வி.தூ. கெலசகோளு 25

பெஸ்து அம்போனியெ முந்தால பவுலு

1பெஸ்து ஆ ஜில்லாவியெ கவுருனராங்க பந்து மூறு தினகோளியெ இந்தால அவ செசரியாவுல இத்து எருசலேமியெ ஓதா. 2ஆக தொட்டு பூஜேரிகோளுவு, யூதமத தலெவருகோளுவு அவுனொத்ர பந்து பவுலியெ எதுராங்க குத்தகோளுன ஏளிரு. 3அவுன்ன கொண்டுகோண்டு ஓவுது தாரில அவுன்ன சாய்கொலுசுவுக்கு சூழ்ச்சி மாடிதுனால அவுருகோளு பெஸ்துவொத்ர, “நம்மு மேல எரக்கா தோர்சி பவுலுன எருசலேமியெ கெளுசிமடகுரி” அந்து வேண்டிகோண்டுரு. 4அதுக்கு பெஸ்து அவுருகோளொத்ர, “பவுலுன செசரியாவுலதான ஜெயில்ல ஆக்கியித்தார. நானுவு சீக்கிரவாங்க அல்லி ஓகுத்தினி. 5அதுனால நிம்மொழக அதிகாரதுல இருவுது ஆளுகோளு நன்னுகூட பந்து அவுனு மேல ஏதாசி குத்தவித்துரெ அதுன அவுருகோளு அவுனு மேல ஏளாட்டு” அந்தேளிதா.

6பெஸ்து எருசலேமுல எட்டு இல்லாந்துர அத்து தினகோளோ தங்கி இத்துகோட்டு அப்பறா செசரியாவியெ திருகி ஓதா. அடுத்த தினா அவ நேயதீர்சுவுது எடதுல குத்துகோண்டு, பவுலுன கூங்கிகோண்டு பருவுக்கு கட்டளெ கொட்டா. 7பவுலு அல்லி பந்ததுவு எருசலேமுல இத்து பந்த யூதமத தலெவருகோளு அவுன்ன சுத்திவு நிந்துகோண்டு அவுருகோளுனால நிரூபுசுவுக்கு முடுஞ்சுனார்த பயங்கரவாத தும்ப குத்தகோளுன அவுனு மேல ஏளிரு. 8ஆக பவுலு அவுனு பக்கா இருவுது நேயான ஏளிதா. அவ, “நானு யூதமத சட்டகோளியெ எதுராங்கவோ, தேவரோட குடியெ எதுராங்கவோ ரோமரோட தொட்டு ராஜாவியெ எதுராங்கவோ ஒந்து குத்தவு மாடுலா” அந்தேளிதா. 9ஆதர பெஸ்து யூதருகோளியெ ஒதவி மாடுவுக்கு மனசு இருவோனாங்க பவுலொத்ர, “நிய்யி எருசலேமியெ ஓயி அல்லி நானு நின்னுன ஈ குத்தகோளுன பத்தி விசாரணெ மாடுவுக்கு விரும்புத்தாயா?” அந்து கேளிதா. 10அதுக்கு பவுலு அவுனொத்ர; “நானு ஈக ரோமரோட தொட்டு ராஜா நேயதீர்சுவுது எடக்கு முந்தால நிந்தவனி. இல்லித்தா நனியெ தீர்ப்பு கொடுபேக்கு. நானு யூதருகோளியெ எதுராங்க ஏ கெடுதலுவு மாடுலா. இது நிமியெ சென்னங்க தெளிவுது. 11நானு ஏதாசி கெடுதலுமாடி, சாய்வுது அளவியெ தண்டனெ ஈசுவுது மாதர குத்தா மாடி இத்துரெ ஆ தண்டெனல இத்து தப்புசுவுக்கு வழி நோடுனார்ரே. ஆதர இவுருகோளு நன்னு மேல ஏளுவுது குத்தகோளுல நெஜா எதுவுவு இல்லாங்க இத்துரெ அவுருகோளியெ ஒதவி மாடுவுக்கு மனசு இருவோராங்க யாருவு நன்னுன இவுருகோளொத்ர ஒப்படெசுவுக்கு முடுஞ்சுனார்து. ரோமரோட தொட்டு ராஜாத்தா நன்னுன விசாரணெ மாடுபேக்கு” அந்தேளிதா. 12பெஸ்து அவுனியெ ஓசனெ ஏளுவோருகூட சேந்து ஓசனெ மாடிகோட்டு பவுலொத்ர, “நிய்யி நின்னுன ரோமரோட தொட்டு ராஜாத்தா விசாரணெ மாடுபேக்கு அந்து ஏளித. அதுனால நிய்யி ரோமரோட தொட்டு ராஜாவொத்ரவே ஓகுபேக்கு” அந்தேளிதா.

பெஸ்துவு, அகிரிப்பா ராஜாவு

13கொஞ்ச தினகோளியெ இந்தால, அகிரிப்பா ராஜாவு, அவுனோட அக்கா பெர்னீக்கேயாளுவு பெஸ்துன நோடிகோட்டு வாழ்த்து ஏளுவுக்காக செசரியாவியெ பந்துரு. 14அவுருகோளு அல்லி தும்ப தினகோளு தங்கி இருவாங்க அவுருகோளொத்ர பெஸ்து பவுலுன பத்தி வெரவாங்க ஏளிதா. அவ ராஜாவொத்ர, “பேலிக்ஸு ஜெயில்ல கைதியாங்க மடகிகோட்டு ஓத ஒந்து ஆளு இத்தான. 15நானு எருசலேமியெ ஓயி இருவாங்க தொட்டு பூஜேரிகோளுவு. யூதமத தலெவருகோளுவு நன்னொத்ர அவுனியெ எதுராங்க குத்தகோளுன ஏளி அவுனியெ எதுராங்க தீர்ப்பு கொடுபேக்கு அந்து கேளிகோண்டுரு. 16அதுக்கு நானு அவுருகோளொத்ர ‘யாருன குத்தவாளி அந்து ஏளிரோ அவ, குத்தவேளிதோரு முந்தால அவுனோட குத்தான பத்தி வெளக்கவாங்க ஏளுவுக்கு வாய்ப்பு கொடுபேக்கு. ஆங்கே வாய்ப்பு கொடுலாங்க தீர்ப்பு கொடுவுது ரோமரோட பழக்கவில்லா’ அந்தேளிதே. 17அதுனால அவுருகோளு இல்லி பந்ததுவு கொஞ்ச ஒத்துகூட தாமதமாடுலாங்க அடுத்த தினவே நானு நேயதீர்சுவுது எடதுல குத்துகோண்டு அவுன்ன கூங்கிகோண்டு பருவுக்கு கட்டளெ கொட்டே. 18ஆக அவுனு மேல குத்தவேளிதோரு நானு நெனசித குத்தகோளு ஒந்துனவு அவுனு மேல ஏளுலா. 19ஆதர அவுருகோளோட மதான பத்திவு, சத்தோத யேசு அம்புது ஒந்தொப்பா உசுரோட இத்தான அந்து பவுலு சாதுச்சுவுதுன பத்திவு, அவுருகோளொழக இருவுது பாய்ஜகளகோளுன பத்திவு அவுனியெ எதுராங்க ஏளிரு. 20ஈ மாதரயிருவுது பாய்ஜகளகோளுன பத்தி நனியெ சந்தேக இத்ததுனால நானு பவுலொத்தர நிய்யி எருசலேமியெ ஓயி அல்லி இதுகோளுன பத்தி விசாரணெ மாடுவுக்கு நினியெ சம்மதவா அந்து கேளிதே. 21ஆதர பவுலு அவுன்ன ரோமரோட தொட்டு ராஜாத்தா விசாரணெமாடி தீர்ப்பு கொடுபேக்கு அந்து கேளிகோண்டதுனால அவுன்ன ரோமரோட தொட்டு ராஜாவொத்ர கெளுசுவுது வரெக்குவு ஜெயில்ல ஆக்குவுக்கு கட்டளெ கொட்டே” அந்தேளிதா. 22ஆக அகிரிப்பா பெஸ்துவொத்ர, “ஆ ஆளு ஏளுவுதுன நானுவு கேளுவுக்கு விரும்புத்தினி” அந்தேளிதா. அதுக்கு அவ, “நீமு அதுன நாளெயெ கேளுவாரி” அந்தேளிதா.

23அடுத்த தினா அகிரிப்பாவு, பெர்னீக்கேயாளுவு தும்ப ஆடம்பரவாங்க பந்து பட்டாளது தலெவருகோளுகூடவு, பட்டணதுல இருவுது தொட்டு ஆளுகோளுகூடவு நேயதீர்சுவுது ஆ எடக்கு பந்து சேந்துரு. அப்பறா பெஸ்து கட்டளெ கொட்டுது மாதரயே பவுலுன கொண்டுகோண்டு பந்துரு. 24ஆக பெஸ்து, “அகிரிப்பா ராஜாவே, நம்முகூட இல்லி கூடியிருவோரே, நீமு நோடுவுது ஈ ஆளியெ எதுராங்க யூத ஜனகோளு எல்லாருவு எருசலேமுலைவு, இல்லிவு நன்னொத்ர பந்து அவுனியெ எதுராங்க குத்தா ஏளியித்தார. இனிமேலுவு இவ உசுரோட இருகூடாது அந்து அவுருகோளு தும்ப சத்தவாக்கிரு. 25ஆதர இவுனியெ சாய்வுது அளவியெ தண்டனெ கொடுவுது மாதர இவ ஏ குத்தானவு மாடுலா அந்து நனியெ தெளுததுனாலைவு, இவ ரோமரோட தொட்டு ராஜாத்தா அவுனியெ தீர்ப்பு கொடுபேக்கு அந்து ஏளிதுனாலைவு இவுன்ன அவுரொத்ர கெளுசுவுக்கு முடுவுமாடிதே. 26ஆதர இவுன்ன பத்தி ரோமரோட தொட்டு ராஜாவியெ எழுதுவுக்கு ஏ உறுதியாத காரியவு நனியெ புருஞ்சுலா. ஒந்து கைதின அவ மாடித குத்தா ஏனு அந்து ஏளுலாங்க கெளுசுவுது புத்தியிருனார்த கெலசா அந்து நனியெ தோணுத்தாத. 27அதுனால இவுன்ன ஒந்து தடவெ விசாரணெ மாடிரெ ரோமரோட தொட்டு ராஜாவியெ எழுதுவுக்கு நனியெ ஏதாசி சிக்குவுது அந்து நெனசி இவுன்ன நிம்மொத்ரவு, விசேஷவாங்க அகிரிப்பா ராஜாவே நிம்மொத்ரவு கொண்டுகோண்டு பந்தவனி” அந்தேளிதா.

Currently Selected:

வி.தூ. கெலசகோளு 25: KFI

Highlight

Copy