiwe mwa weyo. Mazwala kazile kwakwanela muwari moira Yesu abaliwaga, ubaliwe muzizani mwa Abaramu. Teto atu a malogo matene anowanda relihiwa muwari mwa Yesu Kiristu mwasiwa liye gunawanda nvulusa mutu uli watene unamuroromela. Nione Galasiya 3:7-9.

4Abaramu agavwile mazwale, ohovenyihana nnga mwamurumele Yehova. Lroti ohodowaga vamohi na liye. Abaramu avenyaga ilambo ya Arani yakala liye, afwanyeyana yaka 75. 5Ohomutukula muhiyanaye Sarayi, na Lroti mwana mbalaye, na jengo jatene japatile atu kagali wewule vamohi na anamalabiwa anno kaapatile atu Arani ule. Atene anne kohovenyihana, kadowaga ante aliwa fiya ilambo ya Kana. 6Kagafiyile Kana, Abaramu ohowendawendaga ilambwele fiyeda Sikemu, ante liye dowa fiya vati va mutengo mulukulu wa karvaliyo afwanyeya More.#12:6 mutengo mulukulu wa karvaliyo afwanyeya More: Owu hehi mutengo mulukulu wenno kamuitana atu More. Ku wonga afwase More ti nzina na mutengo, owu hehi afwase ti nzina na ilambo. Tempu yenno akuda Kana kafwanyeya wewule.#12:6 Tempu yenno akuda Kana kafwanyeya wewule: Akuda Kana banno Nowe aatembelrelre liye. (Jenesesi 9:25) Eto fwanyeya ira Abaramu akumile ziza na Semi. (Jenesesi 11:10-26) 7Evale Yehova ohomutwanyuwelaga mulombwana Abaramu, liye muwandela ira: <<Miyo nnouvaha ilambo yenna ira ikale ya ahimawo a musogolro.>> Noira enne, Abaramu ohomanga evale ibuwa ya mukuto wa Yehova wenno amutwanyuwenle.

8Noira eno, Abaramu ohokwaranyagavo, liye dowa mwangoni, pandi ya makumelo wa nzuwa, dowa manga musasaye wewule, liye kalaga vari va Beteli na Ayi. Sidadi ya Beteli yali mavirelo wa nzuwa eto sidadi ya Ayi yali makumelo wa nzuwa, liye kala vari. Evale liye ohomangavo ibuwa ya mukuto wa Yehova eto oholobela na nzina na Yehova. 9Noira eno, mulombwana Abaramu ohomaruwa, adowaga pandi ya Negebe.

Abaramu ohodowa Ijipitu

10Tempu yenne mwilamboni mwa Kana mohokala ndala ilukulu. Na mwasa wenne, mulombwana Abaramu ohovenyihanaga na muhiyanaye, aliwa dowaga Ijipitu. 11Evale kafunaga fiya Ijipitu ule, Abaramu ohomuwandelaga muhiyanaye eraga: <<Muhiyanaga miyo dihiiziwa ira weyo usimbwa riya bure. 12Akuda Ijipitu kauona, anoiziwa ira uli muhiyanaga. Aliwa kaiziwa ira weyo uli muhiyanaga, afwase anodipa miyo ira kautele. 13Mbwenye ira jejo jahaireye, nnauvepa ira uwongege ira: <Ula gu murongolaga.>#12:13 uwongege ira: <<Ula gu murongolaga.>>: Abaramu awonga eno muwari moyeva nroromelo. Tchoira liye kamuroromenle Mulugu ira amukoye. Muwari mohomuroromela Mulugu, liye afuna anvirihe muhiyanaye mohokala pama. Waira eno miyo nnowatcheliwa pama na mwasa wa weyo eto nnowanda wombowa mwa weyo.>>

14Evale aliwa kavolowaga muIjipitu mule, atu a wewule na ibaribari kohomuona Sarayi ira ohotabwa riya. 15Eto asogolrelri a Farawu kagamuonne Sarayi, kohoroma muwandela Farawu zela makalelo anna liye. Na mwasa wenne, kohomutukula mwadi Abaramu, aliwa mudowana vande va Farawu. 16Mwa enne mwene Farawu na mwasa omuziveliwa Sarayi, ohomuwatchela pama Abaramu. Farawu ohonvaha mabila, ng'ombe, aburu a alombwana na aburu a ahiyana, anamalaba a alombwana na anamalaba a ahiyana, vamohi na akamelo.

17Mbwenye Yehova ohonvaha maurenda ohokala a masika mwene Farawu vamohi na vande vaye vatene na mwasa wa Sarayi mwadi Abaramu. 18Evale Farawu ohomuitana Abaramu, liye nfuka ira: <<Kodi jeji jidiirele we ji nni? Mwasiwa gwa nni uza wahadiwandelaga ira Sarayi gu muhiyanawo? 19Mwasiwa gwa nni uza uwongaga ira: <Wenna gu murongolaga.>? Na mwasa wa jowonga jawo, miyo dohomutela ira akale muhiyanaga. Mbwenye voira gu muhiyanawo, umutukule umudowegena!>> 20Evale Farawu oharuma anamalabaye ira kanvelele mulombwana Abaramu na muhiyanaye. Anamalaba a mwene Farawu ale kohonvelelaga mulombwana Abaramu kankumihaga mwilamboni mule ira adowege na jengo jaye jatene.

Currently Selected:

Jenesesi 12: iLolo

Highlight

Copy